ប ស ស ណែនាំសមាជិកប្តឹងតាមរយៈប្រអប់បណ្តឹង​អនាមិក ពេលឃើញមានភាពមិនប្រក្រតីណាមួយរបស់គ្រូពេទ្យ

បេឡាជាតិសន្តិសុខសង្គម(ប.ស.ស.)បានធ្វើការណែនាំដល់សមជិក ប.ស.ស.អាចរាយការណ៍មក ប.ស.ស. បានភ្លាមៗ តាមរយៈប្រអប់បណ្តឹងអនាមិកនៅពេលដែលសង្កេតឃើញមានភាពមិនប្រក្រតីណាមួយរបស់គ្រូពេទ្យ ឬបុគ្គលិកមន្ទីរពេទ្យក្នុងការផ្តល់សេវាក្នុងអំឡុងពេលទៅប្រើប្រាស់សេវា ប.ស.ស. នៅតាមមូលដ្ឋានសុខាភិបាលដៃគូ
ប.ស.ស.។

ប.ស.ស. បានណែនាំទៀតថា ការប្តឹងតាមរយៈបណ្តឹងអាណមិកនេះ លោកអ្នកគ្រាន់តែស្កេនរួចហើយនៅត្រង់ប្រអប់
ប្តឹងឈ្មោះលោកអ្នកត្រូវវាយបញ្ចូលឈ្មោះមូលដ្ឋានសុខាភិបាល ឬបុគ្គលិកណាមួយក្នុងមូលដ្ឋានសុខាភិបាលដែលលោកអ្នកចង់ប្តឹង និងត្រង់ប្រអប់សូមរាយរ៉ាប់លោកអ្នកត្រូវបរិយាយពីសកម្មភាពមិនប្រក្រតី ឬការប្រព្រឹត្តិខុសវិជ្ជាជីវៈនៃបុគ្គលនោះ បន្ទាប់មកចុចលើបូតុងបញ្ជួន។ បន្ទាប់ពីចុចបញ្ជួនរួច លោកអ្នកនឹងទទួបានពាក្យបណ្តឹងដែលបញ្ជាក់ថាលោកអ្នកបានដាក់ពាក្យបណ្តឹងដោយជោគជ័យ និងអាចប្រើប្រាស់សម្រាប់តាមដានដំណោះស្រាយនៃបណ្តឹងរបស់អ្នក។

ដើម្បីតាមដានបណ្តឹងរបស់អ្នកដំបូង លោកអ្នកគ្រានតែចុចលើពាក្យសុំតាមដានបណ្តឹង បន្ទាប់ចុចលើពាក្យបញ្ជួន។លោកអ្នកត្រូវចាំថា បើឃើញសញ្ញាធីកពណ៍ខៀវមាននៅគ្រប់៤ដំណាក់កាលនោះបណ្តឹងលោកត្រូវបានដោះស្រាយរួចរាល់។ ប្រសិនបើលោកអ្នកមានចម្ងល់ ឬត្រូវការព័ត៌មានបន្ថែម សូមទំនាក់ទំនងមកកាន់លេខ ១២៩៧ ឬ ១២៨៦ ឬតាមរយៈប្រព័ន្ធផ្សព្វផ្សាយបណ្តាញសង្គមរបស់ប.ស.ស.។

គួរបញ្ជាក់ថា ដើម្បីធានានូវគណនេយ្យភាព តម្លាភាព និងសុចរិតភាពនៃការផ្តល់សេវាសាធារណៈរបស់ក្រសួងការងារ
និងបណ្តុះបណ្តាលវិជ្ជាជីវៈបានដាក់ឱ្យដំណើរការប្រអប់បណ្ដឹងអនាមិកកាលពីថ្ងៃទី៩ ខែតុលា ឆ្នាំ២០២៤ ដោយសាធារណជនអាចដាក់ពាក្យបណ្ដឹង អនាមិក តាមរយៈគេហទំព័រ https://feedback.mlvt.gov.kh ឬអាចភ្ជាប់តាមរយៈការស្កេន QR Code ។

ក្នុងន័យនេះ ដើម្បីបង្ការការឆបោក ឬការមិនទទួលខុសត្រូវរបស់បុគ្គលណាមួយជាថ្មីម្តងទៀត ក្រសួងការងារ និងបណ្តុះបណ្តាលវិជ្ជាជីវៈក៏បានជូនដំណឹង និងលើកទឹកចិត្តដល់សាធារណជន កម្មករនិយោជិត និងនិយោជកសូមប្រើប្រាស់នូវប្រអប់បណ្ដឹង អនាមិកនេះដើម្បីទទួលបានការឆ្លើយតបពីក្រសួងនូវរាល់មតិ ឬសំណើនានា ព្រមទាំងឆ្លើយតបទៅនឹងចម្ងល់ ឬ ភាពមិនពេញចិត្ត ឬភាពមន្ទិលសង្ស័យ ឬចង់ប្តឹងបុគ្គលណាមួយ ដោយពុំមានតម្រូវឱ្យបង្ហាញអត្តសញ្ញាណរបស់ម្ចាស់បណ្ដឹងនោះឡើយ៕

អត្ថបទ៖ សំអឿន