ស្នងការរាជធានី ៖ សមត្ថកិច្ច​ទាំង១៤ខណ្ឌ សូម​ជួយ​សម្រួល​ចរាចរណ៍​ទីតាំង​មមាញឹក ជា​ពិសេស​សាលារៀន​ដើម្បី​រំដោះ​ការ​កក់ស្ទះ

ភ្នំពេញ ៖ លោក​ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញបានឱ្យដឹងនាថ្ងៃទី០៣ ខែមីនាឆ្នាំ២០២៥ នេះថា គោលដៅទីតាំងមួយចំនួននៅក្នុងភូមិសាររាជធានីភ្នំពេញឃើញ​មាន​មហាជនជួយសម្រួលចរាចរណ៍ដើម្បីរំដោះការកក់ស្ទះ។ ដូច្នេះ​លោក​សូមថ្លែងអំណរអរគុណ​ដល់មហាជន​ដែល​ជួយដល់ការងារសង្គម។

លោកស្នងការនគរបាលរាជធានីភ្នំពេញបានបន្ថែម​ទៀត​ថា លោក​បាន​ជំរុញ​ដល់អាជ្ញាធរមានសមត្ថកិច្ចក្នុងភូមិសាស្រ្តរាជធានីភ្នំពេញទាំង១៤ខណ្ឌ ឱ្យ​ជួយបន្ថែមនៅទីតាំង​ដែល​មានចរាចរណ៍​មមាញឹក ដើម្បី​ជួយ​សម្រួល​កាត់​បន្ថយ​ការ​កក់​ស្ទះ​ជូនបងប្អូនប្រជាពលរដ្ឋនិងការធ្វើដំណើរ ជាពិសេសទីតាំងសាលារៀនពេលសិស្សានុសិស្សចេញ-ចូល​រៀន​ផង​ដែរ ត្រូវ​មាន​កម្លាំងនគរបាលជួយសម្រួលចរាចរណ៍។

ទាក់ទិន​បញ្ហា​ចរាចរណ៍​នេះដែរ កន្លងទៅ ប្រមុខថ្នាក់ដឹកនាំ នៃកម្ពុជា សម្តេចមហាបវរធិបតី ហ៊ុន ម៉ាណែត ក៏ដូចជាក្រសួងមហាផ្ទៃ តែងបានក្រើនរំលឹកជារឿយៗ និង​ចេញបទបញ្ជា​ដល់បណ្តាស្នងការទាំង២៥រាជធានីខេត្ត ឱ្យបន្តបង្កើនការយកចិត្តទុកដាក់ខ្ពស់ លើការរឹតបន្តឹងច្បាប់ចរាចរណ៍ ខណៈ​គ្រោះថ្នាក់ចរាចរណ៍តែងឧស្សាហ៍កើតមានឡើងជារឿយៗ ដោយបានបំផ្លាញទ្រព្យសម្បត្តិ , បង្ករបួសស្នាម និងបានឆក់យកអាយុជីវិតមនុស្សជាបន្តបន្ទាប់ជារៀងរាល់ថ្ងៃ ដែល​ជា​កត្តា​បង្ក​ក្តី​ព្រួយបារម្ភខ្ពស់មួយសម្រាប់សង្គមជាតិបច្ចុប្បន្ន ៕

អត្ថបទ ៖ សុភា