ការធ្វើតេស្ដស្វែងរកសារធាតុញៀនលើមន្ត្រីកងកម្លាំងនគរបាលជាតិតាមបណ្ដារាជធានី ខេត្ត បានបញ្ចប់១០០ភាគរយ

លោក ទូច សុខៈ អ្នកពាក្យរងក្រសួងមហាផ្ទៃ បានឲ្យដឹងនៅព្រឹកថ្ងៃទី៦ ខែមីនា ឆ្នាំ២០២៤នេះថា ការធ្វើតេស្ដស្វែងរកសារធាតុញៀនលើមន្ត្រីកងកម្លាំងនគរបាលជាតិ​ តាមបណ្ដារាជធានី ខេត្ត ចំណុះឲ្យអគ្គស្នងការដ្ឋាននគរបាលជាតិ នៃក្រសួងមហាផ្ទៃ បានបញ្ចប់១០០ភាគរយហើយ ខណៈមន្ត្រីរាជការស៊ីវិល កំពុងចាប់ផ្ដើមអនុវត្ត។

លោក ទូច សុខៈ បញ្ជាក់ថា ទោះបីបានបញ្ចប់យុទ្ធនាការធ្វើតេស្ដស្វែងរកសារធាតុញៀនលើមន្ត្រីកងកម្លាំងនគរបាលជាតិតាមបណ្ដារាជធានី ខេត្ត ក៏ពិតមែន តែចំពោះចំនួនប៉ុន្មាន និងការអនុវត្តវិធានការណ៍ដាក់វីន័យកងកម្លាំង ឬប្រឈមមុខបណ្ដេញចេញពីក្រខ័ណ្ឌយ៉ាងណានោះ នៅមិនទាន់អាចកំណត់បាននៅឡើយទេ ដោយរង់ចាំកម្លាំងជំនាញធ្វើរបាយការណ៍តាមឋានានុក្រមគោរពជូនលោក ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដើម្បីពិនិត្យ និងសម្រេចក្នុងការចាត់វិធានការ។

ជាមួយគ្នានេះ លោក ទូច សុខៈ ក៏បានបញ្ជាក់ដែរថា ចំពោះមន្ត្រីរាជការស៊ីវិលចំណុះឲ្យក្រសួងមហាផ្ទៃ ទាំងថ្នាក់ជាតិ និងថ្នាក់ក្រោមជាតិ​ ជាពិសេសគឺរដ្ឋបាលរាជធានី ខេត្ត គឺកំពុងតែចាប់ផ្ដើមបណ្ដើរៗហើយ ដោយខេត្តខ្លះបានដាក់ពេលកំណត់ដើម្បីធ្វើតេស្ដស្វែងរកសារធាតុញៀនលើមន្ត្រីរាជការស៊ីវិលរបស់ខ្លួន៕

អត្ថបទ៖ សុខុម