ព័ត៌មានជាតិ

អាជ្ញាធរខណ្ឌទួលគោក សំណូមពរពលរដ្ឋទុកដាក់សំរាមឲ្យបានត្រឹមត្រូវ ជៀសវាងគ្មានសណ្ដាប់ធ្នាប់

បានផុស

១ year មុន

នៅ

ថ្ងៃពុធ ៥ មីនា ២០២៥

ដោយ

អាជ្ញាធរខណ្ឌទួលគោក សំណូមពរដល់ប្រជាពលរដ្ឋរស់នៅតាមបណ្ដោយផ្លូវ ៣៣៦ សូមមេត្តាទុកដាក់សំរាមឲ្យបានត្រឹមត្រូវ ជៀសវាងយកមកបោះចោលពាសវាលពាសកាលដែលអាចធ្វើឲ្យសំរាមទាំងអស់នោះហូរ ឬក៏ធ្លាក់ចូលទៅក្នុងលូ បង្កការកកស្ទះ និងបាត់បង់សោភ័ណភាពសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងចំណុចផ្លូវលេខ ៣៣៦ កែងផ្លូវម៉ៅសេទុង ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ តែងតែមានបុគ្គលមួយចំនួនតូចបានយកសំរាមមកចោល ធ្វើឲ្យជះក្លិនអាក្រក់ទៅកាន់អ្នករស់នៅជុំវិញនោះ បាត់បង់សោភណភាពដងផ្លូវ បង្កផលលំបាកលើការរស់នៅប្រជាពលរដ្ឋ។

ប្រជាពលរដ្ឋម្នាក់ សុំមិនបញ្ចេញឈ្មោះ បានប្រាប់កម្ពុជាថ្មីឲ្យដឹងថា កន្លងមកនៅពេលមានប្រជាពលរដ្ឋយកសំរាមមកទុកដាក់នៅកែងផ្លូវនេះ រូបគាត់តែងតែប្រាប់ ក៏ប៉ុន្តែពេលដែលប្រាប់ហើយ អ្នកដែលយកសំរាមទាំងអស់នោះបានថាឲ្យគាត់ត្រឡប់មកវិញថា (កុំចេះដឹងរឿងគេ មិនមែនដាក់មុខផ្ទះអ្នកឯងទេ)។

ប្រជាពលរដ្ឋដដែលបន្តថា គាត់តែងតែធ្វើទៅតាមការកំណត់របស់អាជ្ញាធរ ទាល់តែមានរថយន្តប្រមូលសំរាមមកដល់ទើបគាត់ ក៏ដូចជាអ្នកនៅក្បែរនោះយកចេញមកក្រៅ ដើម្បីកាត់បន្ថយសំរាមលើដងផ្លូវ។

ដោយឡែក លោក បូរិន បានលើកឡើងដែរថា ការចោលសំរាមនេះ បានបង្កសាយភាយក្លិនស្អុយជូរ និងទឹកដក់លើផ្លូវ ហើយមួយចំនួនតូចមិនមែនជាអ្នករស់នៅតំបន់សង្កាត់ផ្សារដើមគឡើយ ភាគច្រើនជាអ្នកលក់ដូររទេះចល័ត និងមានអាជីវករលក់បន្លែមួយចំនួនតែងយកមកចោលទីនេះ ដែលធ្វើឲ្យប៉ះពាល់ដល់បរិស្ថាន និងសោភណភាពទីក្រុងយ៉ាងខ្លាំង ជាពិសេសនោះធ្វើឲ្យផ្លូវរួមតូច ដោយសារតែគំនរសំរាមហៀរនៅនឹងកណ្ដាលផ្លូវ និងធ្វើឲ្យអ្នកដំណើរមួយចំនួនរអិលទឹកសំរាមផងដែរ។

ពាក់ព័ន្ធបញ្ហានេះ លោក ស៊ឹម សុផង់ អភិបាលរង ក៏បានប្រាប់ឲ្យកម្ពុជាថ្មីដឹងដែរថា ដោយសារតែប៉ុន្មានថ្ងៃនេះក្រុមហ៊ុនប្រមូលសំរាម Super800 មានបញ្ហាដោះស្រាយផ្ទៃក្នុងជាមួយកម្មករ មិនត្រូវរូវគ្នា ធ្វើឲ្យសំរាមមានការកកស្ទះ បង្កើតទៅជាគំនរសំរាមជះក្លិនស្អុយលើដងផ្លូវ។

ទន្ទឹមនេះ លោកអភិបាលរង បានស្នើសុំទៅកាន់ក្រុមហ៊ុនប្រមូលសំរាមផ្សេងទៀត មកជួយជាបណ្ដោះអាសន្នសិន ដើម្បីកុំឲ្យសំរាមកកស្ទះ ជះក្លិនមិនល្អទៅដល់ប្រជាពលរដ្ឋ។

ជាមួយគ្នានេះ លោកអភិបាលរង បានសំណូមពរដល់ប្រជាពលរដ្ឋដែលរស់នៅក្នុងមូលដ្ឋានខណ្ឌទួលគោកទាំងអស់ សូមមេត្តាទុកដាក់សំរាមឲ្យបានត្រឹមត្រូវ និងយកសំរាមមកចោលតាមម៉ោងកំណត់របស់ក្រុមហ៊ុនប្រមូលសំរាមនីមួយៗ៕

អត្ថបទ ៖ ម៉េង