សម្ដេចធិបតី៖ ស្នូលនៃយុទ្ធសាស្ត្របញ្ចកោណ គឺការពង្រឹងអភិបាលកិច្ច

អញ្ជើញជាអធិបតីបិទវគ្គបណ្តុះបណ្តាលឆ្នាំ២០២៣ និងបើកវគ្គបណ្តុះបណ្តាលឆ្នាំ២០២៤ របស់សាលាភូមិន្ទរដ្ឋបាល នាព្រឹកថ្ងៃទី១០ ខែមិថុនា ឆ្នាំ២០២៤ សម្តេចធិបតី ហ៊ុន ម៉ាណែត បានបញ្ជាក់ថា ស្នូលនៃគោលនយោបាយ នៅក្នុងយុទ្ធសាស្ត្របញ្ចកោណ គឺការពង្រឹងអភិបាលកិច្ច។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានមានប្រសាសន៍ថា ក្នុងនីតិកាលទី៧ ក្នុងដំណាក់កាលទី១ នៃយុទ្ធសាស្ត្របញ្ចកោណ ត្រូវបានរៀបចំ និងដាក់ចេញជាយុទ្ធសាស្ត្រក្នុងការពង្រឹងសមិទ្ធកម្មបន្ថែមរបស់រាជរដ្ឋាភិបាល ក្នុងការបម្រើប្រជាពលរដ្ឋ ដែលក្នុងនោះ ស្នូលនៃគោលនយោបាយ នៃយុទ្ធសាស្ត្របញ្ចកោណ គឺការពង្រឹងអភិបាលកិច្ច ។

សម្ដេចធិបតី គូសបញ្ជាក់ថា ការដាក់ចេញអភិបាលកិច្ចនេះ ពិតជាមានសារសំខាន់ណាស់ ពោលគឺអភិបាលកិច្ច ជាការធានានូវការប្រតិបត្តិរួមគ្នា ប្រកបដោយសង្គតិភាព និងជាប្រទីបមួយសម្រាប់បញ្ជាក់អំពីការទទួលខុសត្រូវ។ សម្ដេចធិបតី បន្តថា ការធ្វើទំនើបកម្មស្ថាប័នឱ្យក្លាយជារដ្ឋបាលសាធារណៈទំនើបប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ គឺតាមរយៈការអនុវត្តសិទ្ធិអំណាចរដ្ឋ ពិសេសការធានានិរន្តរភាព និងដំណើរការតាមរយៈសិទ្ធិអំណាច និងដំណើរការរបស់រដ្ឋបាលសាធារណៈ ដោយយកលើផលប្រយោជន៍ប្រជាជន និងការអភិវឌ្ឍសង្គម សេដ្ឋកិច្ចប្រកបដោយបរិយាបន្ន ភាពធន់ និងចីរភាព។

ដើម្បីសម្រេចតាមគោលការណ៍ប្រកបដោយភាពជោគជ័យ សម្ដេចធិបតី បានសង្កត់ធ្ងន់លើកត្តាសំខាន់ចំនួន២ ដែលត្រូវយកចិត្តទុកដាក់ ទី១) យន្តការ និងប្រព័ន្ធការងារ និងទី២) មនុស្ស។ សម្ដេចធិបតី ថ្លែងថា «ធ្វើអ្វីក៏ដោយមិនថាក្នុងវិស័យឯកជន ឬរដ្ឋ ក្នុងប្រទេសណាទេ កត្តា២នេះ សំខាន់ ត្រូវរៀបចំឱ្យមនុស្សមានសមត្ថភាព និងប្រព័ន្ធការងារច្បាស់លាស់»៕