សម្តេចតេជោ អំពាវនាវឱ្យទូងស្គរ និងបាញ់កាំជ្រួច ពេលបើកការដ្ឋានព្រែកជីកហ្វូណនតេជោ

ក្នុងស្មារតីសាមគ្គីភាពជាតិខ្មែរ សម្តេចតេជោ ហ៊ុន សែន ប្រធានព្រឹទ្ធសភា បានអំពាវនាវឱ្យរាជរដ្ឋាភិបាលកម្ពុជារៀបចំការបាញ់កាំជ្រួច ក៏ដូចជាគ្រប់វត្តអារាម បញ្ចេញសកម្មភាពទូងស្គរ នៅពេលបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី ៥ ខែសីហា ឆ្នាំ ២០២៤ ខាងមុខនេះ ដើម្បីបង្ហាញពីការគាំទ្រ និងចលនាបង្រួបបង្រួមជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លៀតក្នុងឱកាស នាពិធីអបអរសាទរខួបទី៧៣ នៃការបង្កើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២៤) សម្តេចតេជោ ហ៊ុន សែន បានថ្លែងអំណរគុណចំពោះបងប្អូនជនរួមជាតិនៅគ្រប់ទិសទីដែលបានគាំទ្រពេញ​ទំហឹងដល់គម្រោងអភិវឌ្ឍន៍ព្រែកជីកហ្វូណនតេជោ ដែលនឹងត្រូវបើកការដ្ឋានស្ថាបនានៅក្នុងពេលដ៏ខ្លីខាងមុខនេះ។ សម្តេចបញ្ជាក់ថា នេះជាចលនាជាតិដ៏ខ្លាំងក្លាមួយទៀតរបស់ប្រជាជនទាំងមូល ដូចទៅនឹងចលនាជាតិការពារអធិបតេយ្យ បូរណភាពទឹកដី និងចលនាជាតិការពារខឿនសុខភាពប្រជាជននាពេលកន្លងមក។

សម្តេចមានប្រសាសន៍ថា៖«ខ្ញុំស្នើចំពោះរាជរដ្ឋាភិបាល នៅថ្ងៃទី០៥ ខែសីហា​ ខាងមុខ នៅពេលបើកការដ្ឋាននេះសូមអំពាវនាវឱ្យគ្រប់វត្តអារាម និងកន្លែងផ្សេងៗ ទូងស្គរ និងធ្វើអ្វីៗគ្រប់បែបយ៉ាងរហូតដល់បាញ់កាំជ្រួចឡើងលើមេឃ។ ហើយយប់ថ្ងៃទី០៥ ខែសីហា ក៏ត្រូវបាញ់កាំជ្រួយបន្ថែមទៀត នៅទីកន្លែងដែលអាចធ្វើទៅបាន ដើម្បីបង្ហាញពីការគាំទ្រ និងលើកទឹកចិត្ដសម្រេចការអនុវត្ដនូវគម្រោងនេះ»។

សម្តេចតេជោ បានគូសរំលេចទៀតថា គម្រោងព្រែកជីក-ហ្វូណនតេជោ គឺជាគំនិតផ្តួចផ្តើមកើតចេញពីមនសិការ និងឆន្ទៈរបស់កម្ពុជាសុទ្ធសាធ ដែលនឹងផ្តល់ផលចំណេញយ៉ាងធំដល់កម្ពុជា ដូចជាការចំណេញចម្ងាយផ្លូវដឹកជញ្ជូន, ចំណេញខាងការប្រកួតប្រជែងតម្លៃ, បង្កើនប្រព័ន្ធស្រោចស្រព និងការរំដោះទឹកជំនន់, ជួយពង្រីកការដាំដុះនៅភាគនិរតី ទទួលបានផលនេសាទ និងពីវារីវប្បកម្ម ព្រមទាំងជំរុញដល់វិស័យ ទេសចរណ៍ផងដែរ។
ជាមួយគ្នានេះ ព្រែកជីកហ្វូណនតេជោ នឹងជួយឱ្យកម្ពុជាពង្រឹងនូវឯករាជ្យភាពខាងនយោបាយលើការដឹកជញ្ជូនតាមផ្លូវទឹក ហើយព្រែកជីកនេះ នឹងមិនបង្កផលប៉ះ ពាល់ដល់បរិស្ថាន និងរំហូរទឹកទន្លេមេគង្គឡើយ។

