កាន់តែក្តៅ! រដ្ឋមន្ត្រីប៉ាគីស្ថាន គំរាមបាញ់នុយក្លេអ៊ែរ លើ ឥណ្ឌា

ហេតុការណ៍បាញ់ប្រហារសម្លាប់អ្នកទេសចរមួយក្រុមនៅតំបន់កាស្មៀរ បានធ្វើឲ្យជម្លោះរវាងទីក្រុងញីវដែលីនិងអ៊ីស្លាម៉ាបាដ កាន់តែឡើងកម្តៅខ្លាំង ដល់ថ្នាក់ឥឡូវនេះ រដ្ឋមន្ត្រីប៉ាគីស្ថានមួយរូប គំរាមបាញ់នុយក្លេអ៊ែរ លើប្រទេសឥណ្ឌា ថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការគំរាមនេះគឺចេញពីមាត់រដ្ឋមន្ត្រីក្រសួងផ្លូវដែក Hanif Abbasi អំឡុងពេលថ្លែងសុន្ទរកថា តាមទូរទស្សន៍កាលពីថ្ងៃអាទិត្យទី២៧ខែមេសាឆ្នាំ២០២៥ និងត្រូវបានយកមកចុះផ្សាយដោយសារព័ត៌មាន RT របស់រុស្ស៊ី។

ដោយសំដៅទៅឥណ្ឌា, លោក Abbasi លើកឡើងថា «គ្មាននរណាដឹងថាយើង ដាក់ក្បាលគ្រាប់របស់យើងនៅទីណាទេក្នុងប្រទេស។ ខ្ញុំសូមនិយាយម្តងទៀត មីស៊ីលប៉ាលីស្ទិកទាំងនោះ នឹងហោះទៅរកអ្នក។ យើងមានមីស៊ីលច្រើននិងក្បាលគ្រាប់នុយក្លេអ៊ែរ១៣០គ្រាប់ មិនមែនទុកតាំងទេ»។

ទន្ទឹមនោះ ពាក់ព័ន្ធការសម្រេចចិត្តរបស់ទីក្រុងញូវដែលីក្នុងការផ្អាកជាឯកតោភាគីនូវសន្ធិសញ្ញាចែករំលែកទឹកដ៏សំខាន់, លោក Abbasi ព្រមានថា «ប្រសិនបើគេបញ្ឈប់ការផ្គត់ផ្គង់ទឹកដល់យើង នោះគេគួរតែត្រៀមខ្លួនជាមួយនឹងសង្រ្គាមឲ្យហើយទៅ»។

សូមជម្រាបថា ទំនាក់ទំនងរវាងអ្នកជិតខាងទាំងពីរនេះ បានឈានដល់ភាពតានតឹងខ្លាំងសាជាថ្មី ក្រោយខ្មាន់កាំភ្លើងបើកការបាញ់ប្រហារសម្លាប់ទេសចរឥណ្ឌា២៥នាក់និងនេប៉ាល់ម្នាក់ នៅជ្រលង Baisaran ដែលជាទីតាំងទេសចរណ៍ដ៏ពេញនិយមក្នុងតំបន់កាស្មៀរ។

ក្រោយមក ប្រទេសទាំងពីរក៏ចោទប្រកាន់ដាក់គ្នា និងចាត់វិធានការក្តៅរៀងខ្លួន ឈានដល់ការបិទច្រកព្រំដែន និងបណ្តេញមន្ត្រីទូតទៅវិញទៅមកទៀតផង។

និយាយពីនុយក្លេអ៊ែរវិញ ប្រទេសឥណ្ឌា មានកាន់កាប់ក្បាលគ្រាប់ចន្លោះពី១៦៤ទៅ១៨០គ្រាប់ ហើយប្រកាន់គោលការណ៍ មិនបាញ់គេមុនទេ ខណៈប៉ាគីស្ថាន មានកាន់កាប់ក្បាលគ្រាប់ប្រហែល១៧០គ្រាប់ ប៉ុន្តែមិនមានគោលការណ៍ដូចឥណ្ធាឡើយ៕

អត្ថបទ៖ សុខ សុវណ្ណ

ចុចអាន៖ ឥណ្ឌាប្រកាសជូនរង្វាន់ ២៣ ៤០០ដុល្លារអាមេរិក ឲ្យអ្នកផ្តល់ព័ត៌មាន ឈានដល់ការចាប់ខ្លួនខ្មាន់កាំភ្លើង នៅកាស្មៀរ