ក្រសួងអប់រំ និងអង្គការ Save The Children ធ្វើទស្សនកិច្ចសិក្សានៅតាមសាលា ដើម្បីលុបបំបាត់អំពើហិង្សាលើកុមារក្នុងសាលារៀន

អង្គការ Save the Children ប្រចាំកម្ពុជា សហការជាមួយមន្ទីរអប់រំ យុវជន និងកីឡាខេត្តកំពង់ចាម និងមានការគាំទ្រពីក្រសួងអប់រំ យុវជន និងកីឡា បានធ្វើទស្សនកិច្ចសិក្សានៅតាមសាលា ដើម្បីលុបបំបាត់អំពើហិង្សាលើកុមារក្នុងសាលារៀន ដែលជាទស្សនកិច្ចសិក្សាផ្លាស់ប្តូរបទពិសោធន៍រវាងសាលារៀនគម្រូ និងសាលារៀនដែលចុះធ្វើទស្សនកិច្ច ដែលធ្វើឡើង ចាប់ពីថ្ងៃទី២១ ដល់ថ្ងៃទី២៤ ខែមករា ឆ្នាំ២០២៥ នៅក្នុងស្រុកកងមាស ខេត្តកំពង់ចាម។

ទស្សនកិច្ចនេះ មានគោលបំណងសិក្សា និងឆ្លុះបញ្ចាំងពីការអនុវត្តល្អពីសាលាគម្រូ ជួយសម្រួលដល់ការចែករំលែកបទពិសោធន៍ សម្រាប់ការកសាងសមត្ថភាពរបស់អ្នកពាក់ព័ន្ធក្នុងសាលា និងការពង្រឹងយន្តការការពារកុមារក្នុងសាលាសាម៉ី និងរៀបចំផែនការសម្រាប់ពង្រីកការអនុវត្តប្រកបដោយប្រសិទ្ធភាព និងការអនុវត្តល្អៗ ដើម្បីធ្វើឱ្យប្រសើរឡើងនូវបរិយាកាសការការពារ និងសុវត្ថិភាពកុមារ។ ទស្សនកិច្ចនេះ ក៏មានការគាំទ្រដោយក្រសួងការបរទេសជប៉ុន និងមានអ្នកចូលរួមចំនួន ៩០៣នាក់ ក្នុងនោះមានសមាជិកក្រុមប្រឹក្សាកុមារចំនួន៤៧៣ នាក់ និងសមាជិកគណៈកម្មការគ្រប់គ្រងសាលារៀនចំនួន៤៣០ នាក់ មកពីសាលាដែលចុះធ្វើទស្សនកិច្ចចំនួន២៩ ទៅកាន់សាលាបឋមសិក្សាគម្រូចំនួន១៤ ផងដែរ។

ជាមួយគ្នានេះ លោកស្រី ទិន ដាវិន មន្តី្រនាយកដ្ឋានបឋមសិក្សា នៃក្រសួងអប់រំយុវជន និងកីឡា បានចាត់ទុកថា ជាឱកាសដ៏សំខាន់ខ្លាំង សម្រាប់ធ្វើឱ្យគណៈកម្មការគ្រប់គ្រងសាលារៀន គ្រូបង្គោលកិច្ចការពារកុមារ និងក្រុមប្រឹក្សាកុមារ មានអាចស្វែងយល់ ផ្លាស់ប្តូរបទពិសោធអំពីចំណុច ខ្លាំង និងចំណុចប្រឈម ដែលត្រូវពង្រឹងគ្នាទៅវិញទៅមក។ លោកស្រី បន្តថា សាលារៀនទាំង៤៣ គាំទ្រដោយគម្រោងលុបបំបាត់អំពើហិង្សាលើកុមារក្នុងសាលារៀន (EVACiS) នឹងរៀបចំឱ្យមានផែនការអភិវឌ្ឍសាលារៀងៗខ្លួន ដែលគិតគូរទាក់ទងទៅនឹងការលុបបំបាត់អំពើហិង្សានានា ចំពោះកុមារនៅក្នុងសាលារៀន។ លោកស្រីថា៖ «ការរួបរួមគ្នាពីអ្នកពាក់ព័ន្ធដើម្បីគិតគូរដោះស្រាយរាល់កង្វល់របស់កុមារ ពិតជាមានផលជះជាវិជ្ជមានដល់កុមារ ទាំងផ្លូវកាយ ផ្លូវចិត្ត ពិសេសលទ្ធផលសិក្សារបស់កុមារ»។

សូមជម្រាបថា គម្រោង EVACiS ត្រូវបានអនុវត្តតាំងពីឆ្នាំ២០២២ ផ្តោតលើការកសាងបរិយាកាសអប់រំដែលមានសុវត្ថិភាព បរិយាបន្ន និងសមភាពយេនឌ័រកាន់តែច្រើនឡើង។ សកម្មភាពរួមមាន ការពង្រឹងសមត្ថភាពសម្រាប់គណៈកម្មការគ្រប់គ្រងសាលារៀន និងក្រុមប្រឹក្សាកុមារ ក៏ដូចជាកិច្ចសហការកាន់តែខ្លាំងរវាងសាលារៀន និងសហគមន៍ ដើម្បីដោះស្រាយបញ្ហាការពារកុមារ៕