ពលរដ្ឋ​រង​គ្រោះ​ដោយ​ខ្យល់​កន្ត្រាក់១០គ្រួសារ ទទួល​អំណោយ​ពី​កាក​បាទ​ក្រហម​កម្ពុជា​ខេត្ត​បន្ទាយ​មានជ័យ

បន្ទាយមានជ័យ ៖ លោក អ៊ុំ រាត្រី ប្រធាន​គណៈកម្មាធិការ​សាខាកាកបាទក្រហមកម្ពុជា​ខេត្តបន្ទាយមានជ័យ រួម​នឹង​ក្រុម​ការងារ​សាខាកាកបាទក្រហម​កម្ពុជា​ខេត្ត អនុសាខាកាកបាទក្រហម​ស្រុក​អូរជ្រៅ កាល​ពី​រសៀល​ថ្ងៃ​ទី២៣ ខែមេសា ឆ្នាំ២០២៥ បាន​នាំ​យក​អំណោយ​មនុស្សធម៌​ចែក​ជូន​ដល់​ពលរដ្ឋ​ទីទ័ល​ក្រ​រងគ្រោះ​ដោយ​សារ​ខ្យល់​កន្ត្រាក់ ១០គ្រួសារ នៅ​ក្នុង​ឃុំចង្ហា និងឃុំសំរោង ស្រុកអូរជ្រៅ។

លោក កែវ តារារស្មី ប្រធានអនុសាខាកាកបាទក្រហមស្រុកអូរជ្រៅ បានឱ្យដឹងថា កាលពីវេលាម៉ោង ១៦.០៥នាទីរសៀល ថ្ងៃទី២១ ខែមេសា ឆ្នាំ២០២៥កន្លងទៅ មានករណីខ្យល់កន្ត្រាក់ បណ្តាលឱ្យប៉ះពាល់ដល់ផ្ទះប្រជាពលរដ្ឋចំនួន១៤ខ្នង ជាមួយគ្នានោះក៍បើងខូចបន្ទប់ទឹក , ជង្រុក និងរោងចំនួន៤ខ្នង ខូចខាតស័ង្កសីសរុបចំនួន២២៦សន្លឹក លើឃុំចំនួន២គឺឃុំចង្ហា ប៉ះពាល់ផ្ទះសរុប ចំនួន១២ខ្នង, ជង្រុក២ខ្នង និងរោងចំនួន៤ខ្នង ខូចខាតស័ង្កសីសរុបចំនួន ១៦៧សន្លឹក លើភូមិចំនួន៣, ចំណែកឃុំសំរោង ប៉ះពាល់ផ្ទះសរុបចំនួន២ខ្នង បន្ទប់ទឹកវត្តវត្តអញ្ចាញ ចំនួន ១ខ្នង ៦បន្ទប់ ខូចខាតស័ង្កសីសរុបចំនួន ៥៩សន្លឹក លើភូមិចំនួន២។

ក្នុងចំណោមពលរដ្ឋដែលទទួលរងគ្រោះដោយសារគ្រោះធម្មជាតិខ្យល់ កន្ត្រាក់ ដែលទទួលបានអំណោយពីសាខាកាកបាទក្រហមកម្ពុជាខេត្តនេះមាន១០គ្រួសារ ជាគ្រួសារតែមានជីវភាពទីទ័លក្រ។

លោក អ៊ុំ រាត្រី ក៏បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូន​ចំពោះ​បងប្អូនរងគ្រោះដោយសារ​ខ្យល់កន្ត្រាក់ដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែ​គិតគូរយកចិត្តទុកដាក់លេីសុខទុក្ខបងប្អូនពលរដ្ឋជាខ្លាំង ទោះស្ថិតនៅទីណា កន្លែងណា ក៏ដោយ ពេលរដ្ឋមានទុក្ខតែងមានមុខកាកបាទក្រហមទៅដល់ទីនោះជានិច្ច ដោយមិនទុកឱ្យបងប្អូនណាម្នាក់រងទុក្ខស្លាប់ដោយអត់អាហារនោះឡើយ ពោលកាកបាទក្រហមកម្ពុជា នៅរួមសុខ រួម ទុក្ខជាមួយបងប្អូនគ្រប់ កាលៈទេសៈ ដោយគ្មានការរើសអើងនិន្នាការ នយោបាយ ពូជសាសន៍ ឬ ពណ៌​សម្បុរអ្វីឡេីយ។

សូម​បញ្ជាក់​ថា ពលរដ្ឋរងគ្រោះដោយសារខ្យល់កន្រ្ដាក់ទាំង១០គ្រួសារ(ឃុំចង្ហា៩គ្រួសារ និងឃុំសំរោង១គ្រួសារ) ក្នុងមួយគ្រួសារទទួលបាន អង្ករ ២៥គីឡូក្រាម, មីជាតិ ១កេស, ត្រីខ ១យួរ, ទឹកត្រី ១យួរ, មុង១, ភួយ១, សារុង១, ក្រមា១ រួមនឹងថវិកា ២ម៉ឺនរៀល៕

ដោយ ៖ អពៅ