មនុស្សចំណូលថ្មី១១នាក់ ចូលឃុំកោះកាពិ កំពុងស្ថិតនៅក្រោមការតាមដានសុខភាព

ប្រជាពលរដ្ឋចំំនួន១១នាក់ ដែលត្រូវបានអាជ្ញាធរចាត់ទុកថាជាអ្នកចំណូលថ្មីចូលមកកាន់ក្នុងមូលដ្ឋានឃុំកោះកាពិ ស្រុកកោះកុង កំពុងតាមដានសុខភាព និងតម្រូវឱ្យធ្វើចត្តាឡីស័កក្នុងផ្ទះតាមគោលការណ៍របស់ក្រសួងសុខាភិបាល។

អាជ្ញាធរភូមិឃុំកោះកាពិរភូមិ មន្រ្តីប៉ុស្ថិ៍សុខភាព និងកម្លាំងប៉ុស្ថិ៍នគបាលការពារព្រំដែនទឹកប្រចាំចំណុចឡាំដាំ ផ្តោតលើការងារចុះពិនិត្យកម្តៅជូនប្រជាពលរដ្ឋដែលបានធ្វើចត្តាឡីស័កតាមខ្នងផ្ទះទើបតែត្រឡប់មកពីរាជធានី/ខេត្តផ្សេងៗ គ្រាដែលព្រឹត្តការណ៍ថ្ងៃទី២០កុម្ភៈ ឆ្នាំ២០២១ ឆ្លងជំងឺកូវីដ១៩រីករាលដាលដល់សហគមន៍។

លោក ជា សូវី អភិបាលស្រុកកោះកុង ឱ្យដឹងនៅរសៀលថ្ងៃទី២៩ មីនា ២០២១ថា ចាប់តាំងពីមានករណីផ្ទុះជំងឺកូវីឌ១៩នៃព្រឹត្តការណ៍សហគមន៍ ២០ កុម្ភៈ មក គឺលោកបានផ្សព្វផ្សាយអប់រំណែនាំដល់ដាក់គោលការណ៍ប្រចាំថ្ងៃទៅដល់អាជ្ញាធរ កម្លាំងសមត្ថកិច្ច ពលរដ្ឋគ្រប់ភូមិឃុំទាំងអស់ បង្កើតការតាមដានសុខភាព និងប្រុងប្រយ័ត្នខ្ពស់ចំពោះមនុស្សចំណូលថ្មីចូលមកមូលដ្ឋាន។

លោកអភិបាលស្រុកកោះកុង បញ្ជាក់ថា ក្រុមពលរដ្ឋដែលធ្វើដំណើរមកពីប្រទេសថៃ រាជធានី ឬខេត្តដែលកំពុងផ្ទុះជំងឺកូវីដ១៩ តម្រូវឱ្យស្នាក់នៅមណ្ឌលចត្តាឡីស័កចំនួន១៤ដោយសំណាកទៅធ្វើតេស្ត ហើយមិនអនុញ្ញាតឱ្យចរាចរណ៍ទៅណាឡើយ។ រីឯពលរដ្ឋមូលដ្ឋានមិនអនុញ្ញាតឱ្យទៅក្បែរផ្ទះ ឬមណ្ឌលចត្តាឡីស័កទាំងនោះទេ។

លោក ជា សូវី កត់សម្គាល់ថា រាល់មនុស្សចំណូលថ្មីចូលមកក្នុងមូលដ្ឋានដែនគោក ឬដែនទឹក សុទ្ធតែបានដឹងមុនតាមរយៈការរាយការណ៍ភ្លាមៗពីប្រជាពលរដ្ឋរស់នៅមូលដ្ឋាន ករណីមានបងប្អូនកូនក្មួយណាម្នាក់មកចូលភូមិឃុំ ពីព្រោះពួកគាត់បារម្ភសុវត្ថិភាពផ្ទាល់ខ្លួន ខ្លាចមនុស្សចំណូលថ្មីនាំយកនូវជំងឺកូវីដដល់សហគមន៍។

ភាពដុតដៃដុតជើងរបស់អាជ្ញាធរភូមិឃុំ មន្រ្តីសុខាភិបាលប៉ុស្តិ៍សុខាភាព និងនគរបាលឃុំ លទ្ធផលនៃការតាមដានពិនិត្យសុខភាពរាល់មនុស្សចេញចូលក្នុងសហគមន៍មានសញ្ញាល្អប្រសើរ៕

អត្តបទ៖ សិរីវឌ្ឍនៈ