ស្ពានឆ្លងកាត់ទន្លេមេគង្គនៅខេត្តក្រចេះ ត្រៀមដាក់ឱ្យដំណើរការមុនផែនការកំណត់

គម្រោងសាងសង់ «ស្ពានឆ្លងកាត់ទន្លេមេគង្គនៅខេត្តក្រចេះ និងផ្លូវតភ្ជាប់» ដែលមានប្រវែងសរុប ៣៣,៤៥៩ គីឡូម៉ែត្រ កំពុងដំណើរយ៉ាងរលូន និងត្រៀមដាក់ឱ្យធ្វើដំណើរឆ្លងកាត់ស្ពានមុនផែនការកំណត់។

យោងតាមហ្វេសប៊ុក លោក វ៉ា ថន អភិបាលខេត្តក្រចេះ នៅថ្ងៃទី ១៤ ខែ កញ្ញានេះ បានឱ្យដឹងថា ការស្ថាបនាទាំងស្ពាន និងផ្លូវកំពុងដំណើរការយ៉ាងរលូន ហើយរំពឹងថានឹងបញ្ចប់មុនផែនការដែលបានគ្រោងទុកក្នុងឆ្នាំ ២០២៦។ លោកសរសេរថា៖‍«ផ្លូវក៏ស្អាត ស្ពានក៏ថ្មី ខេត្តក្រចេះយើងពិតជាសំណាងណាស់។ សូមជម្រាបជូនបងប្អូនប្រជាពលរដ្ឋថា ស្ពានឆ្លងទន្លេ កំពុងដំណើរយ៉ាងរលូន នឹងអាចបញ្ចប់មុនផែនការ។ ចំណែកផ្លូវពីក្រុងក្រចេះ ឆ្ពោះទៅស្រុកសំបូរ ក៏ជិតរួចរាល់ហើយដែរ»។

គម្រោងសាងសង់ «ស្ពានឆ្លងកាត់ទន្លេមេគង្គនៅខេត្តក្រចេះ និងផ្លូវតភ្ជាប់» គិតត្រឹមខែកក្កដា ឆ្នាំ ២០២៤ សម្រេចបាន ៤១,៨១% នៃវឌ្ឍនភាពទាំងមូល។ គម្រោងនេះរួមមានហេដ្ឋារចនាសម្ព័ន្ធដូចជា ស្ពានឆ្លងកាត់ទន្លេមេគង្គខេត្តក្រចេះ មានប្រវែង ១ ៧៦១ ម៉ែត្រ ស្ថិតនៅស្រុកចិត្របុរី និងស្រុកព្រែកប្រសព្វ សម្រេចបានជាង ៥៥ %ហើយ។ ចំណែកផ្លូវតភ្ជាប់ និងផ្លូវខ្នែងទៅកាន់ក្រុងក្រចេះ ខេត្តក្រចេះ មានប្រវែងសរុប ៣៣,៤៥៩គីឡូម៉ែត្រ សម្រេចបាន ៤១,៨១% ដែលគ្រោងបញ្ចប់ការសាងសង់ឱ្យបានមុនខែកញ្ញា ឆ្នាំ២០២៦ ខាងមុខនេះ ។

ផ្លូវ ស្ពាន គឺជាសរសៃឈាមនៃសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពគន្លឹះទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណ ដំណាក់កាលទី១ ដោយក្នុងកិច្ចការអាទិភាពទី២ នៃបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន ដែលមានគោលដៅយុទ្ធសាស្ត្រផ្តោតលើការបន្តកសាង និងពង្រឹងមូលដ្ឋានគ្រឹះ តាមរយៈការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រ និងការកសាង ព្រមទាំងការអភិវឌ្ឍហេដ្ឋារចនាសម្ព័ន្ធថ្មីៗ៕