បេក្ខជន ១ ១៣៨នាក់ ចូលរួមប្រឡងក្របខណ្ឌក្រសួងកសិកម្ម ខណៈចម្រាញ់យកតែ ៥២នាក់ប៉ុណ្ណោះ

ដូចការគ្រោងទុក នៅថ្ងៃទី ៥ ខែមីនា ឆ្នាំ ២០២៤នេះ ក្រសួងមុខងារសាធារណៈ បានបន្តរៀបចំដំណើរការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ ដែលរៀបចំឡើងនៅសាលាភូមិន្ទរដ្ឋបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រឡង បានធ្វើឡើងនៅរសៀលថ្ងៃអង្គារនេះ ដែលអញ្ជើញកាត់វិញ្ញាសាប្រឡងដោយឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង និងមានការអញ្ជើញចូលរួមដោយលោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។ ការប្រឡងប្រជែងជ្រើសរើសនាពេលនេះ មិនរាប់បញ្ចូលក្នុងការប្រឡងប្រជែងជ្រើសរើសមន្ត្រីកសិកម្មឃុំ ដែលឈរលើគោលការណ៍ពង្រាយមន្ត្រីរាជការថ្នាក់ក្រោមជាតិ នោះទេ។

លោក គង់ សុភី រដ្ឋលេខាធិការក្រសួងមុខងារសាធារណៈ និងជាប្រធានអនុគណៈកម្មការកណ្តាលរៀបចំការប្រឡងប្រជែង មានប្រសាសន៍ថា ការប្រឡងប្រជែងនេះ មានបេក្ខជនចូលរួមចំនួន ១ ១៣៨ អង្គ/នាក់ ដោយក្នុងនោះមានស្ត្រីចំនួន ៥០៩នាក់ ដោយចម្រាញ់យកតែ ៥២នាក់ប៉ុណ្ណោះ។

បេក្ខជន ត្រូវកំណត់ឲ្យមកទីតាំងឲ្យបាន ១ម៉ោងមុនការប្រឡង ដោយត្រូវឆ្លងកាត់ក្រុមការងារត្រួតពិនិត្យយ៉ាងម៉ត់ចត់ ហើយមិនអនុញ្ញាតឲ្យយកឯកសារ ឬគ្រឿងអេឡិចត្រូនិក ចូលនោះឡើយ។ នៅពេលដល់បន្ទប់ប្រឡង គឺមានអនុរក្សហៅឈ្មោះ ត្រួតពិនិត្យ និងផ្ទៀងផ្ទាត់នូវជំនាញ លេខតុ លេខបន្ទប់ មុននឹងឲ្យបេក្ខជនចូលប្រឡង។ ចំពោះវិញ្ញាសាប្រឡងមានចំនួន ៣ គឺ១.វិញ្ញាសាវប្បធម៌ទូទៅ ២.វិញ្ញាសាជំនាញ និង ៣.វិញ្ញាសាភាសាអង់គ្លេស។

លោក គង់ សុភី បានឲ្យដឹងបន្តថា ការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ មានរហូតដល់ ១៣មុខជំនាញ ដូចជា៖ គណនេយ្យ និងហិរញ្ញវត្ថុ, ភាសាអង់គ្លេស, វិទ្យាសាស្រ្ដកសិកម្ម, កសិ-ឧស្សាហកម្ម និងគីមីចំណីអាហារ, វិទ្យាសាស្រ្ដកៅស៊ូ, រៀបចំដែនដី និងរដ្ឋបាលដីធ្លី, ព័ត៌មានវិទ្យា, វិទ្យាសាស្រ្ដជលផល, សេដ្ឋកិច្ចកសិកម្ម និងអភិវឌ្ឍន៍ជនបទ, វិទ្យាសាស្រ្ដព្រៃឈើ និងបរិស្ថាន, វិស្វកម្មកសិកម្ម, វិទ្យាសាស្រ្ដសត្វ និងនីតិសាស្រ្ដ និងរដ្ឋបាលសាធារណៈ។

មន្ត្រីជាន់ខ្ពស់ក្រសួងមុខងារសាធារណៈរូបនេះ បានឲ្យដឹងទៀតថា រាល់ការប្រឡងប្រជែងជ្រើសរើសរើសមន្ត្រីរាជការ ចូលបម្រើការងារតាមក្រសួង-ស្ថាប័នទាំងអស់ មានការចូលរួមសង្កេតការណ៍មកពីអង្គភាពប្រឆាំងអំពើពុករលួយ, សហភាពសហព័ន្ធយុវជនកម្ពុជា (សសយក)​, តំណាងមកពីសាកលវិទ្យាល័យ និងតំណាងសាធារណជន។

លោក គង់ សុភី បានបន្ថែមថា «ខ្ញុំចង់ជម្រាបជូនថា អ្វីដែលរាជរដ្ឋាភិបាលដាក់ចេញឲ្យក្រសួង-ស្ថាប័នទាំងអស់ អនុវត្តនិយាមថ្មី ស្ដីពី ការជ្រើសរើសមន្ត្រីរាជការនេះ ដើម្បីបង្ហាញសាធារណជន ជាពិសេសយុវជនជំនាន់ក្រោយថា យើងចង់បានម​ន្ត្រីរាជការដែលមានសមត្ថភាព មានចំណេះ ជំនាញពិតប្រាកដ ចូលបម្រើការងារក្នុងរដ្ឋបាលសាធារណៈ ហើយក្នុងរដ្ឋបាលសាធារណៈនេះ គឺគ្របដណ្ដប់គ្រប់ក្រសួង-ស្ថាប័នទាំងអស់»។

នេះជាថ្ងៃទី ៣ហើយ ដែលក្រសួងមុខងារសាធារណៈ បានរៀបចំការប្រឡងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌក្រសួង-ស្ថាប័ន ចំនួន ៣។ កាលពីថ្ងៃទី ៣ ខែមីនា ឆ្នាំ ២០២៤ ក្រសួងមុខងារសាធារណៈ បានរៀបចំការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌអង្គភាពប្រឆាំងអំពើពុករលួយ។ ថ្ងៃទី ៤ ខែមីនា ឆ្នាំ ២០២៤ ក្រសួងមុខងារសាធារណៈ បានរៀបចំការប្រឡងប្រជែងជ្រើសរើសមន្ត្រីរាជការស៊ីវិល ចូលបម្រើការងារក្នុងក្របខណ្ឌក្រសួងសាធារណការ និងនៅថ្ងៃទី ៥ ខែមីនា ឆ្នាំ ២០២៤នេះ ក្រសួងមុខងារសាធារណៈ បានរៀបចំការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ៕