មន្ត្រីជាន់ខ្ពស់អាមេរិកថា សហរដ្ឋអាមេរិក ប្ដេជ្ញាជួយលើកស្ទួយតំបន់អាស៊ានឱ្យក្រោកឈរបានរឹងមាំ

មន្ត្រីជាន់ខ្ពស់សហរដ្ឋអាម៉េរិក លោក សៀន អូនៀល (Sean O’Neill) បានអះអាងថា សហរដ្ឋអាម៉េរិក បានប្ដេជ្ញាចិត្តយ៉ាងមុតមាំក្នុងការធ្វើជាដៃគូសន្ទនាជាមួយបណ្ដាប្រទេសអាស៊ាន ទាំងកិច្ចការពារតំបន់អាស៊ាន ទាំងកិច្ចការជួយលើកស្ទួយតំបន់អាស៊ាន ឱ្យក្រោកឈរបានរឹងមាំ។ លោកបានអះអាងបែបនេះ ក្នុងឱកាសដឹកនាំគណប្រតិភូសហរដ្ឋអាម៉េរិក ចូលរួមប្រជុំ “កិច្ចសន្ទនាអាស៊ាន-អាមេរិក”លើកទី៣៧ នៅខេត្តសៀមរាប នាថ្ងៃទី២២ ខែមេសា ឆ្នាំ២០២៥។

លោក សៀន អូនៀល បានថ្លែងថា «យើងសូមកោតសរសើរ  ចំពោះរដ្ឋាភិបាលកម្ពុជា ដែលជាដៃគូនៃកិច្ចសន្ទនាគ្រប់ជ្រុងជ្រោយ ហើយក៏មានកិច្ចសហប្រតិបត្តិជាមួយគ្នាយ៉ាងប្រសើរ តាមរយៈដៃគូសន្ទនាគ្រប់ជ្រុងជ្រោយនេះ»។ លោកបន្តថា សហរដ្ឋអាម៉េរិក បានបន្តគាំទ្រកិច្ចសន្ទនាជាមួយដៃគូជាច្រើននៅជុំវិញពិភពលោក។ ដូច្នេះក្នុងនាមតំណាងឱ្យផ្នែករដ្ឋបាលនៃកិច្ចសន្ទនា រវាងបណ្ដាប្រទេសអាស៊ាន និងសហរដ្ឋអាមេរិក លោកបានផ្ដោតការយកចិត្តទុកដាក់រួមគ្នាក្នុងការសន្ទនាទៅលើចំណុចសំខាន់ៗជាច្រើន ដែលរំពឹងថាការសន្ទនាទាំងនេះនឹងចេញជាលទ្ធផលយ៉ាងល្អ។ 

លោកបានបន្ថែមថា សហរដ្ឋអាម៉េរិក បានប្ដេជ្ញាចិត្តយ៉ាងមុតមាំក្នុងការធ្វើជាដៃគូសន្ទនាជាមួយបណ្ដាប្រទេសអាស៊ាន ទាំងកិច្ចការពារតំបន់អាស៊ាន ព្រមទាំងជួយលើកស្ទួយតំបន់អាស៊ានឱ្យក្រោកឈរបានរឹងមាំ។ លោកគិតថាទាំងអាស៊ាន និងអាមេរិក នឹងអាចទទួលបាននូវវិបុលភាព ស្ថិរភាពតាមរយៈកិច្ចសន្ទនានានា សម្រាប់ពង្រឹងផ្នែករដ្ឋបាលនៃបណ្ដាប្រទេសនីមួយៗ ដែលជាការលើកកម្ពស់ដល់ផ្នែក ផ្នែកសន្តិសុខ សុវត្ថិភាព ព្រមទាំងវិបុលភាព ដល់ពលរដ្ឋអាមេរិកកាំងដែលកំពុងធ្វើការនៅតាមបណ្ដាប្រទេសក្នុងតំបន់ផង។

សូមជម្រាបថា កិច្ចសន្ទនាអាស៊ាន អាម៉េរិក លើកទី៣៧នេះ កម្ពុជាទទួលបានសិទ្ធិធ្វើជាម្ចាស់ផ្ទះ ដោយខាងភាគីអាស៊ាន មានលោក គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ជាសហប្រធាន និងខាងសហរដ្ឋអាម៉េរិក មានលោក សៀន អូនៀល ជាសហប្រធាន ដឹកនាំកិច្ចប្រជុំ៕

ដោយ៖ គឿនវេត