រដ្ឋមន្ត្រីសុខាភិបាលស្នើគ្រឹះស្ថានសិក្សារដ្ឋ និងឯកជនធ្វើទំនើបកម្មលើកម្មវិធីសិក្សាឱ្យស្របតាមនិយាមស្តង់ដា

លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាលបានស្នើដល់គ្រប់គ្រឹះស្ថានសិក្សាទាំងសាធារណៈ ទាំងឯកជន
ដែលកំពុងធ្វើការបណ្តុះបណ្តាលនិស្សិតក្នុងវិស័យសុខាភិបាលធ្វើទំនើបកម្មលើកម្មវិធីសិក្សា ដើម្បីឱ្យស្របតាមនិយាមស្តង់ដា និងបញ្ចូលនូវអន្តរាគមន៍គន្លឹះថ្មីៗ ជាពិសេសពង្រឹងសមត្ថភាពមន្ទីរពិសោធន៍ មណ្ឌលបង្ហាញត្រាប់បំពាក់ឧបករណ៍សម្ភារសិក្សាទាន់សម័យ។

ក្នុងពិធីអបអរសាទរទិវាឆ្មបជាតិ អន្តរជាតិ ៥ ឧសភា ២០២៤ ក្រោមប្រធានបទ «ពង្រឹងជំនាញវិជ្ជាជីវៈឆ្មប ដើម្បីលើកកម្ពស់សេវាថែទាំ ព្យាបាល សុខភាពមាតា ទារក និងយុវវ័យ ក្នុងបរិបទនៃការប្រែប្រួលអាកាសធាតុ» និងបំពាក់គ្រឿងឥស្សរិយយសមេដាយជូនដល់ថ្នាក់ដឹកនាំ មន្រ្តីរាជការសុខាភិបាលនៅព្រឹកថ្ងៃទី០២ឧសភា លោករដ្ឋមន្ត្រីបានជំរុញឱ្យ គ្រឹះស្ថានសិក្សាត្រូវស្វែងរកកៀរគរធនធានក្នុងការបណ្តុះបណ្តាលគ្រូ បង្កើនសមត្ថភាពឱ្យបានខ្ពស់ដោយត្រូវមានគុណវុឌ្ឍខ្ពស់ គុណធម៌ ក្រមសីលធម៌ល្អ។ ចំណែកមូលដ្ឋានសុខាភិបាលដែលទទួលនិស្សិតធ្វើកម្មសិក្សាត្រូវផ្តោតការយកចិត្តទុកដាក់ខ្ពស់លើការបង្វឹកជំនាញការអនុវត្តផ្ទាល់របស់និស្សិត ព្រោះថាការបណ្តុះបណ្តាលបន្តក្នុងពេលបំពេញការងាររបស់ឆ្មប ការអភិបាលតាមដានការអនុវត្តការងារមានសារៈសំខាន់ណាស់ហើយត្រូវធ្វើបន្តជាប់ជាប្រចាំ។

លោករដ្ឋមន្ត្រីបានបន្តថា ឆ្មបទាំងអស់ ត្រូវតែចុះបញ្ជីជាមួយគណៈវិជ្ជាជីវៈត្រូវបំពេញគ្រប់លក្ខខណ្ឌដើម្បីទទួលបាន​អាជ្ញាបណ្ណ ក៏ដូចជាបន្តសុពលភាពអាជ្ញាបណ្ណ អនុវត្តការងារឱ្យបានត្រឹមត្រូវ និងត្រូវគោរពឱ្យបាននូវក្រមសីលធ៌មវិជ្ជាជីវៈ។

យ៉ាងណាក៏ដោយក្នុងពេលដែលមានអាកាសធាតុក្តៅខ្លាំងលោករដ្ឋមន្ត្រីសូមអំពាវនាវដល់បងប្អូនទាំងអស់ ត្រូវយកចិត្តទុកដាក់ប្រុងប្រយ័ត្នថែរក្សាសុខភាពផ្ទាល់ខ្លួន និងក្រុមគ្រួសារពិសេសសូមយកចិត្តទុកដាក់ចំពោះស្ត្រីមានផ្ទៃពោះ ទារក កុមារ មនុស្សចាស់ដូចបានជូនតាម«សេចក្តីជូនព័ត៌មានស្តីពីការប្រុងប្រយ័ត្នការពារសុខភាពក្នុងអំឡុងពេលអាកាសធាតុ
ក្តៅ» កាលពីថ្ងៃទី៧ ខែមេសា ឆ្នាំ២០២៤ កន្លងមកនេះ៕

អត្ថបទ៖ សំអឿន