នាវាវៀតណាម ចូលចតនៅមូលដ្ឋានសមុទ្ររាមរយៈពេល៣ថ្ងៃ

នាវាកងទ័ពជើងទឹកប្រជាជនវៀតណាម ០១គ្រឿង លេខ២៦១ ដឹកនាំដោយ វរនាវីឯកបម្រុង ម៉ាយ ដាំងហ្សាញ់ មេបញ្ជាការរង និងជានាយសេនាធិការ បញ្ជាការដ្ឋានតំបន់៥ កងទ័ពជើងទឹកប្រជាជនវៀតណាម បានចូលសំចតនៅកំពង់ផែមូលដ្ឋានសមុទ្ររាម(ផែលេខ២) នៅវេលាម៉ោង ៤ និង២០នាទីល្ងាច ថ្ងៃទី២៧ ខែមេសា ឆ្នាំ២០២៥។ នេះបើតាមសំណេរនៅលើទំព័រហ្វេសប៊ុកទីបញ្ជាការជួរមុខអគ្គលេខាធិការដ្ឋាននៃគណៈកម្មាធិការជាតិសន្តិសុខលំហរសមុទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពដដែលនាវាដែលមានបណ្ដោយ ៤៩.៥៦ម៉ែត្រ ទទឹង ៩.២ម៉ែត្រ ទម្ងន់ ផ្ទុក ៣៧៥តោន ជម្រៅទឹក២.៣ម៉ែត្រ ដឹកនាវិក ៣៧នាក់ ចូលនៅមូលដ្ឋានសមុទ្ររាមរយៈពេល ៣ថ្ងៃ ចាប់ពីថ្ងៃទី២៧ ដល់ថ្ងៃទី២៩ ខែមេសា ឆ្នាំ២០២៥ ។

នាវារបស់វៀតណាមនេះ គឺជានាវាបរទេសទី២ហើយដែលត្រូវបានអនុញ្ញាតឱ្យចូលសំចតនៅផែមូលដ្ឋានសមុទ្ររាម(ផែលេខ២) ក្រោយពីបានសម្ពោធដាក់ឱ្យប្រើប្រាស់ជាផ្លូវការនូវមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម កាលពីថ្ងៃទី៥ ខែមេសា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។

នាវាបរទេសដែលចូលចតនៅមូលដ្ឋានសមុទ្ររាមដំបូងបង្អស់ គឺជានាវារបស់ជប៉ុន។ កាលណោះនាវាជប៉ុនចំនួនពីរគ្រឿង បានចូលចតនៅកម្ពុជារយៈពេល ៤ថ្ងៃ ចាប់ពីថ្ងៃទី ១៩ ដល់២២ ខែមេសាឆ្នាំ ២០២៥។

សូមរំលឹកថា នាយករដ្ឋមន្ត្រី សម្ដេចធិបតី ហ៊ុន ម៉ាណែត បានប្រកាសបើកទ្វារស្វាគមន៍រាល់នាវាមិត្តទាំងអស់ដែលមកហ្វឹកហ្វឺននៅមូលដ្ឋានសមុទ្ររាម ចាប់ពីថ្ងៃសម្ពោធដាក់ឱ្យប្រើប្រាស់ជាផ្លូវការ ថ្ងៃទី៥ ខែមេសា ឆ្នាំ២០២៥តទៅ។

ពីពិធីសម្ពោធដាដាក់ឲ្យប្រើប្រាស់កំពង់ផែទេសចរណ៍អន្តរជាតិកំពត កាលពីថ្ងៃទី២១ ខែមេសា សម្ដេច ហ៊ុន ម៉ាណែត បានឱ្យដឹងថានាវារុស្ស៊ី ឥណ្ឌា និងសហរដ្ឋអាមេរិក ក៏នឹងចូលចតនៅមូលដ្ឋានសមុទ្ររាមជាបន្តបន្ទាប់៕

ដោយ÷ ង៉ិល ណារ៉ាត់