បែកគ្នាតាំងពីជំនាន់ ប៉ុល ពត បុរសម្នាក់ទើបមានឱកាស​រកឃើញឈ្មោះ ​ឪពុកនៅសារមន្ទីរទួលស្លែង

លោក ម៉ៅ សុវណ្ណារិទ្ធ អាយុ ៤៩ឆ្នាំ រស់នៅស្រុកស្វាយអន្ទរ ខេត្តព្រៃវែង បានរកឃើញឈ្មោះឪពុក (ម៉ៅ ម៉េត) ដែលត្រូវបានចាប់ខ្លួន និងយកទៅសម្លាប់នៅមន្ទីរឃុំឃាំង ស-២១ ក្នុងកំឡុងឆ្នាំ​១៩៧៧​។

លោកបានបញ្ជាក់ថា ក្រុមគ្រួសារមានក្តីនឹករលឹកជាខ្លាំងចំពោះឪពុក ហើយបានព្យា​យាមស្វែងរកដំណឹងជានិច្ចតែពុំទទួលលទ្ធផលឡើយ។

ក្នុងតួនាទីជាមន្ត្រីអប់រំ លោក ធ្លាប់ដឹកនាំសិស្សវិទ្យាល័យមកពីខេត្តព្រៃវែងទស្សនាសារមន្ទីរទួលស្លែងជាច្រើនលើក ហើយនាគ្រាមួយលោកបានប្រទះឃើញឈ្មោះជនរងគ្រោះ ម៉ៅ ម៉េត នៅលើផ្ទាំងចារឹក។

ភ្លាមៗដោយមានចម្ងល់ និងសង្ស័យថាជាឪពុករបស់ខ្លួន លោកបានមកដល់បណ្ណសារសារមន្ទីរទួលស្លែង ដើម្បីសាកសួរពត៌មានបន្ថែម។ ក្រុមការងារបណ្ណសារ បានរកឃើញនិងបញ្ជាក់អត្តសញ្ញាណជនរងគ្រោះ ម៉ៅ ម៉េត ដែលត្រូវជាឪពុកបង្កើតរបស់លោក ម៉ៅ សុវណ្ណារិទ្ធ នៅក្នុងបញ្ជីឈ្មោះចូល និងចេញរបស់អ្នកជាប់ឃុំពិតប្រាកដមែន។

នៅថ្ងៃទី១១ ខែមីនា ឆ្នាំ២០២៤ បុគ្គលិកបណ្ណសារសារមន្ទីរបានប្រគល់ឯកសារពាក់ព័ន្ធជូនលោក ម៉ៅ សុវណ្ណរិទ្ធិ។

សូមជម្រាបថា លោក ម៉ៅ ម៉េត ដែលជាឪពុករបស់លោក ម៉ៅ សុវណ្ណរិទ្ធិ ជាមន្ត្រីរដ្ឋបាលឃុំ និងមាននាទីជាអនុលេខាវរៈសេនាតូចនៅក្នុងខេត្តព្រៃវែងក្នុងសម័យសាធារណរដ្ឋ។

ក្រោយមកលោកត្រូវបានចាប់ខ្លួននៅថ្ងៃទី១៩ ខែកុម្ភៈ ឆ្នាំ១៩៧៧ (អាយុជាង៣០នាពេលនោះ) ហើយបានជាប់ឃុំរយៈពេលជិត៣ខែ ក្នុងបន្ទប់ឃុំឃាំងតូចមួយនៅ ស-២១ មុននឹងបញ្ជូនទៅសម្លាប់នៅថ្ងៃទី១២ ខែឧសភា ឆ្នាំ១៩៧៧។

លោក ម៉ៅ សុវណ្ណារិទ្ធ មានឱកាសបានជួបលោកឪពុកលើកចុងក្រោយក្នុងវ័យកុមារភាពប្រហែល អាយុ៥ឆ្នាំប៉ុណ្ណោះ ក្នុងសម័យកម្ពុជាប្រជាធិបតេយ្យ។

លោក និងក្រុមគ្រួសារពុំបានដឹងពីទីតាំង ឬដំណឹងឪពុកដែលត្រូវបានចាប់ខ្លួនមកនោះទេ។ រហូតមកដល់ពេលនេះទើបលោក បានដឹងថាឪពុកត្រូវបាននាំយកមកគុកទួលស្លែង៕

ប្រភព៖ សារមន្ទីរប្រល័យពូជសាសន៍ទួលស្លែង