ពូទីន ចុះហត្ថលេខាលើច្បាប់ អនុញ្ញាតឲ្យជនបរទេស ចូលធ្វើជាទាហានរុស្ស៊ី

កាលពីថ្ងៃចន្ទទី៧ខែកក្កដាឆ្នាំ២០២៥ ប្រធានាធិបតីរុស្ស៊ី វ្ល៉ាឌីមៀរ ពូទីន បានចុះហត្ថលេខាលើច្បាប់មួយដែលអនុញ្ញាតឲ្យជនបរទេស រួមទាំងអ្នកគ្មានសញ្ជាតិផងដែរ អាចចូលបម្រើការក្នុងជួរកងទ័ពរបស់ប្រទេសនេះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន TASS, ក្នុងច្បាប់នោះ ជនបរទេសអាចបម្រើការងាររហូតដល់ចប់រយៈពេលនៃការកែនទ័ព ការបញ្ចប់ច្បាប់អាជ្ញាសឹកឬពេលចប់សង្គ្រាម ខណៈគោលបំណងនៃច្បាប់នេះត្រូវគេមើលឃើញថា គឺប្រមុខវិមានក្រឹមឡាំងចង់បង្កើនចំនួនទ័ព ចំពេលមានជម្លោះជាបន្តនៅប្រទេសអ៊ុយក្រែន។

ក្រៅពីការអនុញ្ញាតឲ្យចូលធ្វើទ័ពហើយនោះ ច្បាប់ថ្មីនេះក៏នឹងជួយសម្រួលឲ្យជនបរទេសរូបណាដែលបម្រើការងារក្នុងជួរយោធារបស់ខ្លួន អាចទទួលបានសញ្ជាតិរុស្ស៊ីយ៉ាងស្រួលមិនចាំបាច់ឆ្លងកាត់ដំណើរការស្មុគស្មាញ ហើយក្នុងករណីខ្លះ សមាជិកគ្រួសាររបស់អ្នកទាំងនោះ ក៏អាចនឹងទទួលការលើកលែងឲ្យចូលសញ្ជាតិដូចគ្នាផងដែរ។

រម្លឹកទៅខែមីនា លោក ពូទីន បានចុះហត្ថលេខាលើក្រឹត្យមួយ ដោយកែនពលរដ្ឋចំនួន ១៦០ ០០០នាក់ដែលមានអាយុពី១៨ដល់៣០ឆ្នាំឲ្យចូលធ្វើទាហាន ដែលនោះជាចំនួនដ៏ច្រើនបំផុតមិនធ្លាប់មានក្នុងរយៈពេល១៤ឆ្នាំ។

ទោះបីជាយ៉ាងណាក៏ដោយ កាលនោះក្រសួងការពារជាតិរុស្ស៊ីអះអាងថា យុទ្ធនាការកែនទាហាននេះ គឺមិនជាប់ពាក់ព័ន្ធនឹងប្រតិបត្តិការយោធានៅអ៊ុយក្រែនឡើយ។

ដោយឡែក កាលពីខែមករាឆ្នាំ២០២៤ឯណោះ លោកពូទីន ក៏ចុះហត្ថលេខាលើក្រឹត្យមួយដែលផ្តល់ភាពងាយស្រួលក្នុងការផ្តល់សញ្ជាតិដល់ជនបរទេសដែលកំពុងប្រយុទ្ធនៅក្នុងយោធារុស្ស៊ី ក៏ដូចជាសាច់ញាតិរបស់ពួកគេផងដែរ ខណៈសកម្មភាពនោះហាក់ដូចជាសំដៅទៅលើពលរដ្ឋនៃអតីតបណ្តាប្រទេសសូវៀតដែលកំពុងរស់នៅ និងធ្វើការក្នុងប្រទេសរុស្ស៊ី៕

អត្ថបទ៖ សុខ សុវណ្ណ

ចុចអាន៖ ពូទីន បណ្តេញរដ្ឋមន្ត្រីដឹកជញ្ជូន ក្រោយ​ឡើង​កាន់​តំណែង​បាន​តែ​មួយ​ឆ្នាំ​ជាង