ច្រកត្រពាំងស្រែ ប្រមូលពន្ធអាករបាន​ជាង ១៤៣,៥៥៧ លានរៀល នៅ​ឆ្នាំ ២០២៤

យោងតាមរបាយការណ៍ប្រចាំឆ្នាំ២០២៤ របស់ទីស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងស្រែ​ក្នុង​ខេត្តក្រចេះ គិតពីថ្ងៃទី២១ ខែវិច្ឆិកា ឆ្នាំ២០២៣ ដល់ថ្ងៃទី១៥ ខែធ្នូ ឆ្នាំ២០២៤ ការិយាល័យគយ និងរដ្ឋាករត្រពាំងស្រែ បានអនុវត្តប្រមូលពន្ធ អាករ និងកម្រៃផ្សេងៗបានចំនួន ១៤៣,៥៥៧,៣៧៥,៥០០ រៀល (មួយរយសែសិបបីពាន់ ប្រាំរយហាសិបប្រាំពីរលាន បីរយចិតសិបប្រាំពាន់ប្រាំរយរៀល)។

ចំណូលក្នុងឆ្នាំ២០២៤ មានការកើនឡើងចំនួន ៤៨ ០៥២ ៦៥៩ ៥០០រៀល បើធៀបឆ្នាំ២០២៣ មានចំនួន ៩៥ ៥០៤ ៧១៦ ០០០ រៀល។ ក្នុងនោះ ចំណូលសំខាន់ៗរួមមាន៖ គ្រឿងសំណង់ គ្រឿងអេឡិចត្រូនិច គ្រឿងឧបភោគបរិភោគ ផលិតផលវាយនភ័ណ្ឌ(ថ្មី) ផលិតផលតេសសិលាផ្សេងទៀត គ្រឿងបន្លាស់រថយន្តគ្រឿងចក្រផ្សេងៗ ប្រេងរំអិល ក្រណាត់ ភេសជ្ជៈ ស្រាចំរុះ ម៉ាស៊ីនភ្លើង កង់អគ្គីសនី បារី បន្លែ ផ្លែឈើ និងទំនិញចម្រុះ។

ប្រភេទទំនិញនាំចេញរួមមាន៖ ដំឡូងមី ម្សៅមី ចេក ស្ករ ល្ងរ ម្រេច គ្រាប់ស្វាយចន្ទី ដំណាប់ស្វាយ កៅស៊ូ ជី ធ្យូង អង្កាម និងថ្មក្រានីត។ ដោយឡែក ប្រភេទចំណូលពន្ធនាំចេញនាំចូល និងកំរៃផ្សេងៗ ក្នុងនោះ ទំនិញចម្រុះ បានចំនួន ១១៦ ៦៣៦ ៧៧២ ៨០០ រៀល យានយន្ត គ្រឿងចក្រ បានចំនួន ១ ៣៦៨ ០៤១ ៥០០ រៀល ផលិតផលតេលសិលា បានចំនួន ៨ ៤១០ ៦៥៣ ៨០០ រៀល និងគ្រឿងសំណង់ ចានចំនួន ១៧ ១៤១ ៥០៧ ៤០០ រៀល សរុបចំណូលពន្ធរួមចំនួន ១៤៣ ៥៥៧ ៣៧៥ ៥០០ រៀល។

ដោយឡែក ចំពោះទំនិញពន្ធ និងអាករជាបន្ទុករដ្ឋ៖ ប្រាក់ពន្ធ និងអាករជាបន្ទុករដ្ឋ សរុបបានចំនួន ២៨ ៦៧០ ៩១៤ ៤០០ រៀល ថយចុះចំនួន ២ ៥៧៧ ៣៤៨ ៩០០ រៀល បើធៀបនឹងប្រចាំឆ្នាំ២០២៣ មានចំនួន ៣១ ២៤៨ ២៦៣ ៣០០ រៀល៕

អត្ថបទ៖ ប្រុញ វិធិន