កន្លែងវិបស្សនាថ្មីនៅ​គិរីរម្យ ជាគោលដៅទេសចរណ៍លំហែបៃតង សម្រាប់អ្នកប្រតិបត្តិសាសនា

លោក អ៊ាង សុផល្លែត រដ្ឋមន្ត្រី​ក្រសួង​បរិស្ថាន មាន​ប្រសាសន៍​ថា កន្លែង​វិបស្សនា​ថ្មី​នៅ​ឧទ្យានជាតិ​ព្រះសុរាម្រឹត​កុសុមៈ «គិរីរម្យ» ជា​គោលដៅ​ទេសចរណ៍​ ស័ក្ដិសម​សម្រាប់​អ្នក​ប្រតិបត្តិ​សាសនាដែល​នាំ​ឱ្យ​មាន​ភាព​ស្អាត​ក្នុងចិត្ត ភាព​ស្អាតមកខាងក្រៅ ជា​មួយ​ធម្មជាតិ​ស្រស់ស្អាតព័ទ្ធជុំវិញ​។

ក្នុង​ឱកាស​ចុះពិនិត្យការសាសសង់ កន្លែង​វិបស្សនាថ្មី​នៅ​ក្នុងបរិវេណមជ្ឈមមណ្ឌលវប្បធម៌ព្រះពុទ្ធសាសនាកម្ពុជា លើ​ឧទ្យានជាតិព្រះសុរាម្រឹតកុសុមៈ«គិរីរម្យ» ​នា​ថ្ងៃ​ទី២១ ខែមេសា ម្សិល​មិញ​នេះ លោក​រដ្ឋមន្ត្រី អ៊ាង សុផល្លែត បាន​គូស​បញ្ជាក់​​ថា កន្លែង​វិបស្សនា​ថ្មីជា​គោលដៅ​ទេសចរណ៍លំហែបៃតង និង​​ស័ក្ដិសម​សម្រាប់អ្នកប្រតិបត្តិសាសនា។

ជាក់ស្តែង ការ​រៀប​ចំ​សាង​សង់​ទី​កន្លែង​សមាធិ​នេះ​ឡើង ​ដើម្បី​ផ្សព្វផ្សាយពី​មាគ៌ា​ព្រះពុទ្ធសាសនា វប្បធម៌ និង​បង្ហាញ​អំពី​ធនធានធម្មជាតិ ផ្សារ​ភ្ជាប់នឹងជីវិតប្រចាំថ្ងៃ ប្រកបដោយធម៌សន្តោស កសាងសន្តិភាពផ្លូវចិត្តឱ្យរឹងមាំ តាមរយៈ​ការសិក្សាធម៌​វិន័យរបស់ព្រះពុទ្ធ ដែលផ្តោតសំខាន់លើភាពល្អបរិសុទ្ធ ភាពស្អាតនៃចិត្ត ស្រប​តាមយុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨។

លោក រដ្ឋមន្ត្រី​សង្កត់​ធ្ងន់​ថា «គម្រោងទេសចរណ៍លំហែរបៃតង ជាយុទ្ធសាស្រ្តចម្បងមួយរបស់ក្រសួងបរិស្ថាន កើតចេញ​ពីការអនុវត្តយុទ្ធសាស្រ្តចក្រាវិស័យបរិស្ថាន ដែលបានផ្តោតលើមុំយុទ្ធសាស្ត្រចំនួន ៣ គឺស្អាត បៃតង និងចីរភាព។ ជាពិសេស លើការអភិរក្សបរិស្ថាន វប្បធម៌ ជំនឿសាសនា និងធនធានធម្មជាតិ ព្រមទាំងជួយលើកកម្ពស់សោភ័ណភាពតំបន់ធម្មជាតិ ជីវភាពរស់នៅរបស់ប្រជាពលរដ្ឋនៅក្នុងសហគមន៍ តាមតំបន់ការពារធម្មជាតិ ពីព្រោះថា ការសាងសង់នេះ គឺទុកសម្រាប់ជាប្រយោជន៍ជូនពួកគាត់ ឱ្យរកប្រាក់ចំណូលបន្ថែម ព្រមទាំងរក្សាភាពថ្លៃថ្នូរដែលជាទំនៀមទម្លាប់ របស់ប្រជាជាតិពីដូនតាខ្មែរ»។

សូមបញ្ជាក់ថា កន្លែងសមាធិដ៏ទំនើបមួយនៅកម្ពុជានេះ ត្រូវបាន​រចនាឡើងតាមរចនាបទខ្មែរតាម​គំនិតច្នៃប្រឌិត និងបង្កើតឡើង​ដោយ​​លោក​ អ៊ាង សុផល្លែត ដែល​បាន​សង់ឡើងជា​តង់​សម្រាក តាម​ស្ថាបត្យកម្ម​ខ្មែរ ដោយ​បានគិតគូរ​យ៉ាងល្អិតល្អន់ សម្រាប់​កន្លែង​សមាធិ បរិស្ថាន​ជុំវិញ និង​មាន​មុងការពារការរំខានពីសត្វល្អិត តាមរយៈភាពស្ងប់ ងាយស្រួលដល់ការស្វាធ្យាយ និងសម្អាតចិត្តឱ្យស្អាតផូរផង់ល្អ។ បច្ចុប្បន្ន​គម្រោង​បាន​បញ្ចប់ការសាងសង់សមាធិចំនួន ១០ កន្លែង ព្រម​ទាំងកាំជណ្តើរ​ឡើងភ្ជាប់ទៅទីតាំងទាំងនោះដ៏ល្អស្អាត​ផងដែរ។

តាមគម្រោងកន្លែងសមាធិ នឹងត្រូវសាងសង់ចំនួន ៥០ ទីតាំង ផ្សេងគ្នាជាបន្តបន្ទាប់ ដើម្បីទទួលពុទ្ធបរិស័ទឬភ្ញៀវទេសចរ​ជាតិ អន្តរជាតិ ដែលមកកម្សាន្តឧទ្យានជាតិ «គិរីរម្យ» បានចូលទស្សនាទេសភាពធម្មជាតិ ស្រូបយកខ្យល់អកាសបរិសុទ្ធ ស្វែងយល់ពីវប្បធម៌ ប្រវត្តិសាស្រ្ត និងធ្វើសមាធិ សិក្សាធម៌វិន័យរបស់ព្រះពុទ្ធសាសនា ដែលជាទំនៀម​ទម្លាប់របស់ប្រជាពលរដ្ឋតពីដូនតា៕

​