ព័ត៌មានជាតិ
ការចោទថា ចិនពង្រីកវត្តមានយោធានៅមូលដ្ឋានទ័ពរាម អ្នកនាំពាក្យ «បានបដិសេធ»
ប្រតិកម្មទៅនឹងការបន្តចោទប្រកាន់យ៉ាងគឃ្លើន ថា ចិនកំពុងពង្រីកវត្តមានយោធារបស់ខ្លួនក្នុងមូលដ្ឋានទ័ពសមុទ្ររាម កម្ពុជាបានចេញមុខបដិសេធ និងចាត់ទុកថា នេះជាចេតនាទុច្ចរិត បង្កឱ្យមានការភ័ន្តច្រឡំ ដែលផ្ទុយនឹងការពិតជាក់ស្ដែង។

ការប្រកាសបដិសេធជាថ្មីម្ដងទៀតរបស់កម្ពុជា គឺបន្ទាប់ពីមានចុះផ្សាយដោយសារព័ត៌មានក្រៅប្រទេសមួយចំនួន ដោយសំអាងលើការរកឃើញរបស់ស្ថាប័នស្រាវជ្រាវមួយរបស់សហរដ្ឋអាមេរិក ថា យោធាចិនកំពុងមានសិទ្ធិផ្ដាច់មុខប្រើប្រាស់ផ្នែកខ្លះនៃមូលដ្ឋានទ័ពរាម ហើយចិនក៏កំពុងពង្រីកវត្តមានយោធារបស់ខ្លួនលើសពីមូលដ្ឋានទ័ពរាម។
អ្នកនាំពាក្យនៃក្រសួងការពារជាតិ នាយឧត្តមសេនីយ៍ ឈុំ សុជាត បានប្រកាសច្រាលចោលទាំងស្រុងចំពោះការចោទប្រកាន់នេះ ដោយលោកបានចាត់ទុកថា មានលក្ខណៈញុះញង់ និងចេតនាទុច្ចរិត ដែលនាំឱ្យមានការភ័ន្តច្រឡំពាក់ព័ន្ធនឹងមូលដ្ឋានកងទ័ពជើងទឹកសមុទ្ររាមរបស់កម្ពុជា។

នាយឧត្តមសេនីយ៍ ឈុំ សុជាត បានអះអាងនៅថ្ងៃពុធ ទី២១ ខែឧសភានេះ ថា រាជរដ្នាភិបាល និងក្រសួងការពារជាតិកម្ពុជា បានប្រកាសជាញឹកញាប់រួចមកហើយ ថា កម្ពុជាជាប្រទេសអព្យាក្រឹត ហើយរដ្ឋធម្មនុញ្ញកម្ពុជា ក៏មិនអនុញ្ញាតបរទេសណាយកទឹកដីកម្ពុជាធ្វើជាមូលដ្នានយោធាដាច់ខាត។
លោកនាយឧត្តមសេនីយ៍ បន្ថែមថា ក្រោយការដាក់ឱ្យដំណើរការប្រើប្រាស់កន្លងមក កម្ពុជាបានអនុញ្ញាតឱ្យនាវាបរទេសចូលមកសំចតជាហូរហែនៅកំពង់ផែសមុទ្ររាម ដែលក្នុងនោះមាននាវាកងទ័ពជប៉ុន ត្រូវបានអនុញ្ញាតឱ្យចូលចតមុនគេបង្អស់ បន្ទាប់ពីផែសមុទ្ររាមត្រូវបានសម្ពោធជាផ្លូវការ បន្ទាប់មកមាននាវាកងទ័ពវៀតណាម នាវាចិនជាដើម។ លោក បានអះអាងពីភាពរីករាយរបស់ប្រតិភូនាវាបរទេសទាំងនោះ ក្រោយបានចូលចតនៅកំពង់ផែសមុទ្ររាម ដែលនេះគឺជាភស្តុតាងជាក់ស្តែងគ្រប់គ្រាន់អាចបញ្ជាក់ពីការគ្រប់គ្រងប្រើប្រាស់កំពង់ផែសមុទ្ររាមរបស់កម្ពុជា។

ក្នុងឱកាសសម្ពោធដាក់ឱ្យដំណើរការជាផ្លូវការនូវមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម កាលពីថ្ងៃទី៥ ខែមេសា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានប្រកាសស្វាគមន៍ផងដែរនូវបណ្តាកងទ័ពប្រទេសជាមិត្តទាំងអស់ដែលចង់មកចូលចតនៅកំពង់ផែរាមប្រទេសកម្ពុជា ដើម្បីធ្វើការហ្វឹកហ្វឺនរួមគ្នា។
ទោះជាយ៉ាងនេះក្តី រាល់នាវាកងទ័ពបរទេស ដែលចង់ចូលមកចតនៅកំពង់ផែរាម ត្រូវតែជូនដំណឹងមកកម្ពុជាដែលជាម្ចាសផ្ទះជាមុន រួមទាំងនាវាកងទ័ពរបស់ប្រទេសចិនផងដែរ ហើយកម្ពុជាសង្ឃឹមថា នៅថ្ងៃខាងមុខនឹងមាននាវាកងទ័ពប្រទេសជាមិត្តជាបន្តបន្ទាប់ទៀត នឹងចូលចតនៅកំពង់ផែរាមនេះ។

