កងទ័ពកម្ពុជា និងចិន ជាង២ពាន់នាក់ ចាប់ផ្តើមធ្វើសមយុទ្ធ«នាគមាស»លើកទី៦ជាផ្លូវការដែលមានរយៈពេល១៥ថ្ងៃ

កងទ័ពកម្ពុជា និងកងទ័ពចិន នៅព្រឹកថ្ងៃទី១៦ ខែឧសភា ឆ្នាំ២០២៤នេះ បានចាប់ផ្តើមធ្វើសមយុទ្ធ«នាគមាស»លើកទី៦ជាផ្លូវការហើយនៅភ្នំជុំសែនរីករាយ ខេត្តកំពង់ឆ្នាំង។ សមយុទ្ធ«នាគមាស»លើកទី៦ ឆ្នាំ២០២៤នេះ ធ្វើឡើងក្រោមប្រធានបទ៖«ប្រតិបត្តិការប្រឆាំងអំពើភេរវកម្មរួមគ្នា និងការសង្រ្គោះមនុស្សធម៌» ហើយមានរយៈពេល១៥ថ្ងៃ ដោយចាប់ពីថ្ងៃទី១៦ ខែឧសភា ដល់ថ្ងៃទី៣០ ខែឧសភា ឆ្នាំ២០២៤។

សមយុទ្ធ«នាគមាស»លើកទី៦ ឆ្នាំ២០២៤ ធ្វើឡើងក្រោមការដឹកនាំបញ្ជា និងត្រួតពិនិត្យដោយលោក វង្ស ពិសេន អគ្គមេបញ្ជាការកងយោធពលខេមរភូមិន្ទ និងលោក កៅ សីវឈីង នាយរងសេនាធិការតំបន់ភូមិភាគខាងត្បូងនៃកងទ័ពរំដោះប្រជាជនចិន។ កងទ័ពដែលចូលរួមធ្វើសមយុទ្ធយោធាលើកនេះ មានចំនួន ២០៧៥​នាក់ ក្នុងនោះ កងយុទ្ធពលខេមរភូមិន្ធចំនួន ១៣១៥នាក់ និងកងទ័ពរំដោះប្រជាជនចិនចំនួន ៧៦០នាក់។

សមយុទ្ធ«នាគមាស»លើកទី៦ ឆ្នាំ២០២៤ មានទ្រង់ទ្រាយធំជាងលើកមុនៗ ដោយធ្វើលំហាត់ហ្វឹកហ្វឹនទាំងនៅដីគោក និងនៅលើផ្ទៃទឹក។ សម្រាប់នៅលើដីគោក គឺធ្វើឡើងនៅក្នុងខេត្តកំពង់ឆ្នាំង ដោយមានគ្រឿងសព្វាវុធសម្រាប់ចូលរួមធ្វើសមយុទ្ធយោធា រួមមាន រថពាសដែក យន្តយុទ្ធគ្រប់ប្រភេទចំនួន ៦៩គ្រឿង រួមទាំងបរិក្ខារស៊ើបការ បរិក្ខារបោសសម្អាតជាតិផ្ទុះ បរិក្ខារបញ្ចូនសារជាច្រើនឈុតទៀត។ រីឯ សមយុទ្ធនៅលើផ្ទៃសមុទ្រវិញ ធ្វើឡើងនៅក្នុងខេត្តព្រះសីហនុ ហើយគ្រឿងសព្វាវុធធ្វើសមយុទ្ធ រួមមាន នាវាយោធាចំនួន១៤គ្រឿង និងឧទ្ធម្ភាគចក្រចំនួន ២គ្រឿង។

បើតាមការបញ្ជាក់ឱ្យដឹងរបស់កងទ័ពកម្ពុជា និងចិន គឺសមយុទ្ធ«នាគមាស»លើកទី៦ ធ្វើឡើងក្នុងគោលបំណង​ផ្លាស់ប្តូរ​បទពិសោធគ្នាទៅវិញទៅមកក្នុងការទប់ស្កាត់ និងបង្រ្កាបអំពើភេរវកម្ម ការប្រឆាំង​ដ្រូនស៊ើបការ​របស់សត្រូវ និងដើម្បីបង្កើនសមត្ថភាពកងទ័ពនៃប្រទេសទាំងពីរឲ្យកាន់​តែល្អប្រសើរបន្ថែមទៀត ក្នុងកិច្ចការពារជាតិ ការពារសន្តិសុខក្នុងតំបន់ និងពិភពលោក ពោល គឺពុំមែន​ធ្វើឡើង ដើម្បីជាការគំរាមកំហែង ​ឬធ្វើឲ្យប៉ះពាល់ដល់អ្នកណា ឬប្រទេសណានោះឡើយ។ ម្យ៉ាងវិញទៀត សមយុទ្ធយោធានេះ គឺដើម្បីអភិវឌ្ឍទំនាក់ទំនងដ៏ល្អរវាងកម្ពុជា និងចិន ឱ្យកាន់តែប្រសើរ និងស៊ីជម្រៅបន្ថែមទៀត ជាពិសេស នៅក្នុងវិស័យយោធា។

សូមជម្រាបជូនថា នេះ គឺជាលើកទី៦ហើយដែលកងទ័ពកម្ពុជា និងចិន រៀបចំធ្វើសមយុទ្ធយោធារួមគ្នាឈ្មោះថា សមយុទ្ធ«នាគមាស»។ សមយុទ្ធយោធានេះ ត្រូវបានរៀបចំធ្វើតាំងពីឆ្នាំ២០១៦មកម្លេះ ប៉ុន្តែ បានខកខានរយៈពេល២ឆ្នាំជាប់ៗគ្នា គឺនៅក្នុងឆ្នាំ​២០២១ និង២០២២​ ដោយសារការឆ្លង​រាតត្បាតនៃជំងឺកូវីដ-​១៩។ នៅឆ្នាំ២០២៣ សមយុទ្ធយោធានេះ ត្រូវបានរៀបចំធ្វើឡើងវិញ ហើយបន្តមកដល់ឆ្នាំ២០២៤នេះ ប៉ុន្តែ អ្វីដែលជាការកត់សម្គាល់ គឺថា នៅលើកនេះ សមយុទ្ធ«នាគមាស» មានលក្ខណៈធំជាងមុន ហើយកងទ័ព និងគ្រឿងសព្វាវុធចូលរួមធ្វើសមយុទ្ធ ក៏មានចំនួនច្រើនជាងមុនផងដែរ៕