អត្រាគ្របដណ្តប់ការផ្គត់ផ្គង់ទឹកស្អាតនៅជនបទកើនដល់ជិត ៩០ %

ក្រសួងអភិវឌ្ឍន៍ជនបទ និងស្ថាប័នពាក់ព័ន្ធ បានវាយតម្លៃខ្ពស់លើការងារកែលម្អលក្ខខណ្ឌនៃការរស់នៅ របស់សហគមន៍ជនបទ តាមរយៈការធ្វើឱ្យប្រសើរឡើងនូវគុណភាពនៃការរស់នៅប្រកបដោយផាសុកភាព និងមានបរិស្ថានរស់នៅស្អាត ដោយអត្រាគ្របដណ្តប់ការផ្គត់ផ្គង់ទឹកស្អាតកម្រិតមូលដ្ឋាននៅតំបន់ជនបទកើនដល់ប្រមាណជាង៨៦% ។ នេះបើយោងតាមសេចក្តីប្រកាសព័ត៌មានរបស់ក្រសួងអភិវឌ្ឍន៍ជនបទស្តីពី សន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅការងារឆ្នាំ ២០២៥។

លើសពីនេះ ការផ្គត់ផ្គង់ទឹកប្រកបដោយសុវត្ថិភាពនៅតំបន់ជនបទកើនដល់ ២១% ការផ្តល់សេវាអនាម័យជនបទកម្រិតមូលដ្ឋានប្រមាណជាង ៩១% និងការគ្រប់គ្រងអនាម័យជនបទ ប្រកបដោយសុវត្ថិភាពប្រមាណជាង ៥១%។ សមិទ្ធផលនេះ ត្រូវបានអង្គសន្និបាតខាងលើ វាយតម្លៃខ្ពស់លើសកម្មភាពធ្វើពិពិធកម្មសកម្មភាពសេដ្ឋកិច្ចជនបទ ដែលសម្រេចបាននូវវឌ្ឍនភាពខ្ពស់ ក្នុងការចូលរួមចំណែកលើកកម្ពស់ជីវភាពរស់នៅ ក៏ដូចជាការកាត់បន្ថយ ភាពក្រីក្ររបស់ប្រជាជនដែលភាគច្រើនរស់នៅតំបន់ជនបទ។

ក្រសួងអភិវឌ្ឍន៍ជនបទ គូសបញ្ជាក់ថា ខ្លួននឹងបន្តលើកកម្ពស់ការទទួលបានទឹកស្អាត និងអនាម័យរបស់ប្រជាជននៅតាមជនបទ តាមរយៈការពង្រឹងលើការអនុវត្តយន្តការដែលមានស្រាប់ ដើម្បីឈានទៅសម្រេចបានអត្រាគ្រប់ដណ្តប់ជាមូលដ្ឋាន ទាំងទឹកស្អាត និងទាំងអនាម័យជនបទ ១០០% នៅឆ្នាំ២០៣០ នៅក្នុងក្របខ័ណ្ឌទូទាំងប្រទេស។ ការដាក់ចេញផែនការនេះ ដើម្បីឱ្យស្របតាមគោលដៅនៃកម្មវិធីនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភាសម្រាប់ការកសាង និង ការការពារមាតុភូមិ ឆ្នាំ២០២៣-២០២៨ និងបន្តជំរុញអត្រាគ្រប់គ្រងប្រកបដោយសុវត្ថិភាព ឱ្យកាន់តែប្រសើរឡើង។

បន្ថែមពីនេះ ក្រសួងនឹងបន្តសហការជាមួយក្រសួងកសិកម្ម រុក្ខាប្រមាញ់ និងនេសាទ និងក្រសួងធនធានទឹក និងឧតុនិយម ដើម្បីពង្រឹងការអនុវត្តយន្តការត្រី-វិស័យ ស្តីពីកសិកម្ម-ទឹក-ជនបទ តាមរយៈការ សម្របសម្រួលវិស័យទាំង៣ ប្រកបដោយសហថាមពល រវាងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូក្នុងគោលដៅលើកកម្ពស់ និងកែលម្អជីវភាពរស់នៅរបស់ប្រជាជននៅតំបន់ជនបទឱ្យកាន់តែប្រសើរឡើង។

ក្រសួងអភិវឌ្ឍន៍ជនបទ គ្រោងនឹងបញ្ចប់ការរៀបចំគោលនយោបាយអភិវឌ្ឍន៍ជនបទ ឆ្នាំ២០២៥-២០៣៥ ដែលជាឯកសារគតិយុត្ត និងផែនទីហាញផ្លូវសម្រាប់ជំរុញការអនុវត្តការងារលើវិស័យ អភិវឌ្ឍន៍ជនបទ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដោយផ្តោតលើ÷ (១) ការបន្តអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ជនបទ (២) ការលើកកម្ពស់ការទទួលបានសេវា ទឹកស្អាត និងអនាម័យជនបទ (៣) ការបណ្តុះបណ្តាលជំនាញអាជីព (៤) ការបង្កើតការងារ និងមុខរបរ សមស្រប (៥) ការអភិវឌ្ឍសហគមន៍ និងភូមិគំរូ (៦) ការអភិវឌ្ឍ និងអភិរក្សជនជាតិដើមភាគតិច (៧) ការបណ្តុះគំនិតនវានុវត្តន៍ (៨) ការបង្កើនភាពប្រកួតប្រជែងផលិតកម្ម និង(៩) ការពង្រឹងគោល នយោបាយ និងផ្សព្វផ្សាយតាមផ្ទាលឌីជីថល៕