នាយករដ្ឋមន្ត្រីចេញបញ្ជាក្ដៅឱ្យកាត់ផ្ដាច់ខ្សែរយៈជួញដូរគ្រឿងញៀនឆ្លងដែន

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បាន​ចេញបញ្ជាឱ្យបើកយុទ្ធនាការបោសសម្អាតបណ្ដាញឧក្រិដ្ឋជនជួញដូរគ្រឿងញៀនជាប្រចាំមិនថាតូច ឬធំនោះទេ ហើយត្រូវបង្ក្រាបឱ្យបានមេខ្លោងជួញដូរ និងខ្សែរយៈឆ្លងដែនរបស់ឧក្រិដ្ឋជនទាំងនេះ។

ក្នុងផែនការយុទ្ធនាការប្រឆាំងគ្រឿងញៀនខុសច្បាប់លើកទី១០ សម្ដេចធិបតី ហ៊ុន ម៉ាណែត បានបញ្ជាឱ្យរដ្ឋបាលរាជធានី ខេត្តទាំងអស់ជាពិសេសខេត្តជាប់ព្រំដែនត្រូវចាត់វិធានការស្វែងរកនិងទប់ស្កាត់ការលួចនាំចូលគ្រឿងញៀនឆ្លងកាត់ព្រំដែនឱ្យមានប្រសិទ្ធភាព លើសពីនេះបើចាំបាច់ត្រូវស្នើសុំកិច្ចសហការជាមួយមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិដើម្បីបង្ក្រាបតែម្ដង។

ក្នុងផែនការនោះសម្ដេចបញ្ជាថា៖ «រដ្ឋបាលខេត្តជាប់ព្រំដែនកម្ពុជា-ឡាវ កម្ពុជា-ថៃ កម្ពុជា-វៀតណាម ត្រូវខិតខំសហការ ជាមួយភាគីឡាវ ភាគីថៃ ភាគីវៀតណាម ដើម្បីផ្លាស់ប្ដូរព័ត៌មាន និងសហការស៊ើបអង្កេតរកមុខសញ្ញា ឈានទៅបង្ការ ទប់ស្កាត់ និងកាត់ផ្ដាច់ការចរាចរគ្រឿងញឿនឆ្លងកាត់តាមព្រំដែន»។

បន្ថែមលើនេះសម្ដេចក៏បញ្ជាឱ្យអគ្គស្នងការដ្ឋានគរបាលជាតិ ត្រូវបើកទូលាយនូវការផ្លាស់ប្ដូរព័ត៌មានជាមួយការិយាល័យសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ UNODC និងអង្គការឧក្រិដ្ឋកម្មនគរបាលអន្តរជាតិ (INTERPOL) និងជាមួយស្ថាប័នអនុវត្តន៍ច្បាប់ប្រទេសនានា ជាពិសេសប្រទេសដែលជាប្រភពនាំចូលគ្រឿងញៀនចូលកម្ពុជា ដើម្បីមានវិធានការបង្ក្រាបអង្គការចាត់តាំងឬបណ្ដាញជួញដូរគ្រឿងញៀនជាអន្តរជាតិឱ្យដល់ឬសគល់។

នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង មានជំនឿលើការប្ដេជ្ញាចិត្តរបស់សម្ដេចធិបតី ដោយថាការកាត់ផ្ដាច់កុំឱ្យឧក្រិដ្ឋជនក្នុងស្រុកមានទំនាក់ទំនងជាមួយឧក្រិដ្ឋជននៅខាងក្រៅជាជំហានមួយជោគជ័យមុនការបោសសម្អាតផ្ទៃក្នុង។ លោកជំរុញឱ្យរដ្ឋាភិបាលត្រូវបង្កើន និងជំរុញសកម្មភាពនេះឱ្យបានជាប់លាប់ និងជាពិសេសត្រូវប្រាកដថាមន្ត្រីអនុវត្តន៍ច្បាប់មិនជាប់ពាក់ព័ន្ធនឹងក្រុមឧក្រិដ្ឋជន។

លោក យង់ គិមអេង៖ «ខ្ញុំមានជំនឿថាប្រសិនជារដ្ឋមានការប្ដេជ្ញាចិត្តខ្ពស់ ហើយមន្ត្រីអនុវត្តន៍តាមបទបញ្ជារបស់សម្ដេចនាយករដ្ឋមន្ត្រីមែន រឿងហ្នឹងគឺអាចបោសសម្អាតបានហើយ។ ហើយមន្ត្រីមិនជាប់ពាក់ព័ន្ធជាមួយឈ្មួញជួញដូរគ្រឿងញៀន មិនកាងឆ្លៀតឈ្លបសម្រួលឱ្យឈ្មួញទេរឿងហ្នឹងធ្វើទៅមានប្រសិទ្ធភាពហើយ។ ខ្ញុំឃើញកន្លងមកក្រសួងមហាផ្ទៃគាត់បានកាត់ផ្ដាច់មន្ត្រីដែលមានពាក់ព័ន្ធនឹងឈ្មួញគ្រឿងញៀនមួយចំនូនដែរហើយ។ អ៊ីចឹងត្រូវតែបោសសម្អាតបន្ថែមទៀត»។

បញ្ជារបស់នាយករដ្ឋមន្ត្រីនៅពេលនេះគឺបន្ទាប់ពីរដ្ឋាភិបាលបានបញ្ចប់នូវយុទ្ធនាការបង្ក្រាបគ្រឿងញៀនលើកទី៩ក្នុងឆ្នាំ២០២៤ ដែលក្នុង១ឆ្នាំនៃយុទ្ធនាការនេះសមត្ថកិច្ចបានបង្ក្រាបដកហូតគ្រឿងញៀនបានជិត១៥តោន និងសារធាតុគីមីទាក់ទងនឹងសារធាតុញៀនបានជាង៣៥០គីឡូក្រាម។ ចំនួននេះបើធៀបទៅនឹងឆ្នាំ២០២៣គឺមានការកើនឡើងដល់ជិត៨ដង ខណៈឆ្នាំ២០២៣សមត្ថកិច្ចបង្ក្រាបនិងដកហូតបានជាង២តោននៃគ្រឿងញៀន៕

អត្ថបទដោយ ហ៊ុន សិរីវឌ្ឍន៍