ឧបនាយករដ្ឋមន្ត្រី ស សុខា ចង់ឱ្យខេត្តបាត់ដំបង រៀបចំផ្លូវថ្មើរជើងពេលរាត្រីដូចនៅភ្នំពេញ

ឧបនាយករដ្ឋមន្ត្រី ស សុខា បានបង្ហាញបំណងចង់ឱ្យរដ្ឋបាលខេត្តបាត់ដំបង សិក្សាគម្រោងរៀបចំផ្លូវថ្មើរជើងពេលរាត្រី សម្រាប់ថ្ងៃសៅរ៍ និងថ្ងៃអាទិត្យ ដូចនៅរាជធានីភ្នំពេញ ដែលកំពុងដាក់ឱ្យដំណើរការ ដើម្បីទាក់ទាញនូវប្រជាពលរដ្ឋដើរកម្សាន្ត។

ការកត់សម្គាល់របស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឃើញថា ការសាកល្បងផ្លូវថ្មើរជើងនៅរាជធានីភ្នំពេញ គឺទទួលបានការគាំទ្រពីសាធារណជន ទាំងអ្នកហាត់ប្រាណ និងអ្នកថ្មើរជើងកម្សាន្ត មិនថាមនុស្សចាស់ វ័យកណ្ដាល យុវជន និងកុមារ ដ្បិតពួកគាត់មិនព្រួយបារម្ភអំពីបញ្ហាចរាចរណ៍ និងក្លិនផ្សែងចេញពីយាន្ដយន្ត ខណៈអ្នកលក់ដូរបែបចល័ត ក៏ទទួលបានឱកាសលក់អាហារ និងវត្ថុអនុស្សាវរីយ៍ដាច់ជាងមុន។

ក្នុងន័យនេះ លោកឧបនាយករដ្ឋមន្ត្រី ក៏បានណែនាំឱ្យរដ្ឋបាលខេត្តបាត់ដំបង គប្បីគិតគូរលើចំណុចនេះ សិក្សាទីតាំងណាមួយក្នុងក្រុងបាត់ដំបង ដើម្បីរៀបចំតាមលំនាំរដ្ឋបាលរាជធានីភ្នំពេញ គឺផ្លូវថ្មើរជើងសម្រាប់ថ្ងៃសៅរ៍ និងថ្ងៃអាទិត្យ ដោយកំណត់ក្នុងចន្លោះពេលវេលាណាមួយ ដើម្បីផ្តល់ជម្រើសដល់ប្រជាពលរដ្ឋទាំងអ្នករស់នៅក្នុងក្រុងបាត់ដំបង និងភ្ញៀវទេសចរ បន្ថែមលើអ្វីដែលមានស្រាប់ ដូចជា ផ្លូវជុំវិញស្ទឹងសង្កែ សួនវិមានឯករាជ្យ និងសួនសម្តេចក្រឡាហោម ជាដើម។

ការណែនាំរបស់ប្រមុខក្រសួងមហាផ្ទៃទៅកាន់អាជ្ញាធរខេត្តបាត់ដំបងដូច្នេះ បានធ្វើឡើងថ្លែងក្នុងពិធីបិទសន្និបាតការងារប្រចាំឆ្នាំ របស់រដ្ឋបាលខេត្តបាត់ដំបង កាលពីរសៀលថ្ងៃទី៧ ខែកុម្ភៈ ឆ្នាំ២០២៥។ បើតាមការគូសបញ្ជាក់របស់លោក ស សុខា ដោយផ្អែកតាមការស្រាវជ្រាវមួយ គឺរកឃើញថា មានប្រជាជនប្រមាណ ១៤% បានកាត់បន្ថយភាពតានតឹង ឬស្ត្រេស ដោយសារតែអាជ្ញាធរបានរៀបចំទីតាំងសម្រាប់ពួកគាត់ដើរហាត់ប្រាណ និងទីតាំងសម្រាប់ថ្មើរជើងកម្សាន្តនៅពេលព្រឹក ពេលល្ងាច និងពេលយប់។

គួរជម្រាបថា រដ្ឋបាលរាជធានីភ្នំពេញ បានចាប់ផ្ដើមដាក់ឱ្យដំណើរការសាកល្បងគម្រោងផ្លូវថ្មើជើង (Walk Street) កាលពីថ្ងៃទី០១ ខែកុម្ភៈ ឆ្នាំ២០២៥ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង សម្រាប់រយៈពេល ២ថ្ងៃក្នុងមួយសប្ដាហ៍ ពោលគឺនៅថ្ងៃសៅ និងថ្ងៃអាទិត្យ ចាប់ពីម៉ោង៦ល្ងាចដល់ម៉ោង១១យប់។ ផ្លូវថ្មើរជើងនេះ បានទាក់ទាញពលរដ្ឋ និងភ្ញៀវអន្តរជាតិ ដើរលេងកម្សាន្តយ៉ាងច្រើនកុះករ ខណៈអាជ្ញាធររាជធានីភ្នំពេញ ក៏បានរៀបចំកន្លែងសប្បាយៗ និងដាក់របស់របរសំរាប់កម្សាន្តច្រើនប្រភេទ៕