នេះមិនមែនជារឿងថ្មីទេ ដែលមានការចោទប្រកាន់មកលើកម្ពុជា ជុំវិញមូលដ្ឋានទ័ពរាមនេះ។ រឿងមូលដ្ឋានទ័ពរាម គឺបានក្លាយជាប្រធានបទក្ដៅដែលជាញឹកញាប់ ទាំងក្រុមប្រឆាំងនៅក្រៅប្រទេស សារព័ត៌មានបរទេស ក៏ដូចជាប្រទេសធំៗខ្លះ តែងតែព្យាយាមចោទប្រកាន់មកលើកម្ពុជា ថា បានអនុញ្ញាតឱ្យមានមូលដ្ឋានយោធាចិននៅលើទឹកដីរបស់ខ្លួន ពោលគឺចោទថា នៅមូលដ្ឋានសមុទ្ររាមនេះតែម្ដង។
កម្ពុជា បានបញ្ជាក់ថា មូលដ្ឋានសមុទ្ររាម គឺគ្រាន់តែធ្វើទំនើបកម្មសម្រាប់ការពង្រឹងសន្តិសុខដែនសមុទ្ររបស់ខ្លួនតែប៉ុណ្ណោះ ក្នុងគោលបំណងកែលម្អកន្លែងចូលសំចតសម្រាប់នាវាយោធា និងស៊ីវិល ដែលអនុញ្ញាតឱ្យមានសេវាថែទាំកាន់តែប្រសើរឡើងនៅក្នុងដែនទឹកកម្ពុជា។ តាមការអះអាងរបស់នាយករដ្ឋមន្ត្រី សម្តេចធិបតី ហ៊ុន ម៉ាណែត គឺកម្ពុជា មិនបានប្រគល់សិទ្ធិឱ្យភាគីចិនគ្រប់គ្រងមូលដ្ឋានសមុទ្ររាមនោះឡើយ៕
ដោយ៖ ធឿន វ៉ាន់សុង

-
ចរាចរណ៍៤ ថ្ងៃ ago
ស្នងការខេត្តប៉ៃលិន បំភ្លឺជុំវិញករណីគ្រោះថ្នាក់ចរាចណ៍បណ្តាលឱ្យស្លាប់ភាគីជិះម៉ូតូ
-
សន្តិសុខសង្គម២ ថ្ងៃ ago
ស្នងការរាជធានី ប្រកាសតែងតាំងលោកវរសេនីយ៍ទោ ប៉ាង សាវឿន ឲ្យគ្រប់គ្រងការិយាល័យគណនេយ្យ ចំណុះផែនការងារភស្តុភារ និងហិរញ្ញវត្ថុ
-
ចរាចរណ៍៦ ថ្ងៃ ago
Update៖ អ្នកបង្កគ្រោះថ្នាក់បុករះនៅមុខក្រសួងមហាផ្ទៃ ជានាយការិយាល័យគណនេយ្យ ចំណុះផែនការងារភស្តុភារ និងហិរញ្ញវត្ថុ នៃស្នងការដ្ឋាននគរបាលរាជធានីភ្នំពេញ
-
ចរាចរណ៍៦ ថ្ងៃ ago
Update៖ អ្នកបើករថយន្ដបុករះនៅមុខក្រសួងមហាផ្ទៃ ស្ថិតក្រោមជាតិអាល់កុល 0,35mg/L
-
សន្តិសុខសង្គម១ សប្តាហ៍ ago
ឃាត់ខ្លួនប្រធានផ្សារទួលពង្រ និងបក្ខពួក ពាក់ព័ន្ធករណីដើរយកភាស៊ីពីអាជីវករលក់ដូរតាមរ៉ឺម៉កម៉ូតូ
-
ព័ត៌មានជាតិ៣ ថ្ងៃ ago
មន្ត្រីសុខាភិបាល អំពាវនាវឱ្យពលរដ្ឋចាក់វ៉ាក់សាំង Pfizer ដើម្បីការពារវីរុសបំប្លែងថ្មី JN.1
-
ព័ត៌មានជាតិ២២ ម៉ោង ago
អតីតភិក្ខុសង្ឃល្បីឈ្មោះ៥រូប កំពុងកាន់តំណែងជាន់ខ្ពស់ក្នុងស្ថាប័នរដ្ឋ
-
កីឡា៥ ថ្ងៃ ago
លោក អេ ភូថង ប្រាប់ថា មិនដឹងរឿងផ្ទាល់ខ្លួនរបស់ ធឿន ធារ៉ា ខណៈបែកធ្លាយវីដេអូជក់បារីអេឡិចត្រូនិក