សម្តេចបន្តថា៖«គម្រោងនេះវានឹងបង្កើតឱកាស សម្រាប់រាប់រយរាប់ រាប់ពាន់ រាប់ម៉ឺនឆ្នាំ សម្រាប់កម្ពុជា ដើម្បីធានាថាកម្ពុជាអាចមានផ្លូវដឹកជញ្ជូនទៅកាន់សមុទ្រដោយខ្លួនឯង ដោយមិនចាំបាច់ឆ្លងកាត់ប្រទេសដទៃ»។
សម្តេចមានជំនឿ​យ៉ាងមុតមាំថា ព្រែកជីកនេះ នឹងក្លាយទៅជាប្រព័ន្ធអេកូឡូស៊ីមួយដ៏ធំសម្រាប់ទិសនិរតីនៅកម្ពុជា ដែលវាជួយបំពេញបន្ថែមទៅឱ្យការទប់ស្កាត់ និងរួមចំណែកការប្រែប្រួលអាកាសធាតុ ហើយបង្កើតនូវស្ថានភាពបៃតងគ្រប់រដូវកាលនៅទិសនិរតីរបស់កម្ពុជា។

គួរជម្រាបថា បើទោះបីជាគម្រោងព្រែកជីកប្រត្តិសាស្រ្តមួយនេះមានភាពចម្រូងចម្រាស ហើយវៀតណាមដែលជាប្រទេសជិតខាង ធ្វើផ្គរធ្វើភ្លៀងរិះគន់គម្រោងនេះថាប៉ះពាល់បរិស្ថានក្តី ប៉ុន្តែរាជរដ្ឋាភិបាលកម្ពុជា បានអះអាងថា គម្រោងនេះមានការសិក្សាយ៉ាងល្អិតល្អន់ពីអ្នកជំនាញអន្តរជាតិជាច្រើនរូប។ បន្ថែមពីនេះ ប្រជាជនខ្មែរច្រើនលើសលុប បានគាំទ្រលើគម្រោងនេះ នឹងជំរុញឱ្យរាជរដ្ឋាភិបាលប្រញាប់ប្រញាល់បើកការដ្ឋានសាងសង់ឱ្យបានលឿន។

គម្រោងព្រែកជីកហ្វូណនតេជោ គឺមានប្រវែងសរុប១៨០គីឡូម៉ែត្រ តភ្ជាប់ពីទន្លេមេគង្គទៅកាន់សមុទ្រ ពោលគឺចាប់ពីព្រែកតាកែវ ឆ្លងកាត់ព្រែកតាឯក ចូលតាមព្រែកតាហ៊ីង និងបន្តរហូតដល់សមុទ្រខេត្តកែប។ ព្រែកជីកនេះ សាងសង់ឡើងតាមដានព្រែកចាស់ដែលធ្លាប់ជីកាលពីអតីតកាល ឆ្លងកាត់ខេត្តចំនួន៤ គឺខេត្តកណ្ដាល ខេត្តតាកែវ ខេត្តកំពត ខេត្តកែប។

គម្រោងព្រែកជីកហ្វូណនតេជោ ត្រូវបានប្រគល់សិទ្ធិវិនិយោគដោយក្រុមហ៊ុនខ្មែរចំនួន៥១% ដែលក្នុងនោះ ក្រុមហ៊ុនរដ្ឋចំនួន២ នឹងកាន់កាប់ភាគច្រើនលើគម្រោងព្រែកជីកជាប្រវត្តិសាស្រ្តនេះ៕

អត្ថបទ៖ ឡាយ សាមាន