បង្ក្រាប​ករណីមានខ្សែរយៈចាត់តាំង ជួញដូរគ្រឿងញៀនឆ្លង​ដែន

ជនសង្ស័យម្នាក់ រួមជាមួយគ្រឿងញៀន ទម្ងន់ជាងបីគីឡូក្រាម ត្រូវបានសមត្ថកិច្ច ឃាត់ខ្លួននៅរាជធានីភ្នំពេញ ចំណុចបណ្តោយផ្លូវបេតុង ក្បែររង្វង់ មូលនាងមច្ឆា ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា ។

របាយការណ៍របស់មន្ទីរប្រឆាំងបទល្មើសគ្រឿងញៀន បានឲ្យដឹងថា កាលពីថ្ងៃទី ០៣ខែ វិច្ឆិកា ឆ្នាំ២០២០ វេលាម៉ោង ២០និង ៤៥នាទី កម្លាំងជំនាញ(ក៨) នៃ មន្ទីរប្រឆាំងបទល្មើសគ្រឿងញៀន ដឹកនាំដោយលោក ឧត្តមសេនីយ៍ទោ វ៉ាន់ កុសល នាយករងមន្ទីរ សហការជាមួយកម្លាំងជំនាញ នៃស្នងការដ្ឋាននគរបាលរាជធានីភ្នំពេញ ព្រមទាំងមានការសម្របសម្រួល ពីលោក សឿង មុនីរត័្ន ព្រះរាជអជ្ញារង នៃអយ្យការអមសាលាតំបូងរាជធានីភ្នំពេញ បានស្រាវជ្រាវ និងបង្ក្រាបករណីជួញដូរដោយខុសច្បាប់នូវសារធាតុញៀន នៅរាជធានីភ្នំពេញ ចំណុចបណ្តោយផ្លូវបេតុង ក្បែររង្វង់ មូលនាងមច្ឆា សង្កាត់ជ្រោយចង្វា ខណ្ឌជ្រោយចង្វា។

ជាលទ្ធផលបានឃាត់ខ្លួនជនសង្ស័យម្នាក់ ឈ្មោះ សឿន ពិសិដ្ឋ អាយុ ២២ឆ្នាំ ជនជាតិ ខ្មែរ និងចាប់យកបានគ្រឿងញៀន សរុប ៣១១១.០៧ ក្រាម រួមមាន ៖ ប្រភេទមេតំហ្វេតាមីន(ICE) ទម្ងន់ ៣១១០ក្រាម និងអ៊ិចស្តាស៊ី(MDMA)ទម្ងន់ ១.០៧ក្រាម ព្រមទាំងជញីងថ្លឹងគ្រឿងញៀន ០១គ្រឿង ៕