ក្រសួងមហាផ្ទៃ បង្កើតក្រុមការងារត្រួតពិនិត្យអនុវត្តគម្រោងមូលនិធិឃុំ ក្រោយមានភាពមិនប្រក្រតី

ក្រសួងមហាផ្ទៃ នៅថ្ងៃទី ២៦ ខែកក្កដា ឆ្នាំ ២០២៤ បានសម្រេចបង្កើតក្រុមការងារតាមដាន ត្រួតពិនិត្យ និងវាយតម្លៃលើការរៀបចំ និងការអនុវត្តគម្រោងមូលនិធិឃុំ សង្កាត់ ក្នុងក្របខណ្ឌទូទាំងប្រទេស ដើម្បីពង្រឹងប្រសិទ្ធភាពរាល់ការដេញថ្លៃគម្រោងនានា។

ការបង្កើតក្រុមការងារនេះ បន្ទាប់ពីក្រសួងមហាផ្ទៃ បានពិនិត្យ និងសង្កេតឃើញថា មានភាពមិនប្រក្រតីកំពុងកើតមានឡើង គួរឱ្យកត់សម្គាល់ពាក់ព័ន្ធនឹងការអនុវត្តគម្រោងមូលនិធិឃុំ សង្កាត់ ដែលបណ្តាលមកពីការមិនយកចិត្តទុកដាក់ និងភាពទន់ខ្សោយនៃការគ្រប់គ្រង ចាត់ចែងក្នុងកិច្ចដំណើរការអនុវត្តគម្រោងមិនបានត្រឹមត្រូវតាមគោលការណ៍ណែនាំ បែបបទ និងនីតិវិធីនានាដែលបានកំណត់ក្នុងច្បាប់ និងលិខិតបទដ្ឋានគតិយុត្តជាធរមាន។

ក្នុងន័យនេះ ឃុំ សង្កាត់ នៅតាមបណ្តារាជធានី ខេត្ត មួយចំនួនបានបើកការដ្ឋានសាងសង់ផ្លូវ ឬចាត់ចែងគម្រោងដោយពុំទាន់បានដេញថ្លៃគម្រោង ឬប្រកាសជាសាធារណៈឡើយ ដែលប្រការនេះធ្វើឱ្យប៉ះពាល់ដល់គុណភាពហេដ្ឋា​រចនា​សម្ព័ន្ធ និងថវិកាជាតិ។
បើតាមសេចក្តីសម្រេចចុះហត្ថលេខាដោយ រដ្ឋមន្រ្តីក្រសួងមហាផ្ទៃលោក ស សុខា នៅថ្ងៃទី​២៦ ខែកក្កដា ឆ្នាំ ២០២៤ ក្រុមការងារនេះ ត្រូវធ្វើជាសេនាធិការជូនរដ្ឋមន្ត្រី ក្នុងការតាមដាន ត្រួតពិនិត្យ និងវាយតម្លៃលើការរៀបចំ និងអនុវត្ត គម្រោងមូលនិធិឃុំ សង្កាត់ ដើម្បីលើកកម្ពស់គុណភាព ប្រសិទ្ធភាព តម្លាភាព និងគណនេយ្យភាព។
សេចក្តីសម្រេចបានសង្កត់ធ្ងន់ថា៖«ក្រុមការងារ ត្រូវតាមដានត្រួតពិនិត្យនិងវាយតម្លៃលើការចាត់វិធានការរបស់រដ្ឋបាលរាជធានី ខេត្ត ចំពោះអ្នកដែលអនុវត្តមិនស្របតាមកិច្ចសន្យា ឬមិនស្របតាមសៀវភៅណែនាំស្តីពីការអនុវត្តគម្រោងមូលនិធិ ឃុំ សង្កាត់»។

ក្រុមការងារនេះ មានសមាសភាព ១៥ រូប​ ក្នុងនោះ លោក សួស ប្រាថ្នា អគ្គនាយករដ្ឋបាលក្រសួងមហាផ្ទៃ​ ជាប្រធាន លោក ជា ប៊ុនហេង អគ្គនាយករង និងលោក រស់ រតនៈ អគ្គាធិការរង ជាអនុប្រធាន  ក្រៅពីនេះ គឺជាសមាជិកសម្រាប់តាមដានគម្រោងមូលនិធិឃុំ សង្កាត់។
កាលពីខែកក្កដា កន្លងទៅ លោក ស សុខា​ បានបញ្ជាឱ្យគណៈអភិបាលរាជធានី ខេត្ត ចាត់វិធានការឱ្យ បានម៉ឺងម៉ាត់បំផុត ចំពោះមន្ត្រីរាជការ សមាជិកក្រុមប្រឹក្សា ស្មៀនឃុំ សង្កាត់ អ្នកទទួលការទាំងឡាយណា ដែលបានប្រព្រឹត្តកំហុសឆ្គង បំពានក្រមសីលធម៌វិជ្ជាជីវៈ ដោយមិនបានអនុវត្តតាមតួនាទី ភារកិច្ចរបស់ខ្លួន ឬ មានការពាក់ព័ន្ធទៅនឹងភាពមិនប្រក្រតី ការក្លែងបន្លំ ការបង្ខិតបង្ខំ ឬការប្រព្រឹត្តអំពើពុករលួយ ផ្សេងៗក្នុងការដេញថ្លៃគម្រោងមូលនិធិឃុំ សង្កាត់៕