ព័ត៌មានជាតិ

អាជ្ញាធរសង្កាត់ចោមចៅទី ៣ ដាក់គ្រឿងចក្រកាយយកស្មៅចេញពីប្រឡាយមួយខ្សែ បញ្ចៀសការស្ទះចរន្តទឹក

បានផុស

២ years មុន

នៅ

ថ្ងៃអង្គារ ២៧ សីហា ២០២៤

ដោយ

ដោយសារតែឃើញថាប្រឡាយបង្ហូរទឹកមួយខ្សែមានស្មៅ ចក ដុះពាសពេញក្នុងប្រឡាយ ធ្វើឲ្យចរន្តទឹកមិនហូរ ស្ទះចរន្តទឹក ងាយរងគ្រោះដោយសារទឹកជំនន់ពេលភ្លៀងធ្លាក់មកម្តងៗ ទើបអាជ្ញាធរចុះពិនិត្យ និងដាក់គ្រឿងចក្រកាយស្តារយកស្មៅចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅរសៀលថ្ងៃទី ២៧ ខែសីហា ឆ្នាំ ២០២៤ នេះ លោក វ៉ា សាវឿន ចៅសង្កាត់ចោមចៅទី ៣ បានដឹកនាំក្រុមការងារចុះពិនិត្យកាយស្តារប្រឡាយមួយខ្សែ ដើម្បីបញ្ចៀសការជន់លិច សម្រួលនូវចរន្តទឹកហូរក្នុងភូមិសាស្ត្រ ភូមិអង្គ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

លោក វ៉ា សាវឿន ចៅសង្កាត់ចោមចៅទី ៣ បានប្រាប់ឲ្យដឹងថា ការកាយយកស្មៅ និងចក ចេញពីប្រឡាយខាងលើ ដោយឃើញថា ពេលមេឃធ្លាក់ភ្លៀងមកម្តងៗ ទឹកមិនអាចហូរចេញពីក្នុងភូមិ ចូលទៅប្រឡាយធំដែលជាប់ជាមួយផ្លូវរថភ្លើងបាន ធ្វើឲ្យជន់លិចចូលផ្ទះប្រជាពលរដ្ឋ ទើបលោកចុះពិនិត្យជាក់ស្ដែង និងដាក់គ្រឿងចក្រកាយយកស្មៅចេញពីប្រឡាយ ដើម្បីចរន្តទឹកហូរលឿនទាន់ពេលវេលាបញ្ចៀសការជន់លិច។ លោកបញ្ជាក់ថា ប្រឡាយខាងលើមានប្រវែង ៣០០ ម៉ែត្រ។

ជាមួយគ្នានេះដែរ លោក វ៉ា សាវឿន ចៅសង្កាត់ចោមចៅទី ៣ ក៏បានសំណូមពរដល់ប្រជាពលរដ្ឋទាំងអស់ ក្នុងភូមិអង្គ មេត្តាវេចខ្ចប់ទុកដាក់សំរាមឲ្យបានត្រឹមត្រូវ កុំបោះចោល ខ្លាចសំរាមទាំងនោះធ្លាក់ ឬ ហើរចូលប្រឡាយ និងមាត់លូ បង្កការស្ទះនូវចរន្តទឹកហូរ៕

អត្ថបទ ៖ សុខា