បញ្ហាកម្ពុជា-ថៃ បណ្ឌិត យង់ ពៅ ថា កម្ពុជាគួរសម្រុកផ្សាយការពិតទៅកាន់បរទេសឱ្យបានច្រើន

បណ្ឌិត យង់ ពៅ អ្នកតាមដានស្ថានការណ៍នយោបាយកម្ពុជា បានសរសេរលើហ្វេសប៊ុកផ្ទាល់ខ្លួន នៅព្រឹកថ្ងៃទី២៥ ខែមិថុនា ឆ្នាំ២០២៥ ថា ជុំវិញទំនាស់កម្ពុជា និងថៃ ដែលកំពុងកើតមានបច្ចុប្បន្ននេះ កម្ពុជា គួរតែផ្សាយការពិតទៅកាន់បរទេសឱ្យបានច្រើនជាភាសាបរទេស ដូចជាភាសាអង់គ្លេស និងចិនជាដើម ស្របពេលដែលព័ត៌មានថៃបានផ្សាយបំភ្លៃ និងបំពុលពីកម្ពុជាច្រើនណាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសំណេរនោះ លោក បណ្ឌិត យង់ ពៅ បានសរសេរថា៖ “ពាក់ព័ន្ធនឹងបញ្ហាវិវាទព្រំដែន កម្ពុជា-ថៃ សេណាធិការព័ត៌មានរាជរដ្ឋាភិបាល គួរសម្រុកផ្សាយព័ត៌មានការពិតចេញទៅបរទេសឱ្យបានច្រើនបំផុតលើសពីមុនៗ ជាពិសេសសារព័ត៌មាន ជាភាសាបរទេស (អង់គ្លេស ចិន…)”។

ជាមួយគ្នានេះ លោកបន្តថា ប្រទេសកម្ពុជាចាំបាច់ត្រូវតែបំភ្លឺការពិតទៅពិភពលោកឱ្យបានដឹងតាមរយៈព័ត៌មានផង និងការទូតផង ដោយលោកបញ្ជាក់ថា នៅពេលមានបញ្ហាជាមួយគ្នាពាក់ព័ន្ធនឹងព្រំដែននេះ ថៃ បានផ្សាយព័ត៌មានដែលបំភ្លើស និងបំពុលពីប្រទេសកម្ពុជាច្រើនណាស់។ បន្ថែមពីនេះ លោកបញ្ជាក់ទៀតថា ប្រសិនជាកម្ពុជាមិនខិតខំផ្សព្វផ្សាយឱ្យបានច្រើនទេ នោះ អន្តរជាតិនឹងជឿតាមការបំភ្លើសរបស់ព័ត៌មានថៃ។

ត្រង់ចំណុចនេះ លោកលើកឡើងថា៖ “ក្នុងស្ថានភាពមិនធម្មតា ត្រូវប្រឹងធ្វើការលើសពីធម្មតាទាំងអស់គ្នា”។

សូមរម្លឹកថា បញ្ហាកម្ពុជា និងថៃ បានកើតឡើងពីភាគីថៃជាអ្នកផ្តើមមុនដោយបានលបបាញ់ប្រហារទាហានខ្មែរម្នាក់ស្លាប់ នៅព្រឹកថ្ងៃទី២៨ ខែឧសភា ឆ្នាំ២០២៥ នៅតំបន់មុំ៣ ខេត្តព្រះវិហារ។ បន្ទាប់ពីមានបញ្ហារវាងប្រទេសទាំង២ តាមការសង្កេត សារព័ត៌មានថៃបានចុះផ្សាយព្រោងព្រាត ពីបញ្ហាទាំងអស់នេះ ដែលភាគច្រើនជាព័ត៌មានបំភ្លៃ បំពុល និងបែបញុះញង់ច្រើន ដែលខុសពីកម្ពុជាប្រកាន់ភាពត្រឹមត្រូវ និងវិជ្ជាជីវៈ៕