ក្រសួងសុខាភិបាល ដាក់ឱ្យដំណើរការកម្មវិធីសិក្សាស្រាវជ្រាវ VIRAGE និង RACSMEI ដើម្បីតាមដានជំងឺនៅកម្ពុជា

នៅថ្ងៃទី១២ ខែមិថុនា ឆ្នាំ២០២៥ ក្រសួងសុខាភិបាល បានប្រកាសដាក់ឱ្យដំណើរការកម្មវិធីសិក្សាស្រាវជ្រាវ VIRAGE និង RACSMEI “Kick-Off Event for Research Studies VIRAGE and RACSMEI” ដើម្បីតាមដានជំងឺនៅប្រទេសកម្ពុជា។

ពិធីនេះ ធ្វើឡើងក្រោមអធិបតីភាព លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានគណៈកម្មការអន្តរក្រសួងសម្រាប់សម្របសម្រួលសុខភាពតែមួយ និងមានការអញ្ជើញចូលរួមពីសំណាក់ លោក Jacques Pellet ឯកអគ្គរដ្ឋទូត វិសាមញ្ញ និងពេញសមត្ថភាព នៃសាធារណរដ្ឋបារាំងប្រចាំព្រះរាជាណាចក្រកម្ពុជា។

គោលបំណង នៃកម្មវិធីសិក្សាស្រាវជ្រាវ VIRAGE ដើម្បីពិនិត្យមើលការយល់ដឹង និងវិធានការការពារ ជំងឺឆ្កែឆ្កួតនៅប្រទេសកម្ពុជា ចំណែកឯ RACSMEI គឺដើម្បីការវាយតម្លៃហានិភ័យ នៃការរីករាលដាល ជំងឺឆ្លងនានា ក្នុងបរិបទសុខភាពតែមួយ។ អភិក្រមសុខភាពតែមួយ (One Health Approach) គឺជាវិធីសាស្ត្ររួមបញ្ចូលអន្តរាគមន៍ មនុស្ស សត្វ និងបរិស្ថាន ដើម្បីរួមចំណែកដល់កិច្ចខិតខំប្រឹងប្រែងតាមដានជំងឺនៅប្រទេសកម្ពុជា និងកំណត់គោលដៅអន្តរាគមន៍ ផ្នែកសុខភាពសាធារណៈ ប្រកបដោយភាពជាក់លាក់។

ក្នុងឱកាសនោះដែរ លោកស្រីរដ្ឋលេខាធិការ បានស្នើឱ្យក្រសួង និងស្ថាប័នពាក់ព័ន្ធទាំងអស់ ផ្តល់នូវធាតុចូល សម្រាប់ការសិក្សាស្រាជ្រាវ VIRAGE និង RACSMEI បានគ្រប់ជ្រុងជ្រោយ និងអំពាវនាវឱ្យពលរដ្ឋមានការប្រុងប្រយ័ត្ននឹងជំងឺឆ្កែឆ្កួត ហើយបើមានករណីឆ្កែខាំ សូមរួសរាន់ទៅចាក់វ៉ាក់សាំង ដើម្បីការពារជំងឺឆ្កែឆ្កួត។

ជាចុងបញ្ចប់ លោកស្រី បានថ្លែងអំណរគុណដល់ស្ថានទូតបារាំង ស្ថានទូត​អង់គ្លេស​ វិទ្យាស្ថានប៉ាស្ទ័រកម្ពុជា (IPC), AFD និងដៃគូទាំងអស់ដែលចូលរួមគាំទ្រនូវគម្រោងសុខភាពតែមួយ (One Health) នៅកម្ពុជា៕