ក្រសួងព័ត៌មាន ស្នើឱ្យបញ្ឈប់ការផ្សាយពាណិជ្ជកម្មឱសថបុរាណ និងឱសថដែលគ្មានច្បាប់អនុញ្ញាតពីក្រសួងសុខាភិបាល

ក្រសួងព័ត៌មាន ស្នើដល់ម្ចាស់ស្ថានីយវិទ្យុ ទូរទស្សន៍ ប្រព័ន្ធផ្សព្វផ្សាយទាំងអស់ ចូលរួមសហការទប់ស្កាត់ និងបញ្ឈប់នូវការផ្សព្វផ្សាយពាណិជ្ជកម្មឱសថបុរាណ និងឱសថគ្រប់ប្រភេទដែលគ្មានការអនុញ្ញាតពីក្រសួងសុខាភិបាល។

ការស្នើនេះ បន្ទាប់ពីក្រសួងសង្គេតឃើញកន្លងមក មានការផ្សព្វផ្សាយលក់ផលិតផលឱសថឈ្មោះ CALCUTIL និងឱសថផ្សេងទៀត ដោយគ្មានច្បាប់អនុញ្ញាតពីក្រសួងសុខាភិបាល ព្រមទាំងបានប្រើប្រាស់ខ្លឹមសារផ្សព្វផ្សាយបំភ្លើសហួសពីការពិត ដែលនាំឱ្យប្រជាពលរដ្ឋមានការភាន់ច្រឡំ និងអាចប៉ះពាល់ដល់សុខភាព។

តាមលិខិតរបស់ក្រសួងព័ត៌មាន ដែលចុះផ្សាយកាលពីពេលថ្មីៗនេះ បានបញ្ជាក់ថា ដើម្បីចូលរួមការពារប្រយោជន៍របស់ប្រជាពលរដ្ឋ និងសុខភាពសាធារណៈ កាត់បន្ថយផលអវិជ្ជមាននៃការប្រើប្រាស់ឱសថ ដែលគ្មានប្រភពច្បាស់លាស់ ក្រសួងព័ត៌មានស្នើសុំម្ចាស់ស្ថានីយវិទ្យុ ទូរទស្សន៍ ប្រព័ន្ធផ្សព្វផ្សាយទាំងអស់ ចូលរួមសហការ ដោយបញ្ឈប់ការផ្សព្វផ្សាយចលក់ផលិតផលឱសថឈ្មោះ CALCUTIL និងលុបមាតិការដែលបានផ្សេព្វផ្សាយកន្លងមកពាក់ព័ន្ធនឹងផលិតផលខាងលើ និងឱសថគ្រប់ប្រភេទ ដែលគ្មានការអនុញ្ញាតពីក្រសួងសុខាភិបាល។

មួយវិញទៀត រាល់ការផ្សព្វផ្សាយផលិតផលឱសថ ត្រូវត្រួតពិនិត្យឱ្យបានច្បាស់លាស់លើលេខបញ្ជិការ និងមានការអនុញ្ញាតពីក្រសួងសុខាភិបាល៕