ព័ត៌មានជាតិ

មេការចិនប្រាប់ថា ឆ្នាំក្រោយស្ពានឆ្លងទន្លេខេត្តក្រចេះនឹងរួចរាល់

បានផុស

១ year មុន

នៅ

ថ្ងៃសៅរ៍ ៣០ មីនា ២០២៤

ដោយ

ដំណើរការសាងសង់ស្ពានឆ្លងទន្លេនៅខេត្តក្រចេះ សម្រេចបានជាង ៣០% គិតត្រឹមខែមីនា ឆ្នាំ ២០២៤។

ខណៈដែលក្រុមការងារកម្ពុជាថ្មីចុះទៅពិនិត្យការដ្ឋានស្ពានឆ្លងទន្លេមេគង្គខេត្តក្រចេះដែលកំពុងសម្រុកស្ថាបនានៅព្រឹកមិញនេះ មេការចិនឈ្មោះ នាវ ដែលអាចនិយាយភាសាខ្មែរបានតិចតួចប្រាប់ថា យ៉ាងយូរឆ្នាំក្រោយនឹងរួចរាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេការចិនរូបនេះប្រាប់ថា បច្ចុប្បន្នក្រុមការងារកំពុងសម្រុកធ្វើគ្រឹះស្ពានដែលបញ្ចប់បានជាច្រើនភាគរយ។

ស្ពានឆ្លងកាត់ទន្លេមេគង្គខេត្តក្រចេះមានប្រវែង ១៧៦១ ម៉ែត្រ មានទទឹង ១៣.៥០ ម៉ែត្រ ដោយត្រើយខាងកើតស្ថិតនៅត្រង់ភូមិតាលុស ឃុំបុសលាវ ស្រុកចិត្របុរី និងត្រើយខាងលិចស្ថិតនៅត្រង់ភូមិថ្មរាប ឃុំព្រែកប្រសព្វ ស្រុកព្រែកប្រសព្វ។

ជាកស្តែងនេះ យើងអាចមើលឃើញសរសរគ្រឹះស្ពានកំពុងសង់តម្រៀបគ្នាជាជួរខ្ពស់ៗ លេចបណ្តែតពេញផ្ទៃទឹកទនេ្ល។

នៅក្នុងការដ្ឋានក៏មានកម្មកររាប់សិបនាក់កំពុងបំពេញការងារយ៉ាងមមាញឹក ដែលកម្មករខ្លះមកពីខេត្តឆ្ងាយនិងខ្លះទៀតនៅក្នុងខេត្តក្រចេះតែម្តង។

កម្មករម្នាក់ឈ្មោះ រដ្ឋា ដែលមានស្រុកកំណើតនៅភូមិស្រែអំពិល ឃុំកំពង់ស្វាយ ស្រុកកៀនស្វាយ ខេត្តកណ្តាល ដែលធ្វើការផ្នែកពត់ពុម្ពគ្រឹះស្ពានប្រាប់ថា ការងារនេះលោកអាចទទួលបានប្រាក់ចំណូលប្រហែល ១២ ដុល្លារក្នុងមួយថ្ងៃ និងប្រាក់ថែមម៉ោងផ្សេងទៀត។ កម្មកររូបនេះអះអាងថា ក្រោយដំណើរសាងសង់បានជាងមួយឆ្នាំ បើតាមលទ្ធផលអាចនឹងរួចរាល់មុនផែនការកំណត់។

ពលរដ្ឋម្នាក់ឈ្មោះ ណាត រស់នៅភូមិបុកទឹក ស្រុកព្រែកប្រសព្វ ខេត្តក្រចេះ សម្តែងក្តីរីករាយខណៈបានឃើញរូបរាងស្ពានជាបណ្តើរៗ ដែលជាសមិទ្ធផលជាប្រវត្តិសាស្រ្តសម្រាប់ពលរដ្ឋខេត្តក្រចេះ។

ពលរដ្ឋរូបនេះដែលមានលំនៅដ្ឋាននៅក្បែរការដ្ឋានស្ពាន ទោះបីរងសំឡេងបុកគ្រឹះរំខានតែនៅតែសប្បាយចិត្តមិនត្អូញត្អែរទេព្រោះគិតថា ត្រឹមតែ ១ ឆ្នាំទៀតនឹងបានស្ពានឆ្លងងាយស្រួលធ្វើដំណើរទៅមក។

បើតាមមេការជនជាតិចិន ក្នុងគម្រោងក្រៅពីសាងសង់ស្ពាន ក៏ត្រូវស្ថាបនាផ្លូវតភ្ជាប់ចេញពីរង្វង់មូលគល់ស្ពានជាង ១០ គីឡូម៉ែត្រថែមទៀត៕

អត្ថបទ៖ លី រតនា

Related Topics:ស្ពានខេត្តក្រចេះ