ឃុំដារប៉ុន្មាន​ឆ្នាំ​ចុងក្រោយ​កាន់តែ​អភិវឌ្ឍ​ ​មានទាំងផ្លូវក្រាលកៅស៊ូ ផ្លូវបេតុង និងផ្លូវលំខ្វាត់​ខ្វែង

លោក នៅ យ៉ុន ជាមេភូមិដារ ក្នុងឃុំដារ ស្រុកចិត្របុរី ខេត្តក្រចេះ បានឲ្យដឹងថា សព្វថ្ងៃនេះនៅក្នុងឃុំដារក៏ដូចជានៅតាមបណ្តាភូមិក្នុងមូលដ្ឋានទាំងមូល មានការអភិវឌ្ឍន៍រីកចម្រើនច្រើន ដោយមានទាំងផ្លូវលំនិងផ្លូវបេតុងខ្វាត់ខ្វែង។

កាលពីមុនមានតែផ្លូវរទះគោ ក្របី និងមានក្រឡុកភក់ធំៗពិបាកធ្វើដំណើរ ក្នុងការដឹកជញ្ជូនម្តងៗ ប៉ុន្តែឥឡូវផ្លូវស្អាត​​​គ្រប់​កន្លែង​។ ការសម្ដែងនូវអារម្មណ៍ពេញចិត្តរបស់លោក នៅ យ៉ុន ធ្វើឡើង បន្ទាប់ពីសមិទ្ធផលជាច្រើន បានផុសលេចចេញជារូបរាងឡើងនៅក្នុងមូលដ្ឋាន។

លោក នៅ យ៉ុន បន្ត​ថា ការធ្វើដំណើររបស់ប្រជាពលរដ្ឋក៏កាន់តែងាយស្រួល អត់មានភក់ ឬក្រឡុក ផ្លូវ​ខ្វាត់ខ្វែង​តភ្ជាប់ទៅដល់ចម្ការស្រែ ងាយស្រួលដឹកដំឡូង ដឹកស្រូវ និងដឹកផល​កសិកម្មផ្សេងៗអត់មានការ​លំបាកដូចមុនទៀតទេ។

ជាក់ស្ដែង នាថ្ងៃទី២១ ខែឧសភា ឆ្នាំ២០២៥ ផ្លូវបេតុងអាមេ ចំនួន ២ ខ្សែ ប្រវែង ២,១៧៥ ម៉ែត្រ ស្ថិតក្នុងឃុំដារ ត្រូវបានប្រជុំវាយតម្លៃ ១០០ ភាគរយ ក្នុងនោះ ផ្លូវបេតុងអាមេ ១ខ្សែ មានប្រវែង ១,២៥០ម៉ែត្រ ទទឹង ៦ម៉ែត្រ និងកំរាស់ ១,៥មីលីម៉ែត្រ នៅភូមិខ្សារ ឃុំដារ ជាគម្រោងមូលនិធិឃុំឆ្នាំ ២០២៥ ដោយចំណាយថវិកា សាងសង់ សរុបចំនួន ២៩៩,២០០,០០០រៀល និងផ្លូវបេតុងអាមេ ១ខ្សែទៀត មានប្រវែង ៩២៥ម៉ែត្រ ទទឹង ៥ម៉ែត្រ និងកំរាស់ ០,១៥ម៉ែត្រ នៅភូមិដារ ឃុំដារ ជាគម្រោងមូលនិធិឃុំឆ្នាំ ២០២៤ ដោយចំណាយថវិកាសាងសង់ សរុបចំនួន ២៤៩,៧៥០,០០០រៀល៕

អត្ថបទ ៖ ប្រុញ វិធិន