​ឥទ្ធិពលជ្រលងសម្ពាធទាប ​ធ្វើឱ្យកម្ពុជាមានភ្លៀងធ្លាក់ ៣០ ភាគរយ​

ក្រសួងធនធានទឹក និងឧតុនិយម​បានប្រកាសនៅថ្ងៃទី ០៦ ខែមីនានេះថា ជ្រលងសម្ពាធទាប​មានឥទ្ធិពល លើឈូងសមុទ្រថៃ និងភាគកណ្តាល នៃអាងទន្លេមេគង្គ និងសមុទ្រចិនខាងត្បូង និងមកលើប្រទេសកម្ពុជា ខណៈដែលខ្យល់បក់មកពីទិសនិរតី និងអាគ្នេយ៍។

ស្ថានភាពបែបនេះនឹងធ្វើឱ្យតំបន់វាលទំនាប ចាប់ពីថ្ងៃទី ០៦ ដល់ថ្ងៃទី ០៨ ខែមីនា មានសីតុណ្ហភាពមធ្យមអប្ប​ប​រ​មា​២៥ អង្សា និងសីតុណ្ហភាពមធ្យម​អតិបរមា​៣៦ អង្សា ផ្ទៃមេឃមានពពកពីតិចទៅមធ្យម និងមានភ្លៀងធ្លាក់ក្នុង​កម្រិតខ្សោយគ្របដណ្តប់លើផ្ទៃដី៣០% និងមានខ្យល់បក់មកពីទិសអាគ្នេយ៍មានល្បឿន​មធ្យម២ម៉ែត្រ/វិនាទី។

ចំណែកតំបន់ខ្ពង់រាបមានសីតុណ្ហភាពមធ្យមអប្បបរមា២៤ អង្សា និងសីតុណ្ហភាពមធ្យមអតិបរមា​៣៧អង្សា ផ្ទៃមេឃមានពពកពីតិចទៅមធ្យម និងមានភ្លៀងធ្លាក់ក្នុងកម្រិតខ្សោយគ្របដណ្តប់​លើផ្ទៃដី២០% និងមានខ្យល់បក់មកពីទិសបូព៌មានល្បឿនមធ្យម៣ម៉ែត្រ/វិនាទី។

រីឯតំបន់មាត់សមុទ្រមានសីតុណ្ហភាពមធ្យមអប្បបរមា២៥ អង្សា និងសីតុណ្ហភាពមធ្យមអតិបរមា​៣៧អង្សា ផ្ទៃមេឃមានពពកពីតិចទៅមធ្យម និងមានភ្លៀងធ្លាក់ក្នុងកម្រិតខ្សោយ គ្របដណ្តប់​លើផ្ទៃដី៣០% និងមានខ្យល់បក់មកពីទិសនិរតី មានល្បឿនមធ្យម២ម៉ែត្រ/វិនាទី។ រលកសមុទ្រមានកម្ពស់មធ្យមអប្បបរមា០,៥០ម៉ែត្រ និងកម្ពស់មធ្យម​អតិបរមា​១,៥០ម៉ែត្រ៕