ស្លាប់១១នាក់ក្នុងហេតុការណ៍រថយន្តបើកបុកហ្វូងមនុស្សក្នុងទីក្រុង Vancouver ប្រទេសកាណាដា

មនុស្ស១១នាក់ដែលមានអាយុចន្លោះពី ៥ទៅ៦៥ឆ្នាំ បានស្លាប់ក្នុងហេតុការណ៍រថយន្តបើកបុកហ្វូងមនុស្សនៅឯពិធីបុណ្យរបស់ជនជាតិហ្វីលីពីនក្នុងទីក្រុង Vancouver ប្រទេសកាណាដាកាលពីថ្ងៃអាទិត្យ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៨ខែមេសានេះ។

មិនត្រឹមតែមានមនុស្សស្លាប់១១នាក់ទេ មនុស្សរាប់សិបនាក់ទៀតក៏បានរងរបួស ដោយ​​ជនរងគ្រោះ​ខ្លះរបួសធ្ងន់ ក្នុងហេតុការណ៍រថយន្តម៉ាក Audi SUV ពណ៌ខ្មៅ បើកបុកមនុស្សចូលរួមពិធីបុណ្យ Lapu Lapu Day​ ដែលជាពិធីបុណ្យរបស់ជនជាតិហ្វីលីពីនរស់នៅទីក្រុង Vancouver។

ជនបង្កហេតុដែលចាប់ខ្លួនបាននៅកន្លែងកើតហេតុគឺជាលោក Kai-Ji Adam Lo អាយុ ៣០ ជាអ្នករស់នៅទីក្រុងVancouver ត្រូវបានអយ្យការរបស់រដ្ឋ British Columbia ចោទប្រកាន់ចំនួនប្រាំបីករណីនៃឃាតកម្មកម្រិតទីពីរហើយអាចនឹងមានបទចោទប្រកាន់បន្ថែមទៀត ខណៈក្រុមអ្នកស៊ើបអង្កេតបានឲ្យដឹងថាលោក Lo មានប្រវត្តិមានបញ្ហាផ្លូវចិត្ត។

ហេតុការណ៍នេះគឺជាសោកនាដកម្មដែលបានអង្រួនប្រទេសកាណាដានៅមុនការបោះឆ្នោតសហព័ន្ធផងដែរ ដោយនាយករដ្ឋមន្ត្រីកាណាដា Mark Carney បានលុបចោលព្រឹត្តិការណ៍យុទ្ធនាការលើកដំបូងរបស់លោក និងការប្រមូលផ្តុំធំចំនួនពីរនៅថ្ងៃចុងក្រោយនៃយុទ្ធនាការបោះឆ្នោត។

ពាក់ព័ន្ធទៅនឹងហេតុការណ៍នេះ ប្រធានាធិបតីហ្វីលីពីនលោក Ferdinand Marcos Jr. បានចេញសេចក្តីថ្លែងការណ៍មួយដោយសម្តែងការអាណិតអាសូរចំពោះជនរងគ្រោះ និងក្រុមគ្រួសាររបស់ពួកគេ។ លោកបាននិយាយថា៖«អគ្គកុងស៊ុលហ្វីលីពីននៅទីក្រុង Vancouver កំពុងធ្វើការជាមួយអាជ្ញាធរកាណាដា ដើម្បីធានាថាឧប្បត្តិហេតុនេះនឹងត្រូវបានស៊ើបអង្កេតឱ្យបានហ្មត់ចត់ ហើយជនរងគ្រោះ និងក្រុមគ្រួសាររបស់ពួកគេត្រូវបានគាំទ្រ និងជួយសម្រាលទុក្ខ» ៕

គួរបញ្ជាក់ថាទីក្រុង Vancouver មានជនជាតិហ្វីលីពីន ៣៨៦០០ នាក់ក្នុងឆ្នាំ ២០២១ស្មើនឹង ៥.៩% នៃចំនួនប្រជាជនសរុបរបស់ទីក្រុងនេះ បើយោងតាមស្ថិតិប្រទេសកាណាដាដែលជាទីភ្នាក់ងារដែលធ្វើជំរឿនជាតិ៕

អត្ថបទ៖ ប៊ុន សុភាព