គោរពតាមអភិក្រម«ពង្រឹង ជាងពង្រីក»ក្រសួងស្ថាប័នចំនួន១២ បានកាត់បន្ថយអគ្គនាយកដ្ឋាន៣ និងនាយកដ្ឋាន២៦ និងការិយាល័យមួយចំនួនទៀត

ក្រសួងស្ថាប័នចំនួន១២ នៃរាជរដ្ឋាភិបាលកម្ពុជានីតិកាលទី៧ ដែលបានឆ្លងការវិភាគមុខងារ និងរចនាសម្ព័ន្ធដំណាក់កាលទី១  បានកាត់បន្ថយអគ្គនាយកដ្ឋានចំនួន៣ និងនាយកដ្ឋានចំនួន២៦ និងការិយាល័យមួយចំនួនទៀត។

ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ និងដាក់ទិសដៅអនុវត្តការងារឆ្នាំ២០២៦ ឧបនាយករដ្ឋមន្ត្រី​ ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានថ្លែងថា អភិក្រម និងវិធីសាស្រ្តក្នុងការធ្វើកំណែទម្រង់របស់ប្រទេសនីមួយៗ មានភាពខុសគ្នា អាស្រ័យលើបរិបទ និងភាពចាំបាច់រៀងៗខ្លួន ក្នុងនោះ សម្រាប់កម្ពុជា សម្តេចធិបតីនាយករដ្ឋមន្ត្រី បានដាក់ចេញនូវអភិក្រម “ពង្រឹងជាជាងពង្រីក” ដោយមិនពង្រីកលើសពីអ្វីដែលកំពុងមាន ហើយពង្រឹងអ្វីដែលមានស្រាប់ និងកែសម្រួលមួយចំនួនឱ្យបានសមស្រប។

ឯកឧត្ដម ហ៊ុន ម៉ានី ថ្លែងដូច្នេះ​៖«ជាក់ស្តែង ចំពោះការរៀបចំរចនាសម្ព័ន្ធឡើងវិញ, ក្រសួងមុខងារសាធារណៈ និងក្រសួងស្ថាប័នមួយចំនួន (សរុប ១២ ក្រសួងស្ថាប័ន គិតត្រឹមបច្ចុប្បន្ន) មិនត្រឹមតែមិនមានការពង្រីកនោះទេ តែបានកាត់បន្ថយអគ្គនាយកដ្ឋាន ចំនួន ៣ និងនាយកដ្ឋាន ចំនួន ២៦ និងការិយាល័យមួយចំនួនទៀត ហើយធនធានមនុស្សរបស់ក្រសួងក៏មិនមានកំណើននោះទេ តែទទួលបានការពង្រឹងសមត្ថភាព និងការទទួលខុសត្រូវបន្ថែម ដើម្បីបង្កើនប្រសិទ្ធភាពការងារ។»។

​ ​សម្ដេច ហ៊ុន ម៉ាណែត នៅ​ថ្ងៃទី​២១ ខែឧសភា ឆ្នាំ​២០២៤ បានចេញសេចក្ដី​ណែនាំ​ស្ដីពីការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួងស្ថាប័ន។ ការវិភាគមុខងារ និងរចនាសម្ព័ន្ធរបស់ក្រសួង ស្ថាប័ន គឺដើម្បីស្វែងរកដំណោះស្រាយចំពោះបញ្ហាប្រឈមមួយចំនួនដែលក្រសួង ស្ថាប័ន កំពុងជួបប្រទះ  ភាពមិនច្បាស់លាស់ ឬការត្រួតជាន់គ្នានៃមុខងារ និងការទទួលខុសត្រូវរបស់ក្រសួង ស្ថាប័ន និងអង្គភាពក្រោមឱវាទក្រសួង ស្ថាប័ន និងដើម្បីលើកកម្ពស់ដំណើរការនៃក្រសួង ស្ថាប័នឱ្យកាន់តែមានប្រសិទ្ធភាព និងស័ក្តិសិទ្ធិភាព។

ក្រសួងមុខងារសាធារណៈ ក្នុងនាមជាលេខាធិការដ្ឋាន នៃគណៈកម្មាធិការជាតិជំរុញការអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី៧ បានចុះទៅវិភាគមុខងារ និងរចនាសម្ព័ន្ធក្រសួង ស្ថាប័នលើក្រសួងស្ថាប័នចំនួន៣២។

តាមរយៈការអនុវត្តអភិក្រម «ពង្រឹងជាជាងពង្រីក» បម្រែបម្រួលឥណទានបៀវត្សធៀបនឹងឆ្នាំ២០២៥ ឥណទានបៀវត្សក្រសួងមុខងារសាធារណៈឆ្នាំ២០២៦ បរិមាណថយចុះ។ នេះបើតាមការបញ្ជាក់របស់លោក ហាស់ ប៊ុនថ្ថន អនុរដ្ឋលេខាធិការក្រសួងមុខងារសាធារណៈ ក្នុងបទបង្ហាញធ្វើឡើងកាលពីថ្ងៃទី២៥ ខែមីនា ម្សិលមិញ។  លោក បន្ថែមថា ក្នុងនីតិកាលទី៧ នេះ សុខុមាលភាពមន្រ្តីត្រូវបានលើកកម្ពស់យ៉ាងខ្លាំង ហើយក៏មានការបង្កបរិយាកាសស្និទ្ធស្នាល និងភាពជាបងប្អូនកាន់តែកក់ក្តៅរវាងថ្នាក់ដឹកនាំ និងមន្រ្តីគ្រប់ៗរូប៕