ព័ត៌មានអន្ដរជាតិ

ហ៊ូធី លែងសូវហ៊ានបាញ់មីស៊ីល ក្រោយអាមេរិកវាយប្រហារជាង ៨០០លើក តាំងពីពាក់កណ្ដាលខែមីនា

បានផុស

១២ ខែ មុន

នៅ

ថ្ងៃចន្ទ ២៨ មេសា ២០២៥

ដោយ

Chheang

សហរដ្ឋអាមេរិក បានធ្វើការវាយប្រហារតាមអាកាសជាង ៨០០លើកប្រឆាំងនឹងគោលដៅក្រុមហ៊ូធី នៅក្នុងប្រទេសយេម៉ែន ចាប់តាំងពីថ្ងៃទី១៥ខែមីនាឆ្នាំ២០២៥ ក្រោមប្រតិបត្តិការ«Rough Rider» ដែលជាការកើនឡើងគួរឲ្យកត់សម្គាល់នៅក្នុងយុទ្ធនាការយោធារបស់ខ្លួនប្រឆាំងនឹងក្រុមឧទ្ទាមដែលមានការគាំទ្រដោយអ៊ីរ៉ង់។

យោធាអាមេរិករាយការណ៍ថា ការវាយប្រហារទាំងនេះបាននាំឲ្យមានការថយចុះ ៦៩% នៃការបាញ់មីស៊ីលបាលិស្ទិករបស់ហ៊ូធី និងកាត់បន្ថយ ៥៥% នៃការវាយប្រហារដោយយន្តហោះគ្មានមនុស្សបើក។ ប្រតិបត្តិការនេះក៏បានបណ្តាលឲ្យស្លាប់មេដឹកនាំ និងយុទ្ធជនរាប់រយនាក់របស់ក្រុមហ៊ូធីផងដែរ ជាពិសេសជនសកម្មប្រយុទ្ធដែលពាក់ព័ន្ធនឹងកម្មវិធីមីស៊ីល និងយន្តហោះគ្មានមនុស្សបើក។

ការវាយប្រហារដ៏ធំជាងគេរបស់អាមេរិកលើក្រុមហ៊ូធី ធ្វើឡើងកាលពីថ្ងៃទី១៨ខែមេសា ដែលបានកំណត់គោលដៅលើកំពង់ផែប្រេង Ras Isa បណ្ដាលឲ្យមនុស្សស្លាប់យ៉ាងហោចណាស់ ៧៤នាក់ និងរបួស ១៧១នាក់ផ្សេងទៀត។

ជាការឆ្លើយតប ក្រុមហ៊ូធី បានបាញ់ទម្លាក់យន្តហោះគ្មានមនុស្សបើក MQ-9 Reaper របស់សហរដ្ឋអាមេរិកចំនួន ៧គ្រឿង ដែលមានតម្លៃជាង ២០០លានដុល្លារ។

សូមបញ្ជាក់ថា អាមេរិកបន្តកំណត់គោលដៅលើហេដ្ឋារចនាសម្ព័ន្ធក្រុមហ៊ូធី គឺដើម្បីរារាំងការវាយប្រហារលើផ្លូវដឹកជញ្ជូននៅសមុទ្រក្រហម និងដើម្បីទប់ទល់ឥទ្ធិពលអ៊ីរ៉ង់ក្នុងតំបន់៕