ផ្លូវក្រាលកៅស៊ូ និងបេតុង ប្រវែង ៩២ គ.ម បើកការដ្ឋានសាងសង់​​ជានិមិត្តរូបនៅខេត្តកំពង់ធំ

ផ្លូវក្រាលកៅស៊ូពីរជាន់ (DBST) និងផ្លូវបេតុង សរុបប្រវែង ៩២,៩០គ.ម បានបើកការដ្ឋាន​សាងសង់​ជានិមិត្តរូបនៅខេត្តកំពង់ធំ ក្រោមវត្តមាន លោក វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ។

ដោយ​​ទទួលបានថវិកាបដិភាគ​ពី​​រាជរដ្ឋាភិបាល និងហិរញ្ញប្បទានសហប្រតិបត្តិការពីធនាគារអភិវឌ្ឍន៍អាល្លឺម៉ង់ (KfW) ទីភ្នាក់ងារបារាំងសម្រាប់ការអភិវឌ្ឍ (AFD) និងមូលនិធិសហភាពអឺរ៉ុប (EU/AIF) ក្រោម​គម្រោង​កម្មវិធីអភិវឌ្ឍន៍ហេដ្ឋារចនាសម្ព័ន្ធជនបទសម្រាប់កម្ពុជា (RID4CAM) ផ្លូវកៅស៊ូ DBST និងបេតុង​សរុបប្រវែង ៥២៦,៦៦០​​គ.ម បានបើកការដ្ឋានសាងសង់​នៅក្នុងខេត្តគោលដៅចំនួន ៧ រួមមាន ខេត្តកំពង់ធំ សៀមរាប បាត់ដំបង ព្រះវិហារ ឧត្តរមានជ័យ បន្ទាយមានជ័យ និងខេត្តព្រៃវែង សរុបទឹកប្រាក់​ប្រមាណ ១២០,៤៣ លានអឺរ៉ូ (ឬប្រមាណ ១២៥ លានដុល្លារអាមេរិក) ដែលមានក្រសួងអភិវឌ្ឍន៍ជនបទជាភ្នាក់ងារអនុវត្តគម្រោង។

ក្នុង​របាយការណ៍របស់លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍​ជនបទ​​បានបញ្ជាក់​ថា រាជរដ្ឋាភិបាលក្នុងនីតិកាលទី ៧ នៃរដ្ឋសភា ក្រសួងអភិវឌ្ឍន៍ជនបទ បាន​កំពុងអនុវត្តផែនការយុទ្ធសាស្រ្តអភិវឌ្ឍន៍ជនបទរយៈពេល ៥ ឆ្នាំ ដោយ​ផ្តោត​ទៅ​​លើ​ចក្ខុវិស័យ “កសាងតំបន់ជនបទកម្ពុជាប្រកបដោយវិបុលភាព បរិយាប័ន្ន នវានុវត្តន៍ ឌីជីថល និងភាពធន់ទាំងផ្នែកសេដ្ឋកិច្ច សង្គម និងវប្បធម៌” ដែលមានគោលដៅចំនួន ៥ គឺ ១).ប្រជាជនមានជីវភាពរស់នៅសមរម្យ ២).​ប្រជាជន​មានសុខភាពមាំមួន ៣).ប្រជាជនរស់នៅក្នុងភាពថ្លៃថ្នូរ ៤.មានហេដ្ឋារចនាសម្ព័ន្ធខ្វាត់ខ្វែងប្រកបដោយភាពធន់ និង​៥).មានអភិបាលកិច្ចល្អ ព្រមទាំងបានកំណត់យុទ្ធសាស្ត្រ ចំនួន ៥ រួមមាន៖ ១.អភិវឌ្ឍន៍ហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រកបដោយភាពធន់ ២.ការលើកកម្ពស់ការទទួលបានទឹកស្អាត និងអនាម័យបរិស្ថានជនបទ ៣.ការជំរុញអភិវឌ្ឍសហគមន៍ជនបទនិងចលនាភូមិគំរូ ៤.ការលើកម្ពស់ការធ្វើពិពិធកម្មសេដ្ឋកិច្ចជនបទ និង ៥.ការគ្រប់គ្រងស្ថាប័ន អភិបាលកិច្ច និងសេវាគាំទ្រទូទៅ។

ពាក់ព័ន្ធនឹងការងារអភិវឌ្ឍន៍ហេដ្ឋារចនាសម្ព័ន្ធរូបវន្ត និងគមនាគមន៍ជនបទ ក្រសួងបាននឹងកំពុងស្ថាបនាខ្សែផ្លូវជនបទប្រវែងជាង ៥ ម៉ឺនគ.ម គីឡូម៉ត្រ ឬប្រមាណ ៧៤% នៃបណ្តាញខ្សែផ្លូវទូទាំងប្រទេស ដែលក្នុងនោះផ្លូវប្រភេទកម្រាលកៅស៊ូពីរជាន់ (DBST) និងផ្លូវបេតុងធន់នឹងការប្រែប្រួលអាកាសធាតុ និងប្រើប្រាស់បានគ្រប់រដូវកាលមានប្រមាណ ១៥%។

ថ្លែងក្នុង​ពិធី លោក វង្សី វិស្សុត បានមានប្រសាសន៍ថា រាជរដ្ឋាភិបាលបាន​បង្កើនការយកចិត្តទុកដាក់ ក្នុងកិច្ចការអភិវឌ្ឍលើគ្រប់វិស័យ ជាពិសេសការបង្កើនល្បឿននៃសកម្មភាពការងារអភិវឌ្ឍន៍ជនបទ និងការកាត់បន្ថយភាពក្រីក្ររបស់ប្រជាជន។

តាមរយៈការទទួលបាននូវផ្លូវប្រភេទកម្រាលកៅស៊ូពីរជាន់ និងផ្លូវបេតុង ព្រមទាំងសំណង់សិល្បការ្យ ដែលធន់នឹងការប្រែប្រួលអាកាសធាតុ ប្រើប្រាស់បានគ្រប់រដូវកាល ប្រវែង ៥២៦,៦៦គ.ម. របស់កម្មវិធី RID4CAM នេះ មានសារ​សំខាន់ ជាសារវន្តសម្រាប់ប្រជាជន និងរាជរដ្ឋាភិបាលកម្ពុជា និងជាសសៃឈាមសេដ្ឋកិច្ច និងសង្គមដ៏មានសក្តានុពល ក្នុងការធ្វើសមាហរណកម្មរវាងជនបទនិងទីក្រុង ការកាត់បន្ថយនូវការចំណាយលើថ្លៃដឹកជញ្ជូន ការកាត់បន្ថយពេលវេលាធ្វើដំណើរ ការកាត់បន្ថយការចំណាយជួសជុលយានយន្ត និងមានផាសុកភាព ក្នុងការធ្វើដំណើរ៕