អ្នកនាំពាក្យអប់រំ៖ ប្រធានបទទិវាជាតិអំណានលើកទី១០ ដើម្បីជំរុញការអាន មួយជំនាន់ទៅមួយជំនាន់

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានប្រាប់មក កម្ពុជាថ្មី ប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម” ក្នុងកម្មវិធីពិព័រណ៍សៀវភៅ ដើម្បីអបអរសាទរទិវាជាតិអំណានលើកទី១០ ក្នុងការបង្ហាញពីការជំរុញបន្តការអានសៀវភៅ និងដើម្បីបន្តនិរន្តរភាពអានសៀវភៅពីមនុស្សមួយជំនាន់ ទៅមួយជំនាន់ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងអប់រំ យុវជន និងកីឡា និងក្រសួងវប្បធម៌ និងវិចិត្រសិល្បៈ បានរៀបចំកម្មវិធីពិព័រណ៍សៀវភៅ ដើម្បីអបអរសាទរទិវាជាតិអំណានលើកទី១០ រយៈពេល៤ថ្ងៃ ចាប់ពីថ្ងៃទី៨ ដល់ថ្ងៃទី១១ ខែមីនា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា ក្រោមប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម” ។

លោកស្រី ឃួន វិច្ឆិកា អ្នកនាំពាក្យក្រសួងអប់រំ បានឱ្យ កម្ពុជាថ្មី ដឹងថា ក្នុងឱកាសអបអរសាទរទិវាជាតិអំណានលើកទី១០ នេះ នឹងមានស្តង់សៀវភៅចំនួន ១០៨ស្តង់ ចូលរួមពិព័រណ៍ ហើយក្រសួងសង្ឈឹមថានឹងមានអ្នកចូលរួមក្នុងកម្មវិធីចែករំលែកផ្សេងៗ ចំនួនប្រមាណ ៣០៨០០នាក់។ ចំពោះការជ្រើសរើសប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម” ព្រោះចង់បញ្ជាក់ពីការផ្សារភ្ជាប់ និងនិរន្តរភាពផ្ទេរពីមនុស្សជំនាន់មួយទៅមនុស្សជំនាន់មួយ តាមរយៈសំណេរ សៀវភៅ និងការអាន។

អ្នកនាំពាក្យ មានប្រសាសន៍ថា៖ “យើងរៀបចំបែបនេះ នៅក្នុងទិសដៅជំរុញឱ្យប្អូនៗជំនាន់ក្រោយបន្តការអាន ដើម្បីជាការបន្តនិរន្តរភាព ក៏ដូចជាទទួលបាននូវកេរដំណែលនៃការចែករំលែក និងបទពិសោធក៏ដូចជាចំណេះដឹង វប្បធម៌ និងរបៀបនៃការរស់នៅរបស់ប្រជាជនយើងពីជំនាន់មួយទៅជំនាន់មួយផងដែរ។ ដើម្បីឱ្យគាត់មានមូលដ្ឋានក្នុងការចូលរួមថែរក្សានូវវប្បធម៌ អរិយធម៌ខ្មែរ ក៏ដូចជាអត្តសញ្ញាណរបស់ខ្មែរផងដែរ”។

បន្ថែមពីនេះ លោកស្រី ឃួន វិច្ឆិកា ក៏បានបញ្ជាក់ថា ការអានជារឿងមួយដែលសំខាន់ ក្នុងការឱ្យមនុស្សទទួលបានចំណេះដឹងថ្មីៗបន្ថែម និងទទួលបាននូវការសមាធិ រូបារម្មណ៍ ដែលអាចឱ្យអ្នកអានមានការស្រមៃ និងរកឃើញនូវភាពច្នៃប្រឌិតថ្មីៗបន្ថែម។ លើសពីនេះ លោកស្រីថា ការអានក៏នាំមកនូវការរីកចម្រើនទាំងផ្នែកអារម្មណ៍ បញ្ញា និងចំណេះដឹងប្រចាំថ្ងៃ ព្រមទាំងចូលរួមក្នុងការងារនានាដែលកំពុងបំពេញផងដែរ។

ចំពោះការតាំងពិព័រណ៍សៀវភៅនាពេលនេះ លោកស្រី ឃួន វិច្ឆិកា ថា ជាឱកាសសម្រាប់អ្នកនិពន្ធ ឬអ្នករៀបចំពិព័រណ៍សៀវភៅ រកឃើញនូវតម្រូវការរបស់អ្នកអានបច្ចុប្បន្ន និងវិធីសាស្ត្រចែករំលែកចំណេះដឹងតាមរយៈសៀវភៅទៅកាន់អ្នកអាន។ ចំពោះអ្នកចូលចិត្តអានសៀវភៅវិញ ជាឱកាសមួយសំខាន់ក្នុងការស្វែងរកសៀវភៅដែលខ្លួនចង់អាន ស្រឡាញ់ និងសៀវភៅជាច្រើនដែលខ្លួនចាប់អារម្មណ៍ដែរ។ ជាមួយគ្នានេះ ក៏ជាឱកាសរបស់អ្នកអានបានជួបជាមួយអ្នកនិពន្ធ និងអ្នកពាក់ព័ន្ធការងារសៀវភៅផងដែរ។ ក្នុងកម្មវិធីនេះ លោកស្រីជឿជាក់ថា មិនមែនត្រឹមតែជាឱកាសរបស់មនុស្សពេញវ័យឡើយ ក៏ជាឱកាសដល់កុមារតូចៗចូលរួមអានសៀវភៅ និងជាឱកាសដល់ម្តាយឪពុកនាំកូនៗចូលរួមពិព័រណ៍សៀវភៅ ដើម្បីបង្កើនការអានដល់កុមារផងដែរ៕

អត្ថបទ៖ អុន ស្រីមាន