ក្រុមការងាររាជរដ្ឋាភិបាលចុះខេត្តកំពង់ស្ពឺ ប្រជុំរកដំណោះស្រាយវិវាទដីធ្លីក្នុងស្រុកសំរោងទង

នៅព្រឹកថ្ងៃទី១៥ ខែកុម្ភៈ ឆ្នាំ២០២៤នេះ ឯកឧត្តម ហ៊ុន ម៉ានី ប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ បានដឹកនាំកិច្ចប្រជុំមួយដើម្បីប្រមូលព័ត៌មាន និងពិភាក្សាស្វែងរកដំណោះស្រាយ លើករណីដីធ្លី ដែលស្ថិតក្នុងភូមិអន្លង់គង់ ឃុំត្រពាំងគង ស្រុងសំរោងទង ខេត្តកំពង់ស្ពឺ។

ឯកឧត្តម ហ៊ុន ម៉ានី បានចូលរួមអបអរសាទរជាមួយប្រជាពលរដ្ឋទាំង ៦០ គ្រួសារ ដែលទទួលបានដំណោះស្រាយជាផ្លែផ្កា។ ឯកឧត្តមបន្តថា យន្តការស្វែងរកដំណោះស្រាយជូនប្រជាពលរដ្ឋមានទុក្ខលំបាក គឺជាកិច្ចការដែលត្រូវបានបន្តយកចិត្តទុកដាក់ដោយរាជរដ្ឋាភិបាល នីតិកាលទី៧ នៃរដ្ឋសភា ដឹកនាំដោយគណបក្សប្រជាជនកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី។

គួរឱ្យដឹងថា កម្មវិធីដែលរៀបចំនៅក្នុងសាលប្រជុំសាលាខេត្តកំពង់ស្ពឺ មានវត្តមានក្នុងកិច្ចប្រជុំរួមមាន ថ្នាក់ដឹកនាំក្រុមការងាររាជរដ្ឋាភិបាល គណៈអភិបាលខេត្ត ស្រុក មន្ទីរអង្គភាពពាក់ព័ន្ធ និងអាជ្ញាធរមូលដ្ឋានភូមិ និងឃុំខាងលើផងដែរ៕