ព័ត៌មានជាតិ

គណៈបញ្ជាការឯកភាពខណ្ឌកំបូល ចុះត្រួតពិនិត្យណែនាំទីតាំងកែច្នៃ-វេចខ្ចប់ថ្នាំជក់ សាយភាយក្លិនប៉ះពាល់ពលរដ្ឋ

បានផុស

១ ខែ មុន

នៅ

ថ្ងៃសៅរ៍ ១៥ មីនា ២០២៥

ដោយ

គណៈបញ្ជាការឯកភាពខណ្ឌកំបូល ចុះត្រួតពិនិត្យណែនាំដល់ទីតាំងសិប្បកម្មផលិត កែច្នៃ និងវេចខ្ចប់ថ្នាំជក់ ១ កន្លែង ដែលមានក្លិនថ្នាំជក់សាយភាយចេញពីរោងចក្រប៉ះពាល់ដល់ប្រជាពលរដ្ឋរស់នៅជិតខាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីល្ងាចថ្ងៃទី ១៤ ខែមីនា ឆ្នាំ ២០២៥ គណៈបញ្ជាការឯកភាពខណ្ឌកំបូល ដឹកនាំដោយ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល អមដំណើរ លោក ហ៊ុន សុរិទ្ធី អភិបាលរង នៃគណៈអភិបាលរាជធានីភ្នំពេញ បានចុះត្រួតពិនិត្យទីតាំងសិប្បកម្មផលិត កែច្នៃ និងវេចខ្ចប់ ថ្នាំជក់ មានស្លាកយីហោ សានហ៊ី ឃីងឌាន ឯ.ក ស្ថិតនៅក្នុងភូមិត្រឹប សង្កាត់កំបូល ខណ្ឌកំបូល រាជធានីភ្នំពេញ។

លោក ឃឹម ស៊ុនសូដា អភិបាលខណ្ឌកំបូល បានបញ្ជាក់ប្រាប់កម្ពុជាថ្មីថា ទីតាំងខាងលើនេះមានក្លិនថ្នាំជក់សាយភាយចេញពីរោងចក្រប៉ះពាល់ដល់សុខុមាលភាពប្រជាពលរដ្ឋរស់នៅជិតខាង។ បន្ថែមនោះ ដោយមានការសំណូមពរពីប្រជាពលរដ្ឋផងនោះ គណៈបញ្ជាការឯកភាពខណ្ឌ សហការជាមួយរដ្ឋបាលរាជធានីភ្នំពេញ ក៏បានចុះទៅដល់ទីតាំងនេះតែម្ដង។ ក្នុងនោះ ក្រុមការងារចម្រុះរកឃើញថា ក្រុមហ៊ុនមានឯកសារ និងលិខិតអនុញ្ញាតសម្រាប់ដំណើរការទីតាំងសិប្បកម្មគ្រប់គ្រាន់ និងពុំមានរក្សាទុក ឬប្រើប្រាស់សារធាតុផ្សំជាមួយនឹងសរសៃថ្នាំជក់ដែលមានសារធាតុញៀននោះទេ ប៉ុន្តែទីតាំងនេះមានក្លិនថ្នាំជក់សាយភាយចេញពីរោងចក្រ។

ក្រោយបញ្ចប់ការត្រួតពិនិត្យរួចមក ក្រុមការងារ បានសម្រេចណែនាំដល់មន្ទីរបរិស្ថានរាជធានីភ្នំពេញ ត្រូវរៀបចំកិច្ចសន្យាជាមួយម្ចាស់ទីតាំងស្ដីពីការរៀបចំបទដ្ឋានបច្ចេកទេសកាត់បន្ថយក្លិនសាយភាយចេញពីរោងចក្រ ដើម្បីកុំឱ្យប៉ះពាល់ដល់ប្រជាពលរដ្ឋរស់នៅជិតខាង៕

អត្ថបទ ៖ សំណាង