ដំណាំស្អំរបស់អ្នកស្រុកចំការលើ អាចរកចំណូលបានក្នុងមួយឆ្នាំៗរាប់លានរៀល

អ្នកស្រុកចំការលើ ក្នុងខេត្តកំពង់ចាម នៅតែបន្តដាំដុះដំណាំស្អំ ហើយអាចរកចំណូលបានក្នុងមួយឆ្នាំៗរាប់លានរៀលឯណោះ ដែលអាចជួយបង្កើនជីវភាពគ្រួសារឱ្យកាន់តែមានភាពល្អប្រសើរឡើងបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រួសារអ្នកស្រី ម៉ៅ អាយុ ៤២ឆ្នាំ រស់នៅក្នុងភូមិល្វាត្បូង ឃុំល្វា ស្រុកចំការលើ ខេត្តកំពង់ចាម បានឱ្យដឹងថា គ្រួសារអ្នកស្រី បានដំណាំស្អំនេះរយៈពេល៣ឆ្នាំមកហើយ។ អ្នកស្រីថា ដំណាំនេះ ងាយស្រួលក្នុងការដាំដុះ ថែទាំ ព្រោះក្រោយពីដាំដុះរួច ត្រូវដាក់ទឹកស្រោចជាប្រចាំ។ អ្នកស្រី ម៉ៅ បានបន្ថែមទៀតថា ដំណាំស្អំនេះ ក្នុងរយៈពេល ៣ ទៅ ៤ថ្ងៃ អាចកាត់ត្រួយលក់បានហើយ ដោយកាត់ម្តងៗបានផល ១០ ទៅ ២០គីឡូក្រាមឯណោះលើផ្ទៃដី ៤០អា។

អ្នកស្រី ម៉ៅ បានបញ្ជាក់ទៀតថា ចំពោះតម្លៃទីផ្សារបច្ចុប្បន្នវិញ បោះលក់ទៅឱ្យឈ្មួញកណ្តាលបានមួយគីឡូចាប់ពី ៣ ០០០រៀល ទៅ ៤ ០០០រៀល ហើយតំបន់នេះមានជាង ២០គ្រួសារ ដែលបង្កបង្កើនផលដំណាំស្អំមួយនេះ ដោយសារកត្តាផ្ទៃដីល្អ និងមានប្រព័ន្ធទឹកគ្រប់គ្រាន់៕

 អត្ថបទ និង រូបភាព ៖ ឡេក ចាន់ពេជ្រ