ការជម្លៀសប្រជាជនដែលរងផលប៉ះពាល់នៅខេត្តក្រចេះ មានតិចតួច ខណៈកម្ពស់ទឹកឡើងជិតដល់កម្រិតប្រកាសឱ្យប្រុងប្រយ័ត្ន

លោក វ៉ា ថន អភិបាលខេត្តក្រចេះ និងក្រុមការងារ នៅព្រឹកថ្ងៃទី ២១ ខែកញ្ញា ឆ្នាំ ២០២៤ បានចុះពិនិត្យវាយតម្លៃជាក់ស្ដែងពីផលប៉ះពាល់ខ្នងផ្ទះ និងផ្ទៃដីកសិកម្ម ស្ថិតក្នុងឃុំបុសលាវ ស្រុកចិត្របុរី និងសង្កាត់រកាកណ្ដាល ក្រុងក្រចេះ។

លោក វ៉ា ថន បានឲ្យដឹងថា ក្រុមការងារនឹងវាយតម្លៃបូកសរុបផលប៉ះពាល់ ដើម្បីស្នើសុំស្រូវពូជចែកជូនបងប្អូនប្រជាពលរដ្ឋដែលមានលទ្ធភាពស្ដារឡើងវិញបានឲ្យទាន់ពេលវេលា ទោះបីជាស្ថិតក្នុងពេលកាន់បិណ្ឌភ្ជុំបិណ្ឌក៏ដោយ។

លោក ក៏បានបញ្ជាក់ឲ្យដឹងដែរថា ស្ថានភាពកម្ពស់ទឹកទន្លេមេគង្គក្រចេះ ជិត ២១ម៉ែត្រ ខណៈដែលប្រកាសអាសន្ននៅកម្រឹតកម្ពស់ទឹក ២២ម៉ែត្រ ប៉ុន្តែបើមើលតាមស្ថានភាពទឹកក្នុងទន្លេជាក់ស្ដែង គឺមិនទាន់ទឹកធំទេ អ្វីដែលធ្ងន់ធ្ងរនោះ គឺមេឃបន្តមានភ្លៀងធ្លាក់ជ្រុំ ៤ ទៅ ៥ ថ្ងៃហើយ ធ្វើឲ្យលិចនៅផ្ទៃ បឹង ស្រែ ដែលនៅជុំវិញដងទន្លេមេគង្គ និងវាលទំនាបមួយចំនួន តំបន់ខ្លះលិចអស់ ៤ថ្ងៃ និងខ្លះទៀត ៥ថ្ងៃក៏មានដែរ។

លោក វ៉ា ថន បញ្ជាក់ថា៖ «បើទឹកបន្តហក់ឡើងទៀត ទឹកដែលមានក្នុងបឹង ស្រែ ស្រាប់នោះ នឹងកើនឡើងកាន់តែខ្លាំង ព្រោះទឹកភ្លៀងកាន់តែកើនឡើង ចឹងហានិភ័យច្បាស់ជាមាន»។

ដោយឡែក ប្រជាជននៅមិនទាន់មានហានិភ័យធំទេ ដោយសារ ទី ១ ខេត្តបានកសាងផ្លូវតាមគ្រោងរាជរដ្ឋាភិបាល គឺ ផ្លូវសង់ខ្ពស់ នៅតំបន់ទឹកលិច។ ម្យ៉ាងវិញទៀត គិតមកដល់ពេលនេះ ការជម្លៀសមនុស្ស សត្វ មានចំនួនតិចតួចនៅ​ឡើយ៕

អត្ថបទ៖ ប្រុញ វិធិន