អាជ្ញាធរខេត្តសៀមរាប ហៅក្រុម MMO ទៅអប់រំ ករណីផលិតវីដេអូប៉ះពាល់សីលធម៌សង្គម

នៅថ្ងៃទី១០ ខែមិថុនា ឆ្នាំ២០២៤ ក្រុមអ្នកផលិតវីដេអូ (MMO) នៅក្នុងខេត្តសៀមរាបមួយក្រុម ត្រូវបានមន្ទីរវប្បធម៌ និងវិចិត្រសិល្បៈខេត្ត និងមន្ត្រីជំនាញនៃខេត្តសៀមរាប ហៅមកអប់រំ និងធ្វើកិច្ចសន្យាបញ្ឈប់សកម្មភាពដែលនាំឱ្យប៉ះពាល់ដល់សីលធម៌ សេចក្តីថ្លៃថ្នូររបស់សង្គមខ្មែរ។

ការកោះហៅនេះ បានធ្វើឡើងបន្ទាប់ពីក្រុម MMO ខាងលើបានថតវីដេអូជាច្រើនឃ្លីប ដែលបង្កប់ន័យអាសអាភាស ប្រើពាក្យសម្តីអសុរោះ រួចបង្ហោះនៅតាមបណ្តាញសង្គមហ្វេសប៊ុក និងយូធូប។

លោក មួន សុភាព ប្រធានមន្ទីរវប្បធម៌ និងវិចិត្រសិល្បៈ ខេត្តសៀមរាប បានឱ្យដឹងថា ការកោះហៅក្រុម ដែលជាអ្នកផលិតវីដេអូមកអប់រំនេះ មិនមែនជាការចាប់ទោសអ្វីនោះទេ បើទោះបីជាវីដេអូដែលបានបង្ហោះនោះបានបង្ហាញនូវរូបភាព និងខ្លឹមសារខុសឆ្គងអសុរោះ និងខ្វះសីលធម៌ក្តី។ ប៉ុន្តែការហៅមកនេះជាការកែតម្រូវដើម្បីឱ្យការផលិតវីដេអូក្រោយៗកាន់តែមានភាពល្អប្រសើរ និងអាចជួយផ្សព្វផ្សាយនូវអ្វីដែលល្អៗរបស់សង្គមខ្មែរ។

លោកប្រធានមន្ទីរ លើកឡើងថា ប្រទេសជាតិមានមរតកវប្បធម៌ដ៏សំបូរបែប ប្រជាពលរដ្ឋមានប្រពៃណីល្អផូរផង់ មានសីលធម៌ល្អក្នុងការប្រាស្រ័យទាក់ទងគ្នាក្នុងសង្គម ទាំងអស់នេះសុទ្ធតែជាចំណុចល្អៗដែលគួរខិតខំផ្សព្វផ្សាយ។ លោកថា «យើងអាចរកចំណូលបានមួយផ្នែក តែយើងក៏បានផ្តល់ការផ្សព្វផ្សាយនូវអ្វីៗដែលល្អទាំងអស់នោះផងដែរ»។

រីឯ តំណាងក្រុមអ្នកផលិតវីដេអូ បានអរគុណចំពោះថ្នាក់ដឹកនាំមន្ទីរអង្គភាព ស្ថាប័នពាក់ព័ន្ធដែលបានផ្តល់ឱកាសឱ្យពួកខ្លួនបានកែប្រែនូវចំណុចឆ្គាំឆ្គងនានា។ លោកថា ការពិតវីដេអូរបស់ក្រុមខ្លួន គ្មានបំណងណាមួយញុះញង់ បង្ហាញភាពអាសអាភាស បង្ហាញភាពអសីលធម៌អ្វីទេ ពោលគឺក្រុមខ្លួនផលិតវីដេអូបែបអប់រំជារឿងភាគ ប៉ុន្តែដោយសារសាច់រឿងត្រូវបានកាត់ខ្លីៗទើបបង្កឱ្យមានការខុសឆ្គងបែបនេះ។

តំណាងក្រុមអ្នកផលិតវីដេអូ បានធ្វើការសុំទោសចំពោះប្រជាពលរដ្ឋ និងថ្នាក់ដឹកនាំនូវរាល់កំហុសឆ្គងកន្លងមក និងសន្យាកែប្រែនូវចំណុចខុសឆ្គងទាំងអស់ទាំងខ្លឹមសារពាក្យពេចន៍ និងរូបភាព ផងដែរ៕

ដោយ៖ជុន កុសល