ក្រសួងការពារជាតិស្នើឱ្យចាត់វិធានការលើសកម្មជនប្រឆាំងក្លែងឯកសណ្ឋានកងទ័ព ធ្វើសកម្មភាពបំបាក់ទឹកចិត្តកងទ័ព  

ក្រសួងការពារជាតិកម្ពុជា​ តាមរយៈអ្នកនាំពាក្យ ឈុំ សុជាត បានស្នើឱ្យសមត្ថកិច្ចសហការចាប់ខ្លួន សកម្មជនប្រឆាំងឈ្មោះ អែម ពិសិដ្ឋ កំពុងជ្រកកោននៅប្រទេសថៃ ក្លែងឯកសណ្ឋានកងទ័ព ផលិតវីដេអូ ដែលមានចរិតញុះញង់ បំផ្លាញទឹកចិត្តកងទ័ពក្នុងពេលកម្ពុជាកំពុងប្រឈមនឹងបញ្ហាព្រំដែនជាមួយថៃ។​ អ្នកនាំពាក្យក្រសួងការពារជាតិ ស្នើទៅសមត្ថកិច្ចដូច្នេះ បន្ទាប់ពីសង្កេតឃើញថាថ្មីៗនេះ បុគ្គលឈ្មោះ អែម ពិសិដ្ឋ ភេទប្រុស អាយុ៣៧ឆ្នាំ ក្លែងធ្វើជាទាហានជួរមុខ ដោយផលិតវីដេអូបង្ហោះតាមគណនី TikTok ឈ្មោះ “Amy Richard310” និងហ្វេសប៊ុកឈ្មោះ “Piseth PG EM” ដើម្បីញុះញង់បំបាក់ទឹកចិត្តកងទ័ព ធ្វើឱ្យសាធារណជនជាច្រើនមានការយល់ច្រឡំ។

បើតាមនាយឧត្ដមសេនីយ៍ ឈុំ សុជាត បុគ្គល អែម ពិសិដ្ឋ នេះ មិនមែនជាយោធិននោះទេ ពោលរូបគេគឺជាសកម្មជនក្រុមប្រឆាំង ដែលមានតួនាទីជាប្រធានបណ្តាញយុវជនកម្ពុជាសកប្រចាំប្រទេសថៃ ហើយមានស្រុកកំណើតនៅ ភូមិចំការអណ្តូង ឃុំចំការអណ្តូង ស្រុកចំការលើ ខេត្តកំពង់ចាម។

តាមរយៈបណ្ដាញសង្គម អ្នកនាំពាក្យក្រសួងការពារជាតិកម្ពុជា វាយតម្លៃអំពីសកម្មភាពរបស់បុគ្គល អែម ពិសិដ្ឋថា ប៉ះពាល់កងទ័ពធ្ងន់ធ្ងរ និងស្នើសមត្ថកិច្ចចាត់វិធានការដូច្នេះ៖« ការសម្តែងគ្រងឯកសណ្ឋានកងទ័ពក្លែងក្លាយ និងសកម្មភាពនានារបស់បុគ្គលនេះ ដែលធ្វើឱ្យប៉ះពាល់ដល់កងទ័ព គឺជាទង្វើខុសច្បាប់ដ៏ធ្ងន់ធ្ងរបំផុត ដែលត្រូវតែមានវិធានការ មិនអាចលើកលែងបាន​ ជាពិសេសក្នុងពេលដែលកងទ័ពកម្ពុជាកំពុងប្រឈមមុខនឹងកងទ័ពថៃ នៅចំណុចព្រំដែនរវាងប្រទេសទាំងពីរ។ ខ្ញុំសូមស្នើឱ្យក្រសួងមានសមត្ថកិច្ច ចាត់វិធានការផ្លូវច្បាប់លើជននេះ ឱ្យបានម៉ឺងម៉ាត់បំផុត»។

ជុំវិញករណី បុគ្គល អែម ពិសិដ្ឋ ក្លែងឯកសណ្ឋានកងទ័ព ធ្វើសកម្មភាពបំបាក់ទឹកចិត្តកងទ័ព​ សម្ដេចតេជោ ហ៊ុន សែន បានហៅសកម្មជនរូបនេះ ថាជាជន​ក្បត់ជាតិ ឃុបឃិតជាមួយសត្រូវដែលឈ្លានពានខ្មែរ។ សម្ដេចតេជោ ហ៊ុន សែន ថាបើអាជ្ញាធរថៃមិនបញ្ចូនបុគ្គលអែម ពិសិដ្ឋ  មកឱ្យកម្ពុជា នោះគឺបានន័យថា ថៃពិតជាឃុបឃិតជាមួយបុគ្គលនេះមែន។

សម្ដេចតេជោ ហ៊ុន សែន បានសរសេរលើហ្វេសប៊ុកដូច្នេះថា៖ «អំពើក្បត់ជាតិ គឺបែប​នេះឯង ទាំងមេ ទាំងកូន គឺដូចគ្នា។ប្រទេសប្រឈមមុខជាមួយនឹងការឈ្លានពាន​របស់បរទេស បែរជាទៅឃុបឃិតជាមួយបរទេសមកបំផ្លាញខ្មែរ។ ប្រសិនបើអាជ្ញាធរថៃ មិនឃុបឃិតជាមួយជននេះទេ គួរតែក្លាហានចាប់ជននេះបញ្ជូនឲ្យអាជ្ញាធរកម្ពុជា ដើម្បីចាត់វិធានការតាមផ្លូវច្បាប់ »។

ជាមួយគ្នា នាយឧត្ដមសេនីយ៍ ឈុំ សុជាត អ្នកនាំពាក្យក្រសួងការពារជាតិកម្ពុជា អំពាវនាវដល់អ្នកប្រើប្រាស់បណ្តាញសង្គម និងប្រជាពលរដ្ឋទាំងអស់ កុំជឿលើការឃោសនាបោកបញ្ឆោត ដូចករណីរបស់បុគ្គល អែម ពិសិដ្ឋ នេះ  និងត្រូវប្រុងប្រយ័ត្ន កុំចែកចាយព័ត៌មានទាំងឡាយដែលប៉ះពាល់ដល់កងទ័ព និងត្រូវជឿ និងតាមដានព័ត៌មានផ្លូវការដែលចេញពីរាជរដ្ឋាភិបាលកម្ពុជា និងក្រសួងការពារជាតិ ដែលជាប្រភពព័ត៌មានមានភាពត្រឹមត្រូវ ពិតប្រាកដ និងអាចជឿទុកចិត្តបាន៕