អភិបាលខេត្តតាកែវថ្មី ប្ដេជ្ញាកៀរគរអ្នកវិនិយោគ ដើម្បីអភិវឌ្ឍន៍ខេត្តឱ្យកាន់តែរីកចម្រើន

លោក វ៉ី សំណាង ត្រូវបានប្រកាសចូលកាន់តំណែងជា អភិបាលខេត្តតាកែវ នារសៀលថ្ងៃទី១ ខែកក្កដា ឆ្នាំ២០២៤ ក្រោមអធិបតីភាព លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ លោកអភិបាលខេត្ត ថ្មីរូបនេះ បានប្ដេជ្ញាកៀរគរអ្នកវិនិយោគ ដើម្បីអភិវឌ្ឍន៍ខេត្តឱ្យកាន់តែមានភាពរីកចម្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការកត់សម្គាល់ លោក វ៉ី សំណាង ជាអភិបាលខេត្តមួយរូប ដែលតែងតែខិតខំកៀរគរអ្នកវិនិយោគ ឱ្យមកវិនិយោគនៅក្នុងមូលដ្ឋានខេត្តកំពង់ស្ពឺ កាលលោកនៅជាអភិបាលខេត្តកំពង់ស្ពឺ។ តាមព្រះរាក្រឹត្យរបស់ព្រះមហាក្សត្របានសម្រេចផ្ទេរ​ និងតែងតាំង លោក វ៉ី សំណាង អតីអភិបាលខេត្តកំពង់ស្ពឺ មកកាន់តំណែងជាអភិបាលខេត្តតាកែវ ជំនួស លោក អ៊ួច ភា ដែលត្រូវតែងតាំងជារដ្ឋលេខាធិការ ក្រសួងមហាផ្ទៃ។

ក្នុងពិធីប្រកាសចូលកាន់ណែង លោក វ៉ី សំណាង អភិបាលខេត្តតាកែវ ថ្មី បានប្ដេជ្ញាចិត្ត បន្តកៀរគរអ្នកវិនិយោគមកអភិវឌ្ឍន៍ខេត្តតាកែវឱ្យកាន់តែរីកចម្រើន ដែលជាផ្នែកមួយនៃការចូលរួមរុញកំណើនសេដ្ឋកិច្ចជាតិ និងនិយាយដោយឡែក គឺជីវភាពប្រជាពលរដ្ឋនៅក្នុងខេត្តឱ្យមានភាពល្អប្រសើរ។

ទន្ទឹមនេះ លោក វ៉ី សំណាង ក៏បានជំរុញការផ្តល់សេវាសាធារណៈឱ្យមានប្រសិទ្ធភាព និង គោលនយោបាយភូមិ ឃុំ សង្កាត់មានសុវត្ថិភាព ការប្រយុទ្ធប្រឆាំងគ្រឿងញៀន កាត់បន្ថយគ្រោះថ្នាកក់ចរាចរណ៍ ការងារសប្បុរសធម៌ កសាងរៀបចំហេដ្ឋារចនាសម្ព័ន្ធខេត្ត និងការគោរពច្បាប់ លិខិតបទដ្ឋានគតិយុត្តរបស់រាជរដ្ឋាភិបាល និងគោរពរដ្ឋធម្មនុញ្ញ ជាតិ សាសនា និងព្រះមហាក្សត្រ៕