អាជ្ញាធរកោះកុង បំផុសស្មារតីចូលបរិច្ចាថវិកាជូន​មន្ទីរពេទ្យគន្ធបុប្ផា

អាជ្ញាធរខេត្តកោះកុង បានបន្តអំពាវនាវ និងបំផុសស្មារតីដល់មន្រ្តីរាជការ កងកម្លាំង និងប្រជាពលរដ្ឋទូទាំងខេត្ត ចូលរួមបរិច្ចាថវិការបស់ខ្លួនទៅតាមលទ្ធភាព ដើម្បីទ្រទ្រង់​​ មន្ទីរពេទ្យគន្ធបុប្ផាកម្ពុជា ឱ្យមាននិរន្តរភាពទៅអនាគត។

លោក ឈេង សុវណ្ណដា អភិបាលរងខេត្តម្នាក់នៃខេត្តកោះកុង តំណាង លោកស្រី មិថុនា ភូថង អភិបាលខេត្ត បានឱ្យដឹងរសៀល ថ្ងៃទី១៩ ខែមិថុនា ឆ្នាំ២០២៤ ថា គោលបំណងរបស់អាជ្ញាធរខេត្ត គឺចង់ឃើញការចូលរួមជាសាមគ្គីភាពរបស់មន្រ្តីរាជការ កងកម្លាំងប្រដាប់ ក៏ដូចជាប្រជាពលរដ្ឋស្មោះចិត្តបរិច្ចាថវិកាពី ១ ម៉ឺនរៀល ឬទៅតាមលទ្ធភាពរបស់ពួកគាត់ ចូលមន្ទីរពេទ្យគន្ធបុប្ផាកម្ពុជា។

លោកអភិបាលរងខេត្ត ចាត់ទុកថា ថវិកាទៅតាកម្លាំងលទ្ធភាពរបស់មន្រ្តីរាជការ កងកម្លាំងប្រដាប់ និងប្រជាពលរដ្ឋ ជាមហាសាមគ្គីដ៏ថ្លៃថ្លាមួយរបស់ប្រជាជាតិកម្ពុជា ហើយអត្ថប្រយោជន៍ធំធេងណាស់សម្រាប់គាំទ្រដល់ក្រុមគ្រូពេទ្យកំពុងជួយសង្រ្គោះព្យាបាលកុមារ ឬទារក្នុងមន្ទីរពេទ្យគន្ធបុប្ផាកម្ពុជាសព្វថ្ងៃនេះ។

តាមការសន្និដ្ឋានរបស់ លោក ឈេង សុវណ្ណ មើលឃើញថា ល្បឿននៃការចូលរួមយុទ្ធនាមូលនិធិគន្ធបុប្ផា មានសប្បុរសជនគ្រប់ទិសទីចូលរួមយ៉ាងសកម្ម មិនថាថវិកាទាំងនោះតិចក្តី ឬច្រើនក្តី សុទ្ធតែក្នុងន័យមនុស្សធម៌។

ក្នុងសន្និសីទសារព័ត៌មាន ព្រឹកថ្ងៃទី១៩ ខែមិថុនា នេះដែរ លោក ឃាន តួក អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិគាំពារសង្គម និងជាប្រធានផ្នែកទំនាក់ទំនងសាធារណៈ នៃមូលនិធិគន្ធបុប្ផាកម្ពុជា បានថ្លែងថា គិតត្រឹមព្រឹកថ្ងៃនេះ មានសប្បុរសជនសរុបចំនួនប្រមាណ ១៦ ម៉ឺន ៤ ពាន់នាក់ បានចូលរួមបរិច្ចាគក្នុងយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៤ នេះ ដោយទទួលបានថិកាបរិច្ចាគសរុបសមមូលជាប្រាក់ដុល្លារអាម៉រិកចំនួនប្រមាណ ២ លាន ៧៣ ម៉ឺនដុល្លារ។

ក្រៅពីចូលរួមបរិច្ចាគ សប្បុរសជនមួយចំនួនក៏បានចូលរួមផ្សព្វផ្សាយបន្ត ទាំងក្នុងលក្ខណៈជាបុគ្គលផ្ទាល់ និងតំណាងអង្គភាពនីមួយៗ។ ការផ្សព្វផ្សាយពីយុទ្ធនាការនេះ ក៏មានការចូលរួមយ៉ាងសកម្មពីសំណាក់អង្គភាពសារព័ត៌មានានា ក្រុមហ៊ុន-សហគ្រាស ធនាគារដៃគូរបស់មូលនិធិ បុគ្គលមានប្រជាប្រិយ និងតារាសម្ដែងផងដែរ៕

អត្តបទ៖ សិរីវឌ្ឍនៈ