ឯកឧត្តម ហ៊ុន ម៉ានី កំពុងធ្វើយុទ្ធសាស្ត្រកំណែទម្រង់រដ្ឋបាលសាធារណៈប្រកបដោយប្រសិទ្ធភាព

គណៈកម្មាធិការជាតិជំរុញការអនុវត្ដវិធានការគន្លឹះ ក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាលនីតិកាលទី៧ នៃរដ្ឋសភា (គ.វ.រ.) កាលពីថ្ងៃទី ១៦​ ខែមករា ឆ្នាំ ២០២៥ បានបើកកិច្ចប្រជុំលើកទី ៣ របស់ខ្លួន ដើម្បីតាមដាន ពិនិត្យ និងធ្វើវឌ្ឍនភាពការងារកែទម្រង់រដ្ឋបាលសាធារណៈនៅតាមក្រសួង និងស្ថាប័ននីមួយៗ ដូចជាការកែលម្អប្រព័ន្ធជ្រើសរើសមន្ត្រីចូលបម្រើការងារ និងការពង្រឹងសមត្ថភាពមន្រ្តី។

កិច្ចប្រជុំនេះ ដឹកនាំដោយឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃ គ.វ.រ. តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន​ ម៉ាណែត​ នាយករដ្ឋមន្ត្រី នៃព្រះរាជាណាចក្រកម្ពុជា​ ជាប្រធាន គ.វ.រ. ដោយមានភាគីពាក់ព័ន្ធចូលរួមប្រមាណ ៦០រូប។

កិច្ចប្រជុំនេះ រៀបចំឡើងដើម្បីពិនិត្យអំពីលទ្ធផលដែលក្រសួង ស្ថាប័ន សមាជិក នៃ គ.វ.រ. សម្រេចបានកន្លងមក ចេញពីការរួមសហការគ្នាជាមួយគ្នា ព្រមទាំងពិនិត្យ និងពិភាក្សាលើឯកសារសេចក្តីព្រាងជុំវិញការអនុវត្តវិធានការគន្លឹះទី២ ជាពិសេសការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន។

ឯកឧត្តម ហ៊ុ​ន ម៉ានី ធ្លាប់មានប្រសាសន៍ថា ការពិនិត្យឡើងវិញ និងការវិភាគមុខងារ និងរចនាសម្ព័ន្ធ មិនមែនជាយន្តការវះកាត់ ឬធ្វើឱ្យប៉ះពាល់ដល់ផលប្រយោជន៍របស់មន្ត្រីដែលមានចែងដោយច្បាប់នោះទេ ប៉ុន្តែជាផ្នែកមួយដ៏សំខាន់នៃការកែទម្រង់រដ្ឋបាលសាធារណៈឱ្យកាន់តែល្អប្រសើរ និងមានប្រសិទ្ធភាព។

រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា លោក ជា សុមេធី បានលើកឡើងថា ក្នុងនាមជាសមាជិកក្នុងគណៈកម្មាធិការនេះ ក្រសួងបាននឹងកំពុងចូលរួម ក្នុងការកែលម្អការបំពេញមុខងារ តួនាទី របៀបរបបការងារ សំដៅលើកកម្ពស់គណនេយ្យភាព តម្លាភាព ប្រសិទ្ធភាព នៃការផ្តល់សេវាសង្គមកិច្ចជូនជនរងគ្រោះ និងងាយរងគ្រោះគ្រប់ប្រភេទ ស្របតាមច្បាប់សហលក្ខន្តិកៈ មន្ត្រីរាជការស៊ីវិល និងគតិយុត្តដែលមានជាធរមាន។

ក្រសួងមុខងារសាធារណៈ ក្នុងនាមជាសេនាធិការរបស់ គ.វ.រ. បានរៀបចំផែនការសកម្មភាព ២០២៤-២០២៨ ដើម្បីអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ ដោយផ្តោតលើការងារអាទិភាព កែលម្អប្រព័ន្ធជ្រើសរើសមន្ត្រីចូលបម្រើការងារក្នុងរដ្ឋបាលសាធារណៈប្រកបដោយ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធិភាព, ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារ និងការដាក់ ឱ្យអនុវត្តប្រព័ន្ធលើកទឹកចិត្ត គាំទ្រសមិទ្ធកម្មក្នុងរដ្ឋបាលសាធារណៈ។

ក្រោមការដឹកនាំរបស់សម្តេចនាយករដ្ឋមន្រ្តី ហ៊ុន ម៉ាណែត គឺបានដាក់ចេញយុទ្ធសាស្ត បញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ដែលផ្ដោតលើការធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈទំនើបប្រកបដោយសមត្ថភាពខ្ពស់ ខ្លាំង វៃឆ្លាត ស្អាត និង មានប្រសិទ្ធភាពខ្ពស់៕