ព័ត៌មានជាតិ

មន្ទីរសាធារណការខេត្តព្រះវិហារ បន្តជួសជុលផ្លូវក្រាលល្បាយថ្ម៣ខ្សែ នៅតាមជើងភ្នំដងរ៉ែក

បានផុស

៥ years មុន

នៅ

ថ្ងៃសុក្រ ២ មេសា ២០២១

ដោយ

បើទោះបីប្រទេសកម្ពុជាកំពុងស្ថិតក្នុងតំណាក់កាលនៃការបង្ការ ទប់ស្កាត់នឹងជំងឺកូវីដ-១៩ក៏ពិតមែន ប៉ុន្តែសម្រាប់មន្ទីរសាធារណការ និងដឹកជញ្ជូនខេត្តព្រះវិហារ នៅតែបន្តការជួសជុលថែទាំផ្លូវនៅក្នុងខេត្តរបស់ខ្លួនជាប្រចាំ ដើម្បីកុំឲ្យខូចខាតធ្ងន់ធ្ងរ ចំណាយលើការជួសជុល ឬស្ថាបនាឡើងវិញច្រើន ហើយក៏ដើម្បីបង្កភាពងាយស្រួលដល់ប្រជាពលរដ្ឋ ក្នុងការធ្វើដំណើរផងដែរ។

ជាក់ស្តែងនៅព្រឹកថ្ងៃទី០២ ខែមេសា ឆ្នាំ២០២១នេះ ក្រុមការងារនៃមន្ទីរសាធារណការនិងដឹកជញ្ជូនខេត្តព្រះវិហារ បានបន្តកិច្ចខិតខំប្រឹងប្រែង ដោយកៀរសម្រួលផ្លូវក្រាលល្បាយថ្មចំនួន០៣ខ្សែ នៅតាមបណ្ដោយជើងភ្នំដងរ៉ែក ស្ថិតនៅឃុំស្រអែម ស្រុកជាំក្សាន្ត ខេត្តព្រះវិហារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារ បានឲ្យដឹងថា បើទោះបីប្រទេសកម្ពុជាកំពុងស្ថិតក្នុងតំណាក់កាលនៃការបង្ការ ទប់ស្កាត់នឹងជំងឺកូវីដ-១៩ក៏ពិតមែន អនុវត្តតាមការណែនាំរបស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូននិងលោក ប្រាក់ សុវណ្ណ អភិបាលខេត្តព្រះវិហារ នៅព្រឹកថ្ងៃទី០២ ខែមេសា ឆ្នាំ២០២១នេះ ក្រុមការងារ ជួសជុលថែទាំផ្លូវរបស់មន្ទីរសាធារណការ និងដឹកជញ្ជូនខេត្តព្រះវិហារ បានបន្តកិច្ចខិតខំប្រឹងប្រែង កៀរសម្រួលផ្លូវក្រាលល្បាយថ្មចំនួន០៣ខ្សែ នៅតាមបណ្ដោយជើងភ្នំដងរ៉ែក ស្ថិតនៅឃុំស្រអែម ស្រុកជាំក្សាន្ត ខេត្តព្រះវិហារ ដូចជាផ្លូវខេត្តលេខ 2PVH1 ប្រវែង៩,៥គីឡូម៉ែត្រ ដោយកៀរសម្រួល ថែមល្បាយថ្ម ស្រោចទឹក កិនបង្ហាប់ សម្រេចបានលទ្ធផល១០០% និងបន្តកៀរសម្រួល ផ្លូវខេត្តលេខ២៦ ២៧ ប្រវែង១៣,៨គីឡូម៉ែត្រ(ភូមិគ១ ដល់ភូមិអង្គ្រង) និងផ្លូវខេត្តលេខ 2PVH3 ប្រវែង ១៧,០គីឡូម៉ែត្រ ពីជើងភ្នំទ្រព្យ ដល់ភូមិអង្គ្រង)។

គួរបញ្ជាក់ថា ពាក់ព័ន្ធនឹងការងារបង្ការទប់ស្កាត់នឹងជំងឺកូវីដ-១៩ មន្ទីរសាធារណការ និងដឹកជញ្ជូនខេត្តព្រះវិហារ តែងតែយកចិត្តទុកដាក់បំផុតក្នុងការចូលរួមចំណែកជាមួយប្រមុខរាជរដ្ឋាភិបាលកម្ពុជា ដោយអនុវត្តតាមការណែនាំរបស់ក្រសួងសុខាភិបាល និងជាពិសេសអនុវត្តតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាចក្រកម្ពុជា នូវវិធានការ ការពារជំងឺកូវីដ១៩ ៣កុំ ៣ការពារ។

ថ្នាក់ដឹកនាំមន្ទីរតែងតែបានដាស់តឿនក្រើនរំលឹកដល់មន្ត្រីក្រោមឱវាទទាំងអស់ជារឿយៗ ត្រូវមានទំនួលខុសត្រូវខ្ពស់ ដោយបន្តអនុវត្តវិធានការខាងលើឲ្យបានហ្មត់ចត់ និងត្រឹមត្រូវតាមការណែនាំ ដោយបានចាត់តាំងមន្ត្រីប្ដូរវេនគ្នាប្រចាំការរៀងរាល់ម៉ោងធ្វើការដើម្បីត្រួតពិនិត្យកំដៅ និងបាញ់អាល់កុលលាងដៃជូនមន្ត្រី និងប្រជាពលរដ្ឋដែលមកទទួលសេវាគ្រប់ប្រភេទរបស់មន្ទីរទាំងអស់ នៅទ្វារច្រកចេញចូល និងនៅមុខអគារទាំងអស់របស់មន្ទីរ៕

អត្ថបទ ៖ ស្រីរ័ត្ន