សម្តេចធិបតី៖ ការបកស្រាយប្រវត្តិសាស្រ្តគឺជារឿងសំខាន់ ជៀស​វាង​បក​ស្រាយ​ខុស​ ប្រទេសនឹងធ្លាក់ចូលសង្គ្រាម

នាយករដ្ឋមន្រ្តី សម្តេចធិបតី ហ៊ុន ម៉ាណែត បានគូសបញ្ជាក់ជាថ្មីអំពីភាពចាំបាច់ក្នុងការបកស្រាយច្បាស់លាស់ និងឯកភាពលើប្រវត្តិសាស្រ្តរបស់ប្រទេសកម្ពុជាតែមួយ ជាពិសេសទាក់ទងនឹងអំពើប្រល័យពូជសាសន៍ ដើម្បីជៀសវាងការភ័ន្តច្រឡំ និងការបកស្រាយខុស។

នាពិធីបើកសន្និសីទស្តីអំពី “អនាគតកម្ពុជាគ្មានអំពើប្រល័យពូជសាសន៍”  នៅថ្ងៃទី​២០ ​​​​​​​​​​​​ខែឧសភានេះ​​​​​​​​​​​​​​​​​​​​​​​​ សម្តេចធិបតី បានលើកឡើងថា ការបកស្រាយ និងឯកភាព​លើប្រវត្តិ​សាស្រ្ត​តែមួយ​ គឺជាការ​មធ្យោបាយ​មួយ​ដើម្បី​លើក​កម្ពស់​ឯកភាព​ជាតិ ការបង្រួបបង្រួមជាតិ និងបង្កើនការយល់ដឹងជាសាធារណៈ។

សម្តេចធិបតីថ្លែងថា៖«ក្នុងការខិតខំប្រឹងប្រែងកសាងអនាគតកម្ពុជាដោយគ្មានអំពើប្រល័យពូជសាសន៍​ ភាពចាំបាច់នៅកម្ពុជាក្នុងនាមជាប្រជាជាតិមួយត្រូវការឯកភាពលើប្រវត្តិសាស្រ្ត ហើយអនាគតរបស់​ប្រទេស​មួយ គឺពឹងផ្អែកលើឆន្ទៈរបស់ប្រទេសនោះក្នុងការប្រឈមមុខជា​មួយអតីតកាល។ ប៉ុន្តែ​ការធ្វើបែបនេះបានលុះត្រាតែប្រជាជាតិនោះមា​ន​ការឯកភាពគ្នា​ក្នុងការបក​ស្រាយអំពីអតីតកាល និងព្រឹត្តិការសំខាន់ៗដែលទាក់ទងសង្គ្រាម និងសន្តិភាព​របស់ប្រទេស»។

សម្តេចបន្ថែមថា ​សម្រាប់កម្ពុជាប្រវត្តិសាស្រ្តទាក់ទងថ្ងៃរំដោះ ៧ មករា ឆ្នាំ១៩៧៩ ការចុះហត្ថលេខា​លើកិច្ច​ព្រម​​ព្រៀង​ទីក្រុងប៉ារីស ​២៣ ​តុលា ១៩៩១ និងការសម្រេច​បាននូវសន្តិភាពពេញ​ទាំងស្រុង​តាមរយៈ​នយោបាយឈ្នះ ឈ្នះថ្ងៃទី​ ២៩ ធ្នូ ១៩៩៨ ត្រូវតែមានការបកស្រាយតែមួយ ​និងមាន​ភាព​​រឹងមាំ​ដើម្បីជៀសវាងការប្រឌិតរឿងផ្សេងៗ ការកេញចំណេញនយោបាយដោយបំពាន​លើយុត្តិធម៌​របស់ជនរងគ្រោះ​ពីអំពើប្រល័យ​ពូជសាសន៍។ សម្តេចធិបតីសង្កត់ធ្ងន់ថា៖«ដូច្នេះចាំបាត់ដែលត្រូវការឯកភាពគ្នាទៅលើឯកសារបកស្រាយឱ្យបានច្បាស់លាស់ ដើម្បីខ្មែរយើងបានយល់ច្បាស់ និងចាំច្បាស់គ្មានស្រពិចស្រពិលអំពីប្រវត្តិ​សាស្រ្តដ៏ជូរចត់​​មួយនេះ ហើយជៀសវាងកុំឱ្យប្រទេសយើង​ធ្លាក់ចូលក្នុងសង្គ្រាម​ទៀត»។

សម្តេចធិបតី លើកឡើងទៀតថា ៖«ការរំឭកឡើងវិញអំពីអំអើប្រល័យពូជសាសន៍ គឺជាចំ​ណោទ​ដ៏ឈឺចាប់មួយសម្រាប់កម្ពុជា យ៉ាង​ណាក៏ដោយការ​ឈឺចាប់នេះបានដាក់បន្ទុកឱ្យយើងមានការ​ទទួល​ខុសត្រូវក្នុងការការពារសង្គមនិង​មនុស្សជំនាន់ក្រោយ​ពីអំពើប្រល័យពូជសាសន៍​កុំឱ្យសង្គមមានការឈឺចាប់ដោយសារបញ្ហានេះទៀត»៕

អត្ថបទ៖ ឡាយ សាមាន