សាកលវិទ្យាល័យភូមិន្ទភ្នំពេញ ប្រកាសពីការប្រឡងរើសនិស្សិតថ្នាក់បរិញ្ញាបត្រជាន់ខ្ពស់ផ្នែកអប់រំ

មហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ បានចេញសេចក្តីជូនដំណឹង នៅថ្ងៃទី៣០ ខែមិថុនា ឆ្នាំ២០២៥ ពីការប្រឡងជ្រើសរើសនិស្សិតចូលរៀនថ្នាក់បរិញ្ញាបត្រជាន់ខ្ពស់ផ្នែកអប់រំ ជំនាន់ទី២២​ សម្រាប់ឆ្នាំសិក្សា២០២៥-២០២៦។

អ្នកដែលមានចំណាប់អារម្មណ៍ អាចទៅយកពាក្យពីថ្ងៃជូនដំណឹង ដល់ថ្ងៃទី២៩ ខែវិច្ឆិកា ឆ្នាំ២០២៥ នៅបន្ទប់ ២១០B ជាន់ទី២ នៃអគារ A នៅសាកលវិទ្យាល័យភូមិន្ទភ្នំពេញ។ ការប្រឡងនឹងធ្វើនៅថ្ងៃសៅរិ៍ ទី១៣ ខែធ្នូ ឆ្នាំ២០២៥ខាងមុខ ដោយប្រឡងលើវិញ្ញាសា ចំណេះដឹងផ្នែកអប់រំរយៈពេល ៩០នាទី (ចាប់ពីម៉ោង ៨ព្រឹក ដល់ម៉ោង៩៖៣០ព្រឹក) និងចំណេះដឹងភាសាអង់គ្លេស ៩០នាទី (ចាប់បីម៉ោង ៩៖៤៥ ដល់ម៉ោង១១៖១៥)។

ចំពោះលក្ខខណ្ឌចុះឈ្មោះ និស្សិតត្រូវមានសញ្ញាបត្របរិញ្ញាបត្រ ឬសញ្ញាបត្រដែលមានតម្លៃស្មើ និងមានចំណេះដឹងផ្នែកអប់រំ និងភាសាអង់គ្លេស ព្រោះការសិក្សា គឺសិក្សាជាភាសាអង់គ្លេស។

នៅពេលទៅទទួលពាក្យ បេក្ខជនប្រឡងត្រូវបង់សិទ្ធិប្រឡងចំនួន ៨ម៉ឺនរៀល នៅពេលដាក់ពាក្យ និកងត្រូវបង់ថ្លៃសិក្សាយ៉ាងយូរ ២សប្តាហ៍បន្ទាប់ពីប្រឡងជាប់។ សម្រាប់ថ្លៃសិក្សា និស្សិតត្រូវបង់ចំនួន ២,២២០,០០០រៀល ក្នុង១ឆមាស (សិស្សត្រូវបង់ថ្លៃសិក្សា៤ឆមាស)។ ចំណែកនិស្សិតបរទេសវិញ ត្រូវបង់ថ្លៃសិក្សាទ្វេជាពីរ